Հայաստանի համար ընդունելի են Լեռնային Ղարաբաղի վերաբերյալ ռուսական նախագծով առաջարկվող մոտեցումները. Փաշինյան

Արմինֆո.Հայաստանի համար շատ կարևոր է Լեռնային Ղարաբաղում ռուս խաղաղապահների պատասխանատվության գոտուց ադրբեջանական զորքերի դուրս բերման հարցը, ուր նրանք ներխուժել են 2022 թվականի մարտին՝ հակառակ բարձրագույն մակարդակի պայմանավորվածությունների։ Այդ մասին հոկտեմբերի 31-ին Սոչիում ՌԴ նախագահ Վլադիմիր Պուտինի հետ հանդիպման ժամանակ հայտարարել է ՀՀ վարչապետ Նիկոլ Փաշինյանը։

"Անցած շաբաթ Վալդայյան բանավիճային ակումբի հարթակում Դուք անդրադարձաք Հայաստանի և Ադրբեջանի միջև հնարավոր խաղաղության պայմանագրի հարցին, ընդգծելով այդ գործընթացի որոշ կարևոր պարամետրեր, որոնք առնչվում են Լեռնային Ղարաբաղին, պնդելով, որ կաջակցեք այն սկզբունքների ընտրությանը, որոնց օգտին կարտահայտվի հայկական կողմը", - ասել է Փաշինյանը:

ՀՀ վարչապետը նաև նշել է, որ Հայաստանի համար ընդունելի են Լեռնային Ղարաբաղի վերաբերյալ ռուսական հիմնարար սկզբունքների նախագծով առաջարկվող մոտեցումները և Հայաստանի ու Ադրբեջանի միջև միջպետական հարաբերությունների հաստատման պարամետրերը: "Հուսով եմ, որ կաջակցեք այդ փաստաթղթին հղում անելու առաջարկին՝ այսօրվա եռակողմ հանդիպման արդյունքներով հնարավոր եռակողմ հայտարարության տեքստում։ Հայաստանն առաջարկել է դա, բայց մինչ այժմ մենք չունենք հաստատում, որ ռուսական կողմը պաշտպանում է այդ առաջարկը։ Դա ոչ մի կերպ չի հակասում այն համաձայնություններին, որոնք ձեռք են բերվել Պրահայում 2022 թվականի հոկտեմբերի 6-ին։ Պրահյան բանակցությունների ընթացքում կողմնորոշվել է Լեռնային Ղարաբաղի վերաբերյալ Ձեր հրապարակային հայտարարություններին", - նշել է ՀՀ կառավարության ղեկավարը։

Հայաստանի կառավարության ղեկավարը հույս է հայտնել նաեւ Լեռնային Ղարաբաղում ռուս խաղաղապահների պատասխանատվության գոտում ադրբեջանական զինված ուժերի հարցի լուծման համար: