Փաշինյանն ակնկալում է Ադրբեջանի համագործակցությունն անհետ կորածների ճակատագրերը պարզելու գործում

Արմինֆո.ՀՀ վարչապետ Նիկոլ Փաշինյանը հրապարակել է արցախյան առաջին և երկրորդ պատերազմների, ինչպես նաև 2022 թվականի սեպտեմբերի 13-ին Հայաստանի դեմ Ադրբեջանի ագրեսիայի հետևանքով անհետ կորածների թիվը, հույս հայտնելով, որ Ադրբեջանը կհամագործակցի անհետ կորածների ճակատագրերը պարզելու ուղղությամբ։

«Լեռնային Ղարաբաղում առաջին պատերազմի հետևանքով անհետ կորել է 777 հայ, Լեռնային Ղարաբաղում երկրորդ պատերազմի հետևանքով՝ 217, իսկ սեպտեմբերի 13 - ին Հայաստանի դեմ Ադրբեջանի ագրեսիայի արդյունքում՝ 29 մարդ: Հուսով ենք, որ Ադրբեջանը կհամագործակցի մեր հայրենակիցների ճակատագրերը պարզելու հարցում", - Twitter-ի իր էջում գրել է Փաշինյանը։

Հիշեցնենք, որ հոկտեմբերի 14-ին Աստանայում կայացած ԱՊՀ մասնակից պետությունների ղեկավարների խորհրդի նիստում Հայաստանի վարչապետը հայտարարել էր, որ Ադրբեջանը փորձում է ռազմագերիների, գերիների և ձերբակալված այլ անձանց վերադարձը պայմանավորել Լեռնային Ղարաբաղի առաջին պատերազմի հետևանքով անհետ կորած անձանց ճակատագրի պարզաբանմամբ: "Հայաստանն արդեն միակողմանիորեն թաղման վայրերի մի քանի քարտեզ է փոխանցել, իսկ 44 - օրյա պատերազմից հետո ՝ առաջին Լեռնային Ղարաբաղի պատերազմի զոհերի հարյուրից ավելի մասունքներ։ Ցավոք, ադրբեջանական կողմը, որը 30 տարվա ընթացքում մերժել է ականազերծման կամ որևէ այլ մարդասիրական գործունեության ոլորտում համագործակցության առաջարկները, իր անհետ կորած քաղաքացիների կամ ականների մասին հիշել է միայն Լեռնային Ղարաբաղի դեմ ագրեսիայից և այն բանից հետո, երբ ողջ քաղաքակիրթ աշխարհը սկսել է խոսել ադրբեջանական զինվորականների կողմից իրականացված ռազմական հանցագործությունների կամ Ադրբեջանում որպես պատանդ ապօրինի պահվող հայ ռազմագերիների մասին: Առանց մանրամասների մեջ մտնելու, միայն այդ փաստը հստակ ցույց է տալիս Ադրբեջանի իրական մտադրությունները", - ասել էր վարչապետը։ Այս համատեքստում Փաշինյանն ընդգծել էր, որ մինչ այժմ Ադրբեջանը խոչընդոտում է վերջին ագրեսիայի ժամանակ զոհվածների մարմինների դուրս բերմանը, և մարմինները շարունակում են գտնվել միջդիրքային գոտիներում, որոնք գտնվում են Հայաստանի ինքնիշխան տարածքում: