Միրզոյանը Բայրամովի և Լավրովի հետ հանդիպման ժամանակ ընդգծել է ՀՀ ինքնիշխան տարածքից ադրբեջանական զորքերի դուրսբերման անհրաժեշտությունը

Արմինֆո. Հոկտեմբերի 14-ին Աստանայում տեղի է ունեցել Հայաստանի, Ռուսաստանի ու Ադրբեջանի ԱԳ նախարարների հանդիպումը։

Հայաստանի ԱԳՆ մամուլի ծառայության հաղորդման համաձայն, կողմերը քննարկել են 2020թ. նոյեմբերի 9-ի, 2021թ. հունվարի 11-ի և նոյեմբերի 26-ի եռակողմ հայտարարություններով ձեռք բերված պայմանավորվածությունների կատարման ընթացքը, անդրադարձ կատարել սահմանազատման և սահմանային անվտանգության հարցերով հանձնաժողովների շրջանակներում, տարածաշրջանում տնտեսական կապերի և տրանսպորտային ենթակառուցվածքների ապաշրջափակման ուղղությամբ տարվող աշխատանքներին։Հանդիպման ընթացքում մտքեր են փոխանակվել Հայաստան-Ադրբեջան խաղաղության պայմանագրի մշակման, Լեռնային Ղարաբաղի հիմնահարցի կարգավորման շուրջ:

Արարատ Միրզոյանն ընդգծել է ՀՀ ինքնիշխան տարածքից ադրբեջանական զորքերի դուրսբերման, բոլոր հայ ռազմագերիների անհապաղ ազատ արձակման և հրադադարի ռեժիմի անվերապահ պահպանման անհրաժեշտությունը։ Կարևորվել է սահմանային իրավիճակի մշտադիտարկման ու վերահսկման միջազգային մեխանիզմների ներդրումը՝ նոր ագրեսիաները կանխարգելելու նպատակով։

Մինչդեռ, ըստ ադրբեջանական արտաքին քաղաքական գերատեսչության, Ջեյհուն Բայրամովը հանդիպման ժամանակ հիշեցրել է, որ նման ձևաչափով վերջին հանդիպումը տեղի է ունեցել այս տարվա մայիսին Դուշանբեում, և նշել, որ ներկայիս հանդիպումը լավ հնարավորություն է քննարկելու Դուշանբեից հետո ձեռք բերված առաջընթացը: Մասնավորապես, նա տեղեկացրել է, որ հոկտեմբերի 2-ին Ժնևում տեղի է ունեցել երկկողմ հանդիպում խաղաղության համաձայնագրի շուրջ, որի ընթացքում Ադրբեջանը Հայաստանին ներկայացրել է խաղաղության համաձայնագրի հիմնական տարրերը, և սպասվում է Հայաստանի պատասխանը այդ տարրերին ։ Հաշվի առնելով, որ խաղաղության համաձայնագրի հիմնարար սկզբունքները ներկայացվել են Ադրբեջանի կողմից այս տարվա փետրվարին, իսկ Պրահայում կայացած քառակողմ հանդիպման արդյունքում Ադրբեջանն ու Հայաստանը պայմանավորվել են միմյանց տարածքային ամբողջականության և ինքնիշխանության փոխադարձ ճանաչման և հարգանքի մասին, ինչը խաղաղության համաձայնագրի հիմքն է, ընդգծվել է, որ դա ընկալվում է որպես առաջընթաց համաձայնագրի ստորագրման ուղղությամբ: Բայրամովը նշել է, որ կարեւոր է գործնական աշխատանք սկսել հաղորդակցությունների բացման ուղղությամբ ՝ եռակողմ աշխատանքային խմբում բանակցությունների ընթացքում ձեռք բերված առաջընթացի հիման վրա: Հաղորդվում է, որ սահմանազատման հանձնաժողովներն արդեն ստեղծվել են, այս պահին երկու նիստ է անցկացվել ։ Տեղեկացվել է, որ երրորդ հանդիպումը նախատեսվում է անցկացնել առաջիկայում: Հայտարարվել է, որ Ադրբեջանը կողմ է այդ գործընթացում կոնկրետ ուղղություններով աշխատանքներ իրականացնելուն։ Նա ուշադրություն է հրավիրել եռակողմ հայտարարությունների համալիր իրականացման կարևորությանը, սակայն լռել է այն մասին, որ հենց Ադրբեջանն է տորպեդահարում այդ պայմանավորվածությունների հիմնարար սկզբունքների կատարումը։ Հիշեցնենք, որ հանդիպումը տեղի է ունեցել ռուսական կողմի նախաձեռնությամբ։