Արմինֆո. Մոսկվայում Երեւանին կոչ են արել սխոլաստիկայով զբաղվելու փոխարեն շարունակել համատեղ աշխատանքը Լեռնային Ղարաբաղի հակամարտության կարգավորման ուղղությամբ:
Ռուսաստանի ԱԳՆ պաշտոնական ներկայացուցիչ Մարիա Զախարովան, անդրադառնալով հունվարի 10-ի մամուլի ասուլիսում ՀՀ վարչապետ Նիկոլ Փաշինյանի այն հայտարարությունը մեկնաբանելու խնդրանքին, թե՝ հայկական կողմը պատրաստ է ստորագրել ղարաբաղյան հակամարտության կարգավորման վերաբերյալ փաստաթուղթը՝ ռուսական առաջարկների հիման վրա, դժվարացել է գնահատական տալ հայկական կողմի դիրքորոշմանը: Նրա խոսքով ՝ դա դժվար է անել, քանի որ նույն հարցի վերաբերյալ պաշտոնական Երևանի հայտարարությունները էապես տարբերվում են։
"Հիշյալ մամուլի ասուլիսի ընթացքում Հայաստանի վարչապետը խոսել է և ռուսական առաջարկների հիման վրա փաստաթուղթ ստորագրելու մտադրության, և, միևնույն ժամանակ, Արևմուտքի կողմից առաջ մղվող հակամարտության ինչ-որ "համալիր լուծման" նախապատվության մասին։ Ավելի վաղ Ռուսաստանի ԱԳ նախարար Սերգեյ Լավրովի մեկնաբանություններում մանրամասն ներկայացվել էր ռուսական ջանքերի տարեգրությունը ինչպես երկկողմ ձևաչափերում, այնպես էլ ղարաբաղյան հիմնախնդրի լուծման միջազգային մեխանիզմների շրջանակներում, այդ թվում ՝ Ռուսաստանի, Ադրբեջանի և Հայաստանի առաջնորդների 2020 թվականի նոյեմբերի 9-ի հայտարարության և ուղեկցող եռակողմ պայմանավորվածությունների իրականացման ուղղությամբ", - ընդգծել է Զախարովան։
Ընդ որում, նա նշել է, որ Բաքվի հետ խաղաղության պայմանագիր մշակելիս 1991թ. Ալմա-Աթայի հռչակագրի վրա հենվելուն Երևանի համաձայնությունը, որն ամրագրվել է 2022թ. հոկտեմբերին Պրահայում կայացած գագաթաժողովի արդյունքներով արված հայտարարության մեջ, արմատապես փոխել է բանակցային գործընթացի տրամաբանությունը։ "Ալմա-Աթայի հռչակագրում հաստատվել է սահմանների անխախտելիությունը, որոնք գոյություն ունեին Խորհրդային Միության հանրապետությունների միջև։ Այն ժամանակ Լեռնային Ղարաբաղի Ինքնավար Մարզը Ադրբեջանական ԽՍՀ մաս էր կազմում։ Անշուշտ, այս հանգամանքը շատ դժվար է անտեսել Բաքվի և Երևանի միջև խաղաղ գործընթացում", - հավելել Է Զախարովան։
Միևնույն ժամանակ, ռուս դիվանագետը հիշեցրել է, որ 2022 թվականի դեկտեմբերի 23-ին Մոսկվայում նախատեսված էր Հայաստանի և Ադրբեջանի արտգործնախարարների հանդիպում՝ խաղաղության պայմանագրի շուրջ ։ "Դրան համաձայնություն էին տվել երկու երկրների առաջնորդները։ Ամեն ինչ պատրաստվել էր դրա անցկացման համար։ Բայց հենց Հայաստանի ղեկավարությունը վերջին պահին չեղարկեց Հայաստանի արտգործնախարար Ա.Ս. Միրզոյանի այցը։ Դա խանգարեց քննարկել ոչ միայն խաղաղության պայմանագիրը, այլև հայ-ադրբեջանական կարգավորման այլ հրատապ հարցեր, ներառյալ Լաչինի միջանցքի շուրջ ստեղծված իրավիճակը։ Եթե հայ գործընկերներն իսկապես շահագրգռված են նշված խնդիրները լուծել բարձր մակարդակի եռակողմ պայմանավորվածությունների համալիր իրականացման հունով, ապա սխոլաստիկայով զբաղվելու փոխարեն անհրաժեշտ է շարունակել համատեղ աշխատանքը ։ Խաղաղության պայմանագրի շուրջ հայ-ադրբեջանական բանակցությունների համար հարթակ տրամադրելու ռուսական առաջարկը մնում է ուժի մեջ", - ամփոփել է ՌԴ ԱԳՆ ներկայացուցիչը։
ԿԱՐԴԱԼ ԲՈԼՈՐ ՄԵԿՆԱԲԱՆՈՒԹՅՈՒՆՆԵՐԸ