Արմինֆո.Ադրբեջանի զինված ուժերը մարտական անօդաչու թռչող սարքերի կիրառմամբ գրոհել են Արցախի պաշտպանության բանակի դիրքերը Լաչինի միջանցքում: Ինչպես հաղորդում են Արմինֆո-ի՝ իրավիճակին մոտիկից ծանոթ աղբյուրները, Լաչինի միջանցքում մարտեր են ընթանում, հայկական կողմն ունի վիրավորներ:
Հակառակորդի կորուստների քանակի մասին առայժմ ստույգ տեղեկություն չկա։ Ավելի վաղ Ադրբեջանի զինված ուժերը հայտարարել էին, թե, իբր, Արցախի ՊԲ ստորաբաժանումները կրակ են բացել ադրբեջանական դիրքերի վրա Լաչինի միջանցքում, ինչի հետևանքով զոհվել է մեկ ադրբեջանցի զինվորական:
Ինչպես ավելի վաղ հաղորդել էր ԱրմԻնֆո-ն, վկայակոչելով Արցախի պաշտպանության բանակը, օգոստոսի 1-ին, ժամը 09:00-ից սկսած, Արցախի Հանրապետության հյուսիսային և հյուսիս-արևմտյան սահմանագոտու մի շարք հատվածներում ադրբեջանական ստորաբաժանումները դիմել են սադրանքի՝ կատարելով շփման գիծը հատելու փորձեր, որոնք կասեցվել են ՊԲ ստորաբաժանումների ուժերով: «Հայկական կողմից կորուստներ չկան: Իրադրությունը շարունակում է մնալ լարված: Կատարվածի մասին հանգամանալից տեղեկատվություն է տրամադրվել ռուսական խաղաղապահ զորակազմի հրամանատարությանը», - ասվում է ԱՀ ՊՆ հաղորդագրությունում: Նաեւ հաղորդվում է, որմեկ զինծառայող հրազենային վնասվածք է ստացել, առողջական վիճակը բավարար է։
Մի շարք ԶԼՄ-ներ հաղորդել են, որ մարտեր են ընթանում նաեւ Հայաստանի հետ սահմանին՝ Սյունիքի եւ Գեղարքունիքի ուղղությամբ: Մինչդեռ, Հայաստանի ՊՆ-ում հերքել են այդ տեղեկությունները։ Այն ժամանակ ԱրմԻնֆո-ի՝ իրավիճակին ծանոթ աղբյուրները հաղորդել էին, որ հակառակորդին վերևից խնդիր է առաջադրված գրավել ԼՂՀ հյուսիս-արևմուտքում գտնվող բարձունքը։ Անմիջապես դեպքի վայր են մեկնել ռուս խաղաղապահները։ Ըստ ԱրմԻնֆո-ի աղբյուրների, թուրքական արտադրության «Բայրաքթար» անօդաչու սարքերը 4 անգամ խախտել են Արցախի օդային տարածքը: Իրավիճակը շարունակում էր լարված մնալ մինչ օրս։
Հավելենք նաև, որ այդպիսով Ադրբեջանը, ամենայն հավանականությամբ, փորձում է Հայաստանին ստիպել սկսել Լաչինի միջանցքի նկատմամբ այլընտրանքային երթուղու կառուցումը։