Արայիկ Հարությունյան. Արցախին անհրաժեշտ են անվտանգության ավելի հիմնարար երաշխիքներ

Արմինֆո.Պետք է հաշվի առնել, որ ռուսական խաղաղապահ առաքելության ժամկետը մինչև 2025 թվականն է, ուստի Արցախին անհրաժեշտ են անվտանգության ավելի հիմնարար երաշխիքներ։ Այդ մասին France 24 հեռուստաալիքի հարցազրույցում հայտարարել է Արցախի Հանրապետության նախագահ Արայիկ Հարությունյանը։

Նրա խոսքով՝ անհրաժեշտ է հարգել Արցախի ժողովրդի ինքնորոշման իրավունքը, որը անկախության ճանապարհ է։ "Այդ իրավունքը, որպես ազգերի ինքնորոշման սկզբունք, միջազգային մակարդակով պաշտպանված է ՄԱԿ-ի բանաձեւերով, եւ մենք պայքարելու ենք մինչեւ վերջ։ Արցախի Հանրապետությունն օրինական հիմքերով ընտրել է ինքնորոշման ուղին, որին աջակցում է Արցախի բնակիչների բացարձակ մեծամասնությունը, և այդ իրավունքը, Արցախի ժողովրդի անկախությունը սակարկության առարկա չէ", - ասել է նա։ Հանրապետության նախագահը հայտարարել է, որ այսօր արցախահայության ճակատագիրը վտանգված է: "Ցեղասպանություն թե էթնիկ զտումներ՝ մեզ համար մեծ տարբերություն չկա, եթե մենք ստիպված լինենք լքել Արցախը, մեզ համար դա հավասարազոր է կոտորածի։ Հազարամյակներ շարունակ մենք ապրել ենք մեր հողի վրա եւ ցանկանում ենք այնտեղ ապրել, դա մեր իրավունքն է։ Սակայն ադրբեջանական կողմի չդադարող սադրանքները վկայում են ռազմական գործողությունների վերսկսման սպառնալիքի մասին, և Ադրբեջանին աջակցություն է ցուցաբերում Թուրքիան։ Ադրբեջանը միակողմանիորեն հրաժարվում է միջազգային ձևաչափով երկխոսությունից", - ասել է նա։ "Մենք շնորհակալ ենք և աջակցում ենք ֆրանսիացի խորհրդարանականների նախաձեռնություններին՝ ուղղված Արցախի Հանրապետության անկախության ճանաչմանը, և ակնկալում ենք քաղաքակիրթ աշխարհի աջակցությունը", - ընդգծել է Արցախի ղեկավարը:

Հիշեցնենք, որ Արցախի Հանրապետության նախագահ Արայիկ Հարությունյանի գլխավորած պատվիրակությունը դեկտեմբերի 5-ին աշխատանքային այցով մեկնել է Ֆրանսիայի Հանրապետություն: Դեկտեմբերի 6-ին պատվիրակությունը հանդիպումներ է ունեցել Սենատի բոլոր խորհրդարանական խմբերի ղեկավարների եւ Ֆրանսիայի Ազգային ժողովի բոլոր խմբակցությունների պատասխանատուների հետ: