Արմինֆո. Ադրբեջանի նոր ներխուժումը Հայաստանի ինքնիշխան տարածք պետք է դադարեցվի եւ դատապարտվի։ Այդ մասին Twitter-ի իր միկրոբլոգում գրել է ՀՀ վարչապետ Նիկոլ Փաշինյանը։
Նրա գրառման համաձայն, նոր հարձակման հետևանքով զոհվել է երեք հայ զինվոր։ "Սա հարձակում է Հայաստանի անկախության, ինքնիշխանության և ժողովրդավարության վրա։ Ադրբեջանական ներխուժումը պետք է դադարեցվի եւ դատապարտվի", - նշել է Հայաստանի կառավարության ղեկավարը:
Նախօրեին ՀՀ պաշտպանության նախարարությունը հաղորդագրություն էր տարածել, համաձայն որի, սեպտեմբերի 28-ին՝ ժամը 18:00-ից սկսած, Ադրբեջանի ԶՈւ ստորաբաժանումները, ականանետերի և խոշոր տրամաչափի հրաձգային զինատեսակների կիրառմամբ, կրակ են բացել հայ-ադրբեջանական սահմանի արևելյան ուղղությամբ տեղակայված մարտական դիրքերի ուղղությամբ: Հայկական կողմը դիմել է պատասխան գործողությունների: «Սեպտեմբերի 28-ի ժամը 22:00-ի դրությամբ իրադրությունը հայ-ադրբեջանական սահմանին հարաբերականորեն կայունացել է: Ադրբեջանական սադրանքի հետևանքով հայկական կողմն ունի 3 զոհ», - հաղորդել էր ՊՆ մամուլի ծառայությունը: