Արմինֆո. Ադրբեջանի հետ խաղաղության պայմանագրի շուրջ բանակցությունները շարունակական գործընթաց են: Այդ մասին հայտարարել է Հայաստանի ԱԳ նախարար Արարատ Միրզոյանը՝ փետրվարի 8-ին Երեւանում Խորվաթիայի արտաքին և եվրոպական գործերի նախարար Գորդան Գրլիչ Ռադմանի հետ համատեղ մամուլի ասուլիսի ժամանակ։
Վերահաստատելով նախօրեին Բեռլինում ասվածը՝ Միրզոյանը եւս մեկ անգամ ընդգծել է, որ կողմերը շարունակաբար մի քանի փուլով փոխանակում են առաջարկություններ, մեկնաբանություններ, հիմնավորումներ: Նրա ասելով՝ այս գործընթացին զուգահեռ տեղի են ունենում նախարարների հանդիպումներ, որտեղ քննարկվում են այդ առաջարկները:
«Իսկապես, մենք հնարավոր չգտանք մասնակցել Մոսկվայում դեկտեմբերի 23-ին պլանավորված հերթական քննարկմանը՝ ակնհայտորեն, Լաչինի միջանցքի ապօրինի բլոկադայի հանգամանքներից ելնելով: Բայց ես նշել եմ արդեն, որ չմասնակցելով, մենք միևնույն է փոխանցել ենք մեր առաջարկները հեռավար կարգով: Եվ ահա, մի քանի օր առաջ՝ 10-15 օր առաջ, ստացել ենք Ադրբեջանի պատասխանը: Փոխանցվել են հերթական մեր առաջարկները, ապա, հերթական ադրբեջանական առաջարկները, և, ըստ էության, քննարկման փուլում ենք: Ուզում եմ ասել, որ սա ցույց է տալիս, որ բանակցային գործընթացը, մեծ հաշվով, կանգ չի առել, և՛ մեկնաբանությունները, և՛ առաջարկները շարունակվել են փոխանակվել: Եվ այժմ մենք հանդես կգանք մեր նոր մեկնաբանություններով` ադրբեջանական կողմի մեկնաբանությունների հիման վրա», - նշել է արտգործնախարարը: Միեւնույն ժամանակ, նա նպատակահարմար չի գտել ամբողջովին բացել ադրբեջանական կողմի առաջարկների բովանդակությունը, նշելով, որ խոսքը բանակցային գործընթացի մասին է: «Կողմերի դիրքորոշումները տարբեր հարցերի շուրջ որոշ դեպքերում մոտենում են միմյանց, որոշ դեպքերում շարունակում են մնալ իրարից բավականին հեռու: Հետևաբար, երևի, քաղաքական առումով նպատակահարմար չի վերցնել առանձին որևէ դետալ և ասել, թե այս պահին ինչպիսին են կողմերի դիրքորոշումները այդ հարցի շուրջ, որովհետև վաղը կարող է բոլորովին այլ պատկեր լինի: Կրկնում եմ՝ որոշ հարցերում մոտեցնել դիրքորոշումները հնարավոր է եղել, բայց հայկական կողմն ունի իր սկզբունքային հարցերն այս գործընթացում, և այդ հարցերը, կարծում եմ, որ նաև հրապարակավ բազմիցս ասել ենք», - ասել է Հայաստանի արտգործնախարարը:
Ինչ վերաբերում է հանդիպումներին, Միրզոյանը հիշեցրել է, որ Երեւանը չի չեղարկել մոսկովյան հանդիպումը, այլ՝ հետաձգել է: Միրզոյանը հավաստիացրել է, որ որոշակի հարմար պահի Հայաստանը նորից կգործարկի այդ հետաձգված հանդիպումը: «Հանդիպումը կարող է տեղի ունենալ Մոսկվայում, հանդիպումները կարող են տեղի ունենալ այլուր: Եթե հետևել եք հետագծին, մենք տարբեր մայրաքաղաքներում և տարբեր քաղաքներում ենք այսպիսի հանդիպումներ ունեցել: Կուզեի ասել, որ երևի արդարացի կլինի նկատել, որ քաղաքի, վայրի ընտրությունը, իհարկե կարևոր է, բայց նաև չափազանց էական ազդեցություն գործընթացի վրա, մեծ հաշվով, գուցե չունի: Եվ այս առումով մենք պատրաստ ենք նորից հերթական հանդիպումը, բնականաբար, հետաձգված հանդիպումը անցկացնել Մոսկվայում», - ասել է Հայաստանի արտգործնախարարը:
Անդրադառնալով Երեւանի եւ Մոսկվայի հարաբերություններում ճգնաժամի առկայության մասին հարցին՝ Միրզոյանը հավաստիացրել է, որ Ռուսաստանի հետ դաշնակցային հարաբերություններում կա շատ լայն երկկողմ և բազմակողմ օրակարգ, կան բազմաթիվ համաձայնություններ, կան որոշակի հարցերում անհամաձայնություններ, ընդ որում՝ հրապարակային, այդ թվում և կապված ՀԱՊԿ-ի դերակատարման և քաղաքական գնահատականների կամ դրանց բացակայության հետ: «Ճգնաժամ անվանել դրանք երևի չափազանց ուռճացված կլինի: Մենք մշտապես կապի մեջ ենք մեր ռուսաստանյան գործընկերների հետ, արդեն նշեցի, քննարկում ենք բազմաճյուղ, օրակարգի բոլոր հնարավոր հարցերը՝ բոլոր այն հարցերը, որտեղ համաձայնություն կա, և բոլոր նրանք, որտեղ առայժմ համաձայնություն չկա», - ամփոփել է Միրզոյանը: