Արմինֆո. Մեզ չեն կարող չանհանգստացնել Անդրկովկասում թափ հավաքող տագնապալի միտումները, ուր Արևմուտքն ակնհայտորեն փորձում է տեղափոխել Ուկրաինայում մշակված առճակատման սխեմաները։ Այդ մասին հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան՝ ի պատասխան Հայաստանի եւ հայ-ադրբեջանական կարգավորման շուրջ տեղի ունեցող գործընթացները մեկնաբանելու խնդրանքի։
"Տեսնում ենք, թե դրսից ինչպիսի աննախադեպ ճնշման է ենթարկվում եղբայրական Հայաստանը։ Ձգտելով վնաս հասցնել մեր երկրների և ժողովուրդների միջև դարավոր կապերին՝ քայլեր են ձեռնարկվում տարածաշրջանում Ռուսաստանի քաղաքականությունը վարկաբեկելու ուղղությամբ։ Վաշինգտոնի և Բրյուսելի հրահանգով գործող բազմաթիվ հիմնադրամներ, ՀԿ - ներ և ԶԼՄ-ներ կրկնակի ուժով ձգտում են հասարակության մեջ հակառուսական տրամադրություններ սերմանել", - նշել է նա, համոզմունք հայտնելով, որ Մոսկվային ու Երեւանին գժտեցնելու արտաքին ուժերի փորձերը հաջողությամբ չեն պսակվելու։
"Տրամադրված ենք Հայաստանի հետ ռազմավարական դաշնակցության և բազմակողմ համագործակցության ամրապնդմանը, ինչը թույլ կտա մեզ միասնաբար հաղթահարել ներկայիս մարտահրավերները։ Մեզ մոտ ռազմաքաղաքական և ռազմատեխնիկական գծերի շուրջ երկխոսություն է զարգանում։ Ապրանքաշրջանառությունն աճում է ռեկորդային տեմպերով։ Իրականացվում և մշակվում են լուրջ նախագծեր տրանսպորտային, ենթակառուցվածքային, հանքարդյունաբերության, բարձր տեխնոլոգիական ոլորտներում ։ Ռուսական տասնյակ խոշոր ընկերություններ պատրաստ են հետագայում ևս ներդրումներ կատարել Հայաստանի տնտեսության մեջ ։ Հաջողությամբ լուծում ենք հանրապետության էներգետիկ և պարենային անվտանգության ամրապնդման խնդիրները ։ Գիտական, կրթական և մշակութային ոլորտներում պահպանվում են ճյուղավորված շփումներ։ Երևանին զգալի օգուտներ է բերում մասնակցությունը ԵԱՏՄ-ին", - ուշադրություն է հրավիրել ՌԴ ԱԳՆ ներկայացուցիչը։
Միևնույն ժամանակ, նա ընդգծել է, որ նկատելի է նաև Արևմուտքի անթաքույց մոտեցումը հայ-ադրբեջանական հարաբերությունների կարգավորման նկատմամբ։ "Հաշվի չեն առնվում ոչ տարածաշրջանային առանձնահատկությունները, ոչ էլ խնդիրների հատուկ զգայունությունը։ Վաշինգտոնի եւ Բրյուսելի իրական նպատակները ոչ թե փոխզիջումային եւ հավասարակշռված լուծումների մշակումն է, այլ ինքնագովազդը եւ Անդրկովկասից Ռուսաստանի դուրս մղումը։ Մեր եռակողմ մշակումները յուրացվում և այլասերվում են։ Հաճախակի է դարձել արևմտյան էմիսարների մուտքը Հայաստան՝ Եվրոպական միության, ԵԱՀԿ-ի, Ֆրանսիայի ցուցանակների ներքո։ Առաջ են մղվում հապճեպ պատրաստված նախաձեռնություններ, որոնք հաշվի չեն առնում տարածաշրջանի ողջ բնակչության շահերը։ Դա հղի է հավասարակշռության խախտմամբ, որը բարդ պայմաններում ձեռք է բերվել Ռուսաստանի, Ադրբեջանի եւ Հայաստանի ղեկավարների 2020 թվականի նոյեմբերի 9 - ի պայմանավորվածությունների հիման վրա", - հավելել է Զախարովան։ Նրա խոսքով ՝ զուգահեռաբար շրջանառվում են մերկապարանոց մեղադրանքներ այն մասին, որ Մոսկվան, իբր, չի կատարում Հայաստանի հանդեպ անվտանգության ոլորտում իր պարտավորությունները։ Զախարովան այդ առնչությամբ հիշեցրել է, որ հենց Ռուսաստանն է դադարեցրել պատերազմը 2020թ. նոյեմբերին, խաղաղապահներ է ուղարկել, որոնք խաղաղություն եւ կայունություն են բերել տարածաշրջան եւ առ այսօր վճռորոշ ներդրում է կատարում Բաքվի եւ Երեւանի միջեւ զինված միջադեպերի կարգավորման գործում: "Իսկ ռուսական խաղաղապահ զորախմբի դուրսբերմանը հասնելու արտաքին ուժերի փորձերը ուղղված են հենց Հարավային Կովկասի ապակայունացմանը։ Բոլոր մակարդակներում շարունակում ենք աշխատել գործընկերների հետ՝ ի շահ Ադրբեջանի և Հայաստանի միջև հարաբերությունների համակողմանի կարգավորման՝ ներառյալ տրանսպորտային հաղորդակցությունների ապաշրջափակումը, սահմանի սահմանազատումը, խաղաղության պայմանագրի համաձայնեցումը, հումանիտար խնդիրների լուծումը, հասարակական և փորձագիտական երկխոսության հաստատումը ։ Միաժամանակ, խաղաղության հասնելու համար անհրաժեշտ է երկու կողմերի քաղաքական կամքն ու համաձայնությունը",- նշել է ռուս դիվանագետը։
Վերջում նա տեղեկացրել է, որ Ռուսաստանի նախագահ Վլադիմիր Պուտինը Ադրբեջանի նախագահ Իլհամ Ալիևին և Հայաստանի վարչապետ Նիկոլ Փաշինյանին հրավիրել է Ռուսաստան՝ մասնակցելու հերթական եռակողմ գագաթնաժողովին, որի ընթացքում նախատեսվում է քննարկել եռակողմ և երկկողմ հարցերի ողջ համալիրը։