Պաշտպանության նախկին նախարար. ԶՈՒ-ում ծառայելը պետք է ողջունել եւ խրախուսել, ոչ թե հայրենիքին ծառայելուց ազատվելու համար «փրկագին» սահմանել

Արմինֆո.: Ներկայացված նախագիծը համահունչ է կառավարության եւ քաղաքական իշխանության «խաղաղության օրակարգին»։ Այդ մասին հայտարարել է ՀՀ պաշտպանության նախկին նախարար Դավիթ Տոնոյանը, մեկնաբանելով կառավարության նախաձեռնությունը, որն առաջարկել է 24 միլիոն դրամ վճարելու դեպքում պարտադիր զինվորական ծառայության ժամկետը կրճատել մինչեւ 4.5 ամիս` 2 տարվա փոխարեն։

«Անձամբ ես եւ Պաշտպանության նախարարությունը մշտապես դեմ ենք արտահայտվել նմանատիպ նախաձեռնություններին: Ինձ համար նախագծով առաջարկվող կարգավորումներն անընդունելի են։ ՀՀ զինված ուժերում ծառայելը պետք է ողջունել եւ խրախուսել, այլ ոչ թե հայրենիքին ծառայելուց ազատվելու համար «փրկագին» սահմանել: Հետաքրքիր է՝ պահպանվելու է արդյո՞ք թափանցիկությունն այն անձանց անունների մասով, ովքեր կվճարեն իրենց զավակներին առնվազն 1.5 տարվա զինված ուժերում ծառայության հետ կապված «զրկանքներից» ազատելու համար», - հայտարարել է Տոնոյանը, որի խոսքերը վկայակոչում է նրա փաստաբանական խումբը:

Անդրադառնալով շարունակվող դատական գործընթացին՝ նախկին նախարարը նշել է, որ գործը դատարան մուտքագրվելուց հետո նշանակվել են թվով 7 դատական նիստեր, որոնցից կայացել են ընդամենը 4-ը։ «Ընդհանուր առմամբ, անցած 8 ամիսների ընթացքում մոտ 8-9 ժամ դատական նիստ է տեղի ունեցել: Թեւե մտահոգված չեմ այն կապակցությամբ, որ քրեական գործն ուղարկվել է Հակակոռուպցիոն դատարան, չեմ կարող չարձանագրել, որ դատավոր Մանվել Շահվերդյանն այդ գործը Հակահոկոռուպցիոն դատարանին ենթակա լինելու մասին տեղյակ է եղել առնվազն 2021թ․ ապրիլից, երբ «Դատական օրենսգիրք» ՀՀ սահմանադրական օրենքում կայացվել է համապատասխան փոփոխությունը։ Իմ խորին համոզմամբ, դատավոր Մանվել Շահվերդյանը դիտավորյալ եւ մտածված կերպով այս ամիսների ընթացքում արհեստականորեն ձգձգել է դատական նիստերը, որպեսզի այս գործը իր «վրայից գցի»։ Դրա հետեւանքով ես եւ գործով անցնող մյուս անձինք ապօրինի կերպով մնացել ենք անազատության մեջ՝ առանց որեւէ իրավական հիմքի։ Ավելին, գործընթացը անհիմն ձգձգելով՝ դատավորը ինձ հնարավորություն չի տվել հերքելու մեղադրող կողմի այն պնդումը, որ իբր կարող եմ ճնշում գործադրել վկաների եւ դատավարության այլ մասնակիցների վրա։ Եվ դա այն պարագայում, որ հենց այդ մտացածին «մտավախությունն» է ինձ շուրջ մեկ տարի անազատության մեջ պահելու միակ «հիմնավորումը», - նշել է Տոնոյանը:

Հիշեցնենք, որ նախաքննությունը պաշտպանության նախկին նախարարին մեղադրում է ոչ պիտանի ավիացիոն հրթիռներ գնելու եւ 4,6 մլն դոլար յուրացնելու համար: Նա իր մեղքը չի ընդունում: Դավիթ Տոնոյանը գործով անցնում է որպես մեղադրյալ։