Արմինֆո.Դիլիջան քաղաքում բացվել է առաջին անասնաբուժական կլինիկան, որտեղ որակավորում ստացած անասնաբույժները կկարողանան ստերիլիզացնել հետազոտել կամ բուժել քաղաքի թափառող շներին։
«Զբոսաշրջության եւ քաղաքաշինության» (ТUF) բարեգործական հիմնադրամի մամուլի ծառայության հաղորդման համաձայն, ծրագիրը նախաձեռնել են Դիլիջանի գործարար համայնքը և «Ապրելու» բարեգործական հիմնադրամը։ Այն իրականացվել է «Զբոսաշրջության եւ քաղաքաշինության» (ТUF) բարեգործական հիմնադրամի կողմից՝ Դիլիջանի համանքապետարանի հետ համագործակցությամբ, Դիլիջանի բնակիչների և գործարար ոլորտի ներկայացուցիչների աջակցությամբ:
Լինելով Հայաստանի խոշոր համայնքներից մեկը և համարվելով ակտիվ զբոսաշրջային ուղղություն՝ Դիլիջանում այսօր հրատապ է մեծաթիվ թափառող շների խնդիրը, ինչն անհանգստացնում է քաղաքի բնակիչներին և հյուրերին:
«TUF հիմնադրամը, որի հիմնադիրը սոցիալական ձեռներեց Ռուբեն Վարդանյանն է, ավելի քան 10 տարի իրականացնում է մշակութային, կրթական և զբոսաշրջային ոլորտի զարգացման ծրագրեր Դիլիջանում։ Հիմնադրամը մշտապես ուշադրության կենտրոնում է պահում նաև համայնքային խնդիրները, փորձելով դրանք լուծել՝ համագործակցելով համայնքապետարանի հետ և ներգրավելով Դիլիջանի ակտիվ բնակիչների, գործարար համայնքի և Սփյուռքի ներուժը»,-ասում է «Զբոսաշրջության եւ քաղաքաշինության» (ТUF) բարեգործական հիմնադրամի տնօրեն Մարիետա Մաթեւոսյանը։
Նա հավելում է, որ շների ստերիլիզացիան ամբողջ աշխարհում ճանաչված է՝ որպես թափառող կենդանիների տարածումը նվազեցնող ամենամարդասիրական մեթոդ։ Ուստի կլինիկայի բացումից հետո ակնկալվում է, որ քաղաքը կդառնա ավելի անվտանգ և մաքուր, երեխաները, համայնքի բնակիչներն ու զբոսաշրջիկները այլևս չեն վախենա երեկոյան շրջել քաղաքում։ Ծրագրի շրջանակում նախատեսվում է նաև անցկացնել մի շարք դասախոսություններ երեխաների և դեռահասների համար՝ կենդանների նկատմամբ դաժան վերաբերմունքը կանխելու նպատակով։
Ակնկալվում է, որ, մինչև 2023 թ. փետրվարը կլինիկայում կստերիլիզացվի շուրջ 500 թափառող շուն։ Նախաձեռնության շրջանակում Դիլիջանում կբացվի նաև կենդանիների խնամքի պարագաների մասնագիտացված խանութ և կստեղծվի թափառող շների խնամակալների կամավորական խումբ։
«Զբոսաշրջության և քաղաքաշինության» (TUF) բարեգործական հիմնադրամը 2020 թ. հուլիսից ստանձնել է IDeA հիմնադրամի զբոսաշրջության և քաղաքաշինության զարգացմանը միտված բոլոր ծրագրերի իրականացումը: TUF հիմնադրամն իրագործում է ծրագրեր Գյումրիում, Դիլիջանում, Տաթևում, Արցախում և Երևանում։ Հիմնադրամը մշակում է զբոսաշրջային և քաղաքաշինական նորարարական ծրագրեր, խթանում տարածքային կայուն զարգացումը ու նպաստում համաշխարհային քարտեզի վրա Հայաստանի՝ որպես մրցունակ զբոսաշրջային երկրի դիրքավորմանը: TUF-ի հիմնադիրը բարերար և սոցիալական ձեռներեց Ռուբեն Վարդանյանն է:
ԿԱՐԴԱԼ ԲՈԼՈՐ ՄԵԿՆԱԲԱՆՈՒԹՅՈՒՆՆԵՐԸ