Ուրբաթ, 1 Հուլիսի 2022 13:13

Արմինֆո.ՀՀ ԱԺ «Քաղաքացիական պայմանագիր» խմբակցությունը ներկայացրել է նախագիծ ԱԺ պատգամավոր Իշխան Սաղաթելյանին՝ ԱԺ նախագահի տեղակալի պաշտոնից հետ կանչելու, ինչպես նաեւ ԱԺ պատգամավոր Վահե Հակոբյանի՝ Տնտեսական հարցերի մշտական հանձնաժողովի նախագահի լիազորությունների դադարեցման վերաբերյալ:

 

ԱԺ մամուլի ծառայության հաղորդման համաձայն, որոշման նախագծին կողմ է քվեարկել 66 պատգամավոր: ԱԺ 107 պատգամավորից քվեարկություններին մասնակցել է 66-ը: Այդ մասին հուլիսի 1-ին ԱԺ արտահերթ նստաշրջանում տեղեկացրել է ԱԺ հաշվիչ հանձնախմբի նախագահ Նարեկ Բաբայանը:

 

Այսօր ավելի վաղ ԱԺ «Հայաստան» ընդդիմադիր խմբակցության անդամ Իշխան Սաղաթելյանին Ազգային ժողովի նախագահի տեղակալի պաշտոնից հետ կանչելու վերաբերյալ ԱԺ որոշման նախագծի հիմնական զեկուցող Արուսյակ Ջուլհակյանը նշել էր, Իշխան Սաղաթելյանը 2022 թ. հունվարի 17-ից մինչեւ հունիսի 29-ը ներառյալ, այսինքն՝ 2022 թ. առաջին օրացուցային կիսամյակի նիստերի 342 քվեարկությունից ունեցել է 198 բացակա: ԱԺ խորհուրդը ձեւավորման պահից առայսօր գումարել է 25 նիստ, որից միայն 7-ին է ներկա եղել Իշխան Սաղաթելյանը: Այսինքն՝ Իշխան Սաղաթելյանը չի կատարել իր անմիջական պարտականությունները: Փոխխոսնակի հաճախակի բացակայությունների պատճառով անհնարին է դարձել նրան ԱԺ նախագահի կողմից հանձնարարություններ տալը եւ լիազորությունների պատվիրակումը, ինչի հետեւանքով նաեւ չեն իրացվել «Ազգային ժողովի կանոնակարգ» սահմանադրական օրենքով սահմանված դրույթները: Արուսյակ Ջուլհակյանը նաեւ ներկայացրել է ընդդիմության կազմակերպած հանրահավաքների ժամանակ Իշխան Սաղաթելյանի հնչեցրած վիրավորական, ինչպես նաեւ ատելություն սերմանող  արտահայտությունները եւ նրա կողմից բախումներ հրահրելու դեպքերը՝ երթերի ընթացքում: «ԱԺ նախագահի տեղակալ Իշխան Սաղաթելյանը չի կատարում եւ չի ցանկանում կատարել՝ որպես ՀՀ ԱԺ նախագահի տեղակալ՝ Սահմանադրությամբ եւ այլ  օրենքներով իրեն վերապահված գործառույթները: Վերոգրյալի հաշվառմամբ՝ «Քաղաքացիական պայմանագիր» խմբակցությունն ԱԺ պատգամավոր Իշխան Սաղաթելյանին ԱԺ նախագահի տեղակալի պաշտոնից հետ կանչելու վերաբերյալ ԱԺ որոշման ընդունմամբ նպատակ ունի հետագայում ընտրելու ԱԺ նախագահի՝ ընդդիմության կողմից առաջադրված այնպիսի տեղակալի, որը կկատարի իր պարտականությունները հավուր պատշաճի՝ ապահովելով Ազգային ժողովի բնականոն  գործունեությունը»,- ընդգծել էր զեկուցողը:

 

Ազգային ժողովի հուլիսի 1-ին հրավիրած արտահերթ նիստում քննարկվել էր նաեւ «Քաղաքացիական պայմանագիր» խմբակցության հեղինակած Հայաստանի Հանրապետության Ազգային ժողովի պատգամավոր Վահե Հակոբյանի՝ որպես Տնտեսական հարցերի մշտական հանձնաժողովի նախագահի լիազորությունների դադարեցման մասին ԱԺ որոշման նախագիծը: Հիմնական զեկուցող Ծովինար Վարդանյանը նշել էր, որ համաձայն «Ազգային ժողովի կանոնակարգ» օրենքի 138-րդ հոդվածի՝ մշտական հանձնաժողովների նախագահների եւ նրանց տեղակալների պաշտոններում պատգամավորների կազմից թեկնածուների առաջադրման իրավունքը խմբակցությունների միջեւ բաշխվում է Ազգային ժողովի առաջին նստաշրջանի բացման օրը` ըստ յուրաքանչյուր պաշտոնի համար ստացված գործակցի, որն էլ հաշվարկվում է համապատասխան բանաձեւով: Ծովինար Վարդանյանի խոսքով՝ Տնտեսական հարցերի մշտական հանձնաժողովի կարգավորման դաշտում են գործունեության այնպիսի կարեւոր ոլորտներ, ինչպիսիք են՝ հարկեր, տուրքեր, վճարներ, արդյունաբերություն, քաղաքաշինություն, էներգետիկա, բնական պաշարներ, տրանսպորտ, կապ, հեռահաղորդակցություն, ինտերնետ (համացանց), արտադրական ենթակառուցվածքի այլ ճյուղեր, զբոսաշրջություն, առեւտուր եւ ծառայություններ, ձեռնարկատիրական գործունեություն, պետական գույքի կառավարում, սակագներ, ներդրումներ, տնտեսական մրցակցություն, հակամենաշնորհ եւ այդ ոլորտները կարգավորող օրենքներ: «Ազգային ժողովի ութերորդ գումարման առաջին օրացուցային կիսամյակի ընդհանուր 342 քվեարկությունից Վահե Հակոբյանը չի մասնակցել 194-ին: Ազգային ժողովի ութերորդ գումարման ընթացքում հրավիրված 25 Խորհրդի նիստից բացակայել է 20 անգամ: Ազգային ժողովն ութերորդ գումարման ընթացքում ընդունել է 253 օրենք, որից 83-ի համար գլխադասային է եղել Տնտեսական հարցերի մշտական հանձնաժողովը: ՀՀ Ազգային ժողովի ութերորդ գումարման ընթացքում ԱԺ տնտեսական հարցերի մշտական հանձնաժողովը կազմակերպել է 27 հերթական եւ արտահերթ նիստ: Հանձնաժողովի նախագահը նիստերի նախապատրատման, կազմակերպման աշխատանքներին չի մասնակցել, չի նախագահել 11 նիստ, այնուհետեւ քարտուղարությանը հանձնվող վերոնշյալ թվով նիստերի օրակարգերը եւ արձանագրությունները նախագահի կողմից չեն ստորագրվել: Նրա կողմից չեն ստորագրվել նաեւ քարտուղարությանը հանձնվող օրակարգերի արձանագրությունները, հանձնաժողովում դրական եզրակացություն ստացած օրենքի նախագծերի եւ մի շարք այլ փաստաթղթեր»,-նշել է հիմնական զեկուցողը:

Պատգամավորն ընդգծել է՝ հաշվի առնելով, որ Հայաստանի Հանրապետությունը խորհրդարանական պետություն է, մշտական հանձնաժողովներն Ազգային ժողովի կարեւորագույն մարմին են եւ «Ազգային ժողովի կանոնակարգ» սահմանադրական օրենքի 10-րդ հոդվածի 1-ին մասի համաձայն՝ ստեղծվում են օրենքների նախագծերի, Ազգային ժողովի իրավասության մեջ մտնող այլ հարցերի նախնական քննարկման եւ դրանց վերաբերյալ Ազգային ժողով եզրակացություններ ներկայացնելու, ինչպես նաեւ խորհրդարանական վերահսկողություն իրականացնելու համար, հետեւաբար մշտական հանձնաժողովների նախագահների ընտրությունը կարեւորվել է այնքանով, որ չի թողնվել միայն խմբակցությունների հայեցողությանը, եւ մշտական հանձնաժողովի նախագահի թեկնածուն կարող է ընտրվել հանձնաժողովի նախագահ միայն պատգամավորների ձայների մեծամասնությամբ: «Ազգային ժողովի կանոնակարգ» սահմանադրական օրենքի 138-րդ հոդվածի 2-րդ մասի համաձայն՝ մշտական հանձնաժողովների նախագահների թեկնածուների առաջադրման իրավունքը պահպանվում է մինչեւ Ազգային ժողովի լիազորությունների ավարտը: Հետեւաբար, հաշվի առնելով վերոգրյալը, «Քաղաքացիական պայմանագիր» խմբակցությունն Ազգային ժողովի պատգամավոր Վահե Հակոբյանին՝ որպես Տնտեսական հարցերի մշտական հանձնաժողովի նախագահի լիազորությունների դադարեցման մասին Ազգային ժողովի որոշման ընդունմամբ նպատակ ունի հետագայում ընտրելու հանձնաժողովի նախագահի, ով կկատարի իր պարտականությունները հավուր պատշաճի` ապահովելով հանձնաժողովի բնականոն գործունեությունը, միաժամանակ կմասնակցի ԱԺ խորհրդի նիստերին, որտեղ «Ազգային ժողովի կանոնակարգ» սահմանադրական օրենքի 27-րդ հոդվածի 1-ին մասի համաձայն ի պաշտոնե ընդգրկված են մշտական հանձնաժողովներ, նախագահները»,- եզրափակել է Ծովինար Վարդանյանը: