Ուրուգվայի Սենատը բանաձև է ընդունել ի պաշտպանություն Արցախի՝ դատապարտելով Ադրբեջանի գործողությունները

Արմինֆո. Ուրուգվայի Սենատը միաձայն կողմ է քվեարկել բանաձևին, որով կոչ է արվում Ադրբեջանին կատարել իր միջազգային պարտավորությունները և ապահովել ազատ տեղաշարժը Արցախը Հայաստանին կապող միջանցքով ՝ այդպիսով վերջ դնելով բնակչության նկատմամբ ճնշումներին։

Ինչպես հաղորդում են լրատվամիջոցները, սենատորները հայտարարել են, որ դեկտեմբերի 12-ից ցամաքային Բերձոր/Լաչին միջանցքը ՝ Արցախը Հայաստանի ու արտաքին աշխարհի հետ կապող միակ ճանապարհը, մնում է արգելափակված, ինչի արդյունքում նրա ավելի քան 120 000 բնակիչներ մնում են ամբողջովին մեկուսացված ՝ զրկված սննդից, դեղորայքից և առաջին անհրաժեշտության իրերից: Այս իմաստով Ուրուգվայի օրենսդիրները հիշեցրել են, որ համաձայն 2020 թվականի նոյեմբերի 9-ին Ադրբեջանի  և Ռուսաստանի Դաշնության նախագահների և Հայաստանի վարչապետի կողմից ստորագրված եռակողմ հայտարարության մեջ միջանցքը գտնվում է Ռուսաստանի Դաշնության խաղաղապահ ուժերի վերահսկողության ներքո, և ադրբեջանական կողմը երաշխավորում է քաղաքացիների, տրանսպորտային միջոցների և բեռների անվտանգ տեղաշարժը երկու ուղղություններով ։

Ցամաքային շրջափակման եւ Արցախից երկինք բարձրանալու փորձի դեպքում ցանկացած ինքնաթիռ խոցելու սպառնալիքի հետևանքով առաջացած հումանիտար ճգնաժամին դեմ հանդիման Սենատը Ադրբեջանի իշխանություններին կոչ է անում կատարել իրենց միջազգային պարտավորությունները և ապահովել ազատ տեղաշարժը Արցախը Հայաստանին կապող միջանցքով ՝ վերջ դնելով քաղաքացիական բնակչության նկատմամբ ճնշումներին; դատապարտում է Հայաստանից Արցախ գազամատակարարման կանխամտածված դադարեցումը Ադրբեջանի վերահսկողության տակ գտնվող տարածքը հատող հատվածում, որը դեկտեմբերի 13-16-ն ընկած ժամանակահատվածում բնակչությանը եւ քաղաքացիական ենթակառուցվածքներին, ինչպիսիք են դպրոցներն ու հիվանդանոցները, զրկել էր ջեռուցման համար էներգիայի հիմնական աղբյուրից՝ ցուրտ ձմեռային եղանակային պայմաններում;  համերաշխությունն է հայտնում Արցախի ժողովրդին, որի մարդու իրավունքները պետք է հարգվեն հակամարտության կարգավորման գործընթացի բոլոր մասնակիցների կողմից։