Արմինֆո. Եվրախորհրդարանի պատգամավորները ողջունում են Հայաստանում ժողովրդավարական բարեփոխումները եւ կոչ են անում Հայաստանին համապարփակ եւ փոխընդունելի խաղաղության պայմանագիր կնքել: Համապատասխան կոչը հնչում է Եվրախորհրդարանի արտաքին հարաբերությունների հանձնաժողովի նոր զեկույցում։
Հայաստանի հետ ԵՄ հարաբերությունների վերաբերյալ զեկույցում, որը պատրաստել է
Եվրախորհրդարանի արտաքին հարաբերությունների հանձնաժողովը, Եվրախորհրդարանի պատգամավորները խստորեն դատապարտում են 2022 թվականի սեպտեմբերին Ադրբեջանի կողմից Հայաստանի վրա լայնածավալ ռազմական հարձակումը, որը խախտել է խաղաղության հասնելու համար նախկինում ձեռնարկված փորձերը և հանգեցրել ադրբեջանական ուժերի կողմից Հայաստանի ինքնիշխան տարածքի օկուպացմանը:
«Ընդգծելով, որ այս վերջին ագրեսիան ուղղակի կապ չունի Լեռնային Ղարաբաղի շուրջ երկարաժամկետ հակամարտության հետ, զեկույցը կոչ է անում Ադրբեջանի իշխանություններին զորքերը դուրս բերել Հայաստանի տարածքի բոլոր հատվածներից։ Եվրախորհրդարանականները նաև հորդորում են երկու երկրների կառավարություններին աշխատել համապարփակ և փոխընդունելի խաղաղության պայմանագրի շուրջ, իսկ ԵՄ-ին հորդորում են շարունակաբար ներգրավվել, միջնորդել ու արդյունավետ կերպով նպաստել հակամարտության խաղաղ կարգավորման», - ասվում է փաստաթղթում:
Սակայն, Եվրախորհրդարանի պատգամավորները վերահաստատում են, որ արդյունավետ լինելու համար խաղաղության ցանկացած պայմանագիր պետք է ներառի դրույթներ, որոնք երաշխավորում են Հայաստանի ինքնիշխան տարածքի ամբողջականությունը, Լեռնային Ղարաբաղում և հակամարտությունից տուժած այլ շրջաններում բնակվող հայ բնակչության իրավունքներն ու անվտանգությունը, փախստականների և ներքին տեղահանվածների արագ և անվտանգ վերադարձն իրենց տներ:
Զեկույցը ողջունում է 2021 թվականի մարտին Հայաստան-ԵՄ Համապարփակ և ընդլայնված գործընկերության համաձայնագրի ամբողջական ուժի մեջ մտնելն ու այն իրականացնելու Հայաստանի հանձնառությունը։ Եվրախորհրդարանի պատգամավորները նաև գովաբանում են Հայաստանին՝ վերջին տարիներին իրականացրած նշանակալի բարեփոխումների, ժողովրդավարացման գործընթացի համար, որոնց արդյունքում երկիրը դարձել է տարածաշրջանում ժողովրդավարության առաջատար: ԵԽ պատգամավորները կոչ են անում նաև Եվրամիությանն ու Հայաստանին սերտորեն աշխատել Համապարփակ և ընդլայնված գործընկերության համաձայնագրի շրջանակներում ընթացիկ և ապագա բարեփոխումների իրականացման վրա, շեշտելով, որ այն ընդգրկում է համատեղ աշխատանքի լայն շրջանակ:
Զեկույցում նշվում է նաև հանցավորության և կոռուպցիայի դեմ Հայաստանի պայքարի մասին, այն խրախուսում է կառավարությանը շարունակել բարեփոխումները՝ ժողովրդավարական ինստիտուտների ամրապնդման, օրենքի գերակայության և դատական անկախության համար՝ չնայած միջազգային բարդ համատեքստին և այն մարտահրավերներին, որոնց բախվել է Հայաստանը:
Եվրապատգամավորներն ընդգծել են, որ երկրի մեդիա միջավայրը դեռևս բևեռացված է, ԵԽ պատգամավորները մտահոգված են լրագրողների նկատմամբ ատելության խոսքի և ֆիզիկական բռնության դեպքերով։
«Եվրախորհրդարանի պատգամավորները մտահոգված են նաեւ Հայաստանում չդադարող ռուսական ապատեղեկատվական արշավների առնչությամբ, որոնք ուղղված են Եվրամիությանն ու Արեւմուտքին, եւ կոչ են անում ջանքեր գործադրել՝ երկրի մեդիա ոլորտի բազմազանության և մեդիագրագիտության բարձրացման ուղղությամբ: Լիովին աջակցելով ապատեղեկատվության դեմ պայքարում Հայաստանի կառավարության ջանքերին՝ Եվրաաախորհրդի պատգամավորները հայտարարել են, որ ոչ մի միջոց չպետք է հանգեցնի լրագրողների կամ խոսքի ազատության սահմանափակումների», - ասվում է փաստաթղթում։
«ԵՄ-Հայաստան հարաբերությունների մասին զեկույցը ևս մեկ անգամ վերահաստատում է տարածաշրջանում խաղաղության և մի շարք կարևոր ոլորտներում Հայաստանի ու ԵՄ-ի համագործակցության Եվրախորհրդարանի հանձնառությունը։ Որպես այս ուղղությամբ կարևոր քայլ՝ մենք ողջունում ենք Հայաստանում ԵՄ առաքելության ստեղծումը և Ադրբեջանի կառավարությանը կոչ ենք անում երաշխավորել գրեթե 2 ամիս արգելափակված Բերձորի (Լաչինի) միջանցքով տեղաշարժի ազատությունն ու անվտանգությունը»,- ասել է զեկուցող Անդրեյ Կովաչևը (ԵԺԿ, Բուլղարիա)՝ քվեարկությունից հետո։
Զեկույցն ընդունվել է 55 կողմ, 5 ձեռնպահ ձայներով: Հանձնաժողովի քվեարկությունից հետո տեքստը կներկայացվի Եվրախորհրդարանի հաստատմանը: