Արմինֆո. Հայաստանում ԱՄՆ դեսպանի թեկնածու Քրիստինա Քվինն ասել է, որ ինքը "պարտավորվում է սերտորեն համագործակցել Սենատի արտաքին հարաբերությունների հանձնաժողովի եւ Կոնգրեսի անդամների հետ 'ՀՀ-ում ԱՄՆ շահերի առաջ մղման համար", եթե հաստատվի այդ պաշտոնում: Ինչպես հաղորդում է Ամերիկայի հայկական համագումարը, այդ մասին Քվինը հայտարարել է Սենատի միջազգային հարաբերությունների կոմիտեում իր թեկնածության հաստատման շուրջ լսումների ժամանակ:
Բացելով այս հարցի շուրջ քննարկումը՝ կոմիտեի նախագահ Բոբ Մենենդեսը հայտարարել է, որ Քրիստինա Քվինը նշանակվում է Հայաստանում ԱՄՆ դեսպան՝ երկրի համար բարդ պահին։ "Մենք տեսել ենք Ադրբեջանի կողմից վերջերս կատարված հարձակումները, տեսագրությունները այն բանի, ինչը թվում է պատերազմական հանցագործություններ, ինչպես նաեւ Լեռնային Ղարաբաղում պատերազմի հետեւանքով առաջացած վաղեմի հումանիտար ճգնաժամը", - հայտարարել է Մենենդեսը: Նա ընդգծել է, որ "անհավատալիորեն հիասթափված է" Պետդեպարտամենտի պատասխաններից նոյեմբերի 16-ի լսումների ժամանակ, եւ, ուղղակիորեն դիմելով Քվինին, ասել է, որ դա իր "պատասխանատվությունն է, որպեսզի ամերիկացի ժողովուրդը այլ կողմ չնայի, երբ մենք բացահայտում ենք մարդու իրավունքների, Հայաստանի դեմ կատարված խախտումների եւ վայրագությունների մասին տեղեկությունները":
Իր հերթին՝ Քվինը խոստացել է աշխատել կոմիտեի հետ՝ Հայաստանի ժողովրդավարության, անվտանգության եւ տնտեսության ամրապնդման համար: «Ես նույնպես կշարունակեմ իմ նախորդի (դեսպան Լին Թրեյսիի) ջանքերը՝ աջակցելու Հայաստանի հակակոռուպցիոն նախաձեռնություններին, քաղաքացիական հասարակությանը, անկախ լրատվամիջոցներին, բիզնեսի զարգացմանը, տարածաշրջանային ինտեգրմանը և հակազդմանը չարամիտ ազդեցությանը", - ասել է Քվինը, վստահեցնելով, որ կաշխատի նաև հայերի հետ՝ օգնելու "ամրապնդել անաչառ, անկախ դատական համակարգը և պաշտպանել խոսքի ազատության նկատմամբ հարգանքը"։
Ինչ վերաբերում է հայ-ադրբեջանական հակամարտությանը, Քվինն ասել է, որ խաղաղ կարգավորումն "անհրաժեշտ է Հայաստանի եւ Հարավային Կովկասի ավելի անվտանգ եւ բարգավաճ ապագայի համար, հակամարտության կարգավորումը ՄԱԿ-ի կանոնադրության եւ Հելսինկյան Եզրափակիչ ակտի սկզբունքների հիման վրա":
Այնուհետև Քուինը հավելել է, որ մեծացել է Ֆրեզնոյում (Կալիֆորնիա), որտեղ բնակվում է ԱՄՆ խոշորագույն հայ համայնքներից մեկը, և իր "հայկական ժառանգության ուսուցիչներից և ընկերներից" իմացել է Հայոց ցեղասպանության մասին: "Եվ եթե դա հաստատվի, ես պարտավորվում եմ անել ամեն ինչ՝ ուժերիս ներածի սահմաններում, որպեսզի հիշեմ Հայոց ցեղասպանության զոհերի մասին, աջակցեմ հայերի խաղաղ ապագային եւ խրախուսեմ Հայաստանի եւ Թուրքիայի միջեւ հարաբերությունների կարգավորման շուրջ ընթացող բանակցությունները", - նշել է դիվանագետը:
Մենենդեսն իր դժգոհությունն է հայտնել Պետդեպարտամենտից, քանի որ նրանք կոչ են անում "բոլոր կողմերին", նույնիսկ այն դեպքում, երբ մի կողմն ագրեսոր է, երբ Ադրբեջանը ներխուժում է Հայաստան:
Սենատոր Քրիս Վան Հոլենն, իր հերթին, փաստել է, որ սեպտեմբերին մամուլի անկախ աղբյուրները շատ լավ փաստագրել են, որ Ադրբեջանը վայրագություններով ուղեկցվող հարձակումներ է կատարել։ Դիմելով Քվինին ՝ սենատոր Վան Հոլլենը հայտարարել է, որ վստահության արժանի միջնորդ լինելու համար, իր կարծիքով, պետք է, առնվազն, սկսել փաստերից եւ հրապարակայնորեն շարադրել դրանք։ "Դուք մեկնելու եք շատ կարեւոր երկիր՝ աշխարհի շատ կոնֆլիկտային մասում, եւ ես հույս ունեմ, որ դուք կկարողանաք փաստերն իրենց անուններով կոչել, երբ տեսնեք դրանք", - նշել է նա: Նախագահ Մենենդեսը հարցրել է Քուինին, եթե նա հաստատվի ,արդյոք նա "կգլխավորի դեսպանատան ջանքերը ՝ աջակցելու Ադրբեջանի կողմից հայերի դեմ իրականացված ենթադրյալ վայրագությունների փաստաթղթերին այս վերջին ագրեսիայի ժամանակ, ներառյալ ՝ ադրբեջանական զորքերի կողմից անզեն հայերի գնդակահարությունը, հայ զինվորների մահապատիժը և հայ կին զինվորի խեղումը":
Քվինը հաստատել է, որ տեսել է "սարսափելի տեսանյութերը" և "կանի հնարավորը, որպեսզի օգնի հայերի ցանկացած խնդրանքին՝ փաստաթղթավորել տեսանյութը"։
Շարունակելով պնդել՝ նախագահ Մենենդեսն ասել է, որ ինքը չի ցանկանում, որ հարցումները բխեն հայերից, այլ, փոխարենը՝ որպեսզի ԱՄՆ-ն ակտիվորեն որոշումներ կայացնի, երբ գործը հասնում է կարեւոր որոշումներին, ինչպիսիք են Ազատության աջակցության մասին օրենքի 907-րդ հոդվածի մշտական մերժումը: <Մենք պետք է իմանանք, արդյոք Ադրբեջանը կատարում է այդպիսի գործողություններ, որպեսզի մենք կարողանանք որոշել, թե արդյոք պետք է հրաժարվել 907 ուղղումից", - ասել է նախագահ Մենենդեսը։ <Ինձ պետք է դեսպան, ով ակտիվորեն կօգնի մեզ պարզել, թե արդյոք այդ խեղումներն ու մահապատիժները ճշմարիտ են, և կարողանա այդ մասին հաղորդել Պետական դեպարտամենտին և այս կոմիտեին, որպեսզի մենք, որպես քաղաքական գործիչներ, կարողանանք որոշում կայացնել: Արդյո՞ք կարող եմ հույս ունենալ, որ դուք դա կանեք", - հարցրել է սենատորը։ Ինչին ի պատասխան՝ Քվինը հայտարարել է, որ իր համար
"շատ կարեւոր է պատասխանատվությունը նման հանցագործությունների համար", եւ ինքը վստահ կլինի, որ պատասխանատվություն կլինի։ Քվինը նաև հաստատել է, որ պարտավորվում է գնահատել 2020 թվականի արցախյան պատերազմի հետևանքով տեղահանված 100.000 հայերի կարիքները և այն մարդկանց ընթացիկ կարիքները, ովքեր դեռևս բնակվում են տարածաշրջանում։