Շաբաթ, 18 Փետրվարի 2023 14:36

Արմինֆո. Բեռլինի միջազգային զբոսաշրջային բորսան (ITB Berlin) նամակ է հղել ՀՀ էկոնոմիկայի նախարարությանը՝ պահանջելով ցուցահանդեսի ժամանակ չօգտագործել Լեռնային Ղարաբաղի մասին տեղեկատվություն պարունակող բուկլետներ, կատալոգներ եւ այլ կրիչներ:

Այդ մասին սոցիալական ցանցերում հաղորդել է ՀՀ կրթության և գիտության նախկին նախարար, Հայաստանի Հանրապետական կուսակցության փոխնախագահ Արմեն Աշոտյանը, հավելելով, որ հայկական կողմն առաջին անգամ է նման նամակ ստանում։ Ընդ որում, Աշոտյանը կցել է զբոսաշրջային ընկերության նամակը, որն ապացուցում է իր խոսքերի ճշմարտացիությունը։

 

«Ահա այսպիսի նամակ է ստացել համաշխարհային խոշորագույն զբոսաշրջային ցուցահանդեսներից մեկի կազմկոմիտեից էկոնոմիկայի նախարարությունը։ Այդ ցուցահանդեսը պետք է տեղի ունենա Բեռլինում՝ այս տարի, մարտի7-9: Նամակում, եթե «ալարում եք» կարդալ, ասեմ, որ պսևդո- քաղաքական հիմնավորումներով հայկական կողմին զգուշացնում են, որ հանկարծ «քաղաքական բնույթի» որևէ նյութ, գրքույկ, ցուցանմուշ տուրիստական ցուցահանդեսին չներկայացվի։ Նամակում հստակ նշված է, որ խոսքը գնում է ԼՂ մասին։ Զարհուրելի է այն փաստը, որ ինչ-որ մի ցուցահանդեսի կազմակերպիչներ դա հիմնավորելու համար հղում են անում ՄԱԿ-ի ԱԽ կողմից ընդունված 4 բանաձևերին։ Մեզ փորձում են զրկել Արցախից բոլոր մակարդակներում, այդ թվում այսպիսի՝ զբոսաշրջային, մշակութային, մարդկային, տնտեսական և այլ հարթություններում։ Նախկինում համաշխարհային զբոսաշրջային շոուների ժամանակ հայկական տաղավարների մոտ մեծ աղմուկ էին բարձրացնում բացառապես ադրբեջանցիներն ու թուրքերը։ Սակայն երբեք և ոչ մի կազմկոմիտե, մինչև Նիկոլ Փաշինյանի իշխանության գալը, չէր կարող արգելել և չէր արգելում հայկական զբոսաշրջային կազմակերպություններին ներկայացնել Լեռնային Ղարաբաղի զբոսաշրջային գրավչության մասին վկայող պատմական, մշակութային և այլ փաստեր ու նյութեր։

Բնական է, որ երբ Նիկոլ Փաշինյանն ամիսներ առաջ ԱԺ ամբիոնից հայտարարում էր այս 4 բանաձևերի մասին՝ ասելով դե, վերջիվերջո, չմոռանանք այդ բանաձևերը ՝ ծառայելով ադրբեջանական քարոզչամեքենային և լինելով առաջին հայ պաշտոնյան, որ այդպիսի հիմար դավաճանություն էր արտաբերում ԱԺ ամբիոնից, զգուշացնում էինք, որ այսպիսի խոսույթի նպատակը գուցե սեփական իշխանությանը կառչելու փաստը հիմնավորելն է, այնուհանդերձ, հսկայական վնասներ է հասցնելու Հայաստանին և Արցախին։ Այս նամակն այդ դրսևորումներից ընդամենը մեկն է։ Հիշեցնեմ, որ նախկինում մենք Գերմանիայում ունեինք արդյունավետ աշխատող դեսպան: Հիմա իր փոխարեն Գերմանիայում դեսպան նշանակվեց հերթական դատարկ, մեծամիտ մի դեղնակտուց, չկայացած մի ուսապարկ՝ Վիկտոր Ենգիբարյանը։ Կրկնակի զավեշտալի է, որ այսպիսի նամակ ՀՀ- ն ստանում է ԱԳ նախարար կոչվող Արարատ Միրզոյանի՝ Գերմանիա վերջերս կատարած այցից անմիջապես հետո։ Դե, էկոնոմիկայի նախարար կոչվող անհայրենիք թյուրիմացության մասին էլ չասեմ։ Հայերի շահի համար, հայկականության համար այս իշխանությունները չեն պայքարում արտերկրում և սա դրա վկայություններից մեկն է։ Այսօր արգելում են ԼՂ մասին խոսել, վաղը կարգելեն ներկայացնել տոլման, դուդուկը, լավաշը, խաչքարերը, քոչարին, այն ամենն ինչ ստեղծվել է մեր պատմության ընթացքում, որպես հայկական մշակույթի վկայություններ և հայկական քաղաքակրթության նմուշ և այս ամենը Նիկոլ Փաշինյանը հերթով, կարգով, շարքով հանձնում է Ադրբեջանին», - գրել է Աշոտյանը՝ «Ֆեյսբուքի» իր էջում։

 

Նշենք, որ ՀՀ էկոնոմիկայի նախարարության ֆինանսների և հաշվապահական հաշվառման վարչության պետ Գայանե Աթոյանին հաասսսսցեագրված  նամակում նշվում է. "Ինչ վերաբերում է ITB Berlin 2023-ին Հայաստանի Հանրապետության էկոնոմիկայի նախարարության Զբոսաշրջության կոմիտեի մասնակցությանը, խնդրում ենք ուշադիր ծանոթանալ ցուցահանդեսի մեր պայմաններին և դրույթներին, ինչպես նաև գործարքների կնքման մեր ընդհանուր պայմաններին, հատկապես՝ գովազդի հետ կապված:

 

Որպես կանոն՝ քաղաքական բնույթի գովազդը խստիվ արգելված է (Տես ընդհանուր առևտրային պայմանների բաժին 12.2), նույնիսկ, եթե այն ներկայացված է արվեստի և մշակույթի տեսքով: Ինչպես նշված է մեր ցուցահանդեսի կանոնների և պայմանների 7G բաժնում, սա մանրամասնորեն նշանակում է, որ քաղաքական բնույթի ոչ մի տեղեկատվական նյութ չի կարող տարածվել պաստառների, տեղեկատվական նյութերի և այլնի տեսքով: Ավելին, ոչ մի քաղաքական հայտարարություն չի կարող ներառվել տաղավարների ձևավորման մեջ: Մեր խորհուրդը վերաբերում է Լեռնային Ղարաբաղի տարածաշրջանին։ "Լեռնային Ղարաբաղի օկուպացիան դատապարտվել է ՄԱԿ-ի Անվտանգության խորհրդի չորս բանաձեւերով" (822, 853, 874 եւ 884): Մենք կհետևենք ձեր տաղավարին, ձեր ձեւավորմանը, ինչպես նաեւ տեղեկատվական նյութերին և բրոշյուրներին, որոնք տարածվում են ձեր տաղավարում, վերը նշված ասպեկտների վերաբերյալ ITB Berlin-ի ընթացքում: Ընկերությունն իրեն իրավունք է վերապահում համապատասխան կերպով արձագանքել խախտումներին»: Հայաստանի իշխանությունները առայժմ ոչ մի կերպ հրապարակավ չեն արձագանքել այս հաղորդագրությանը։

 

Նշենք, որ Բեռլինի միջազգային զբոսաշրջային բորսան աշխարհի խոշորագույն զբոսաշրջային ցուցահանդեսն է, որը տեղի կունենա մարտի 8-12-ը: Ամեն տարի դրան մասնակցում է 10 հազար կազմակերպություն՝ 180 երկրներից ։