Հինգշաբթի, 30 Հունիսի 2022 14:29

Արմինֆո.Բերձոր քաղաքի և Աղավնո գյուղի հարցը քննարկվում է Արցախի իշխանությունների հետ։ Այդ մասին հունիսի 30-ին ճեպազրույցի ժամանակ հայտարարել է Հայաստանի անվտանգության խորհրդի քարտուղար Արմեն Գրիգորյանը։

 

Նրա ասելով՝ դեռ ժամանակ կա նոր ճանապարհի եւ նշված բնակավայրերի բնակիչների վերաբնակեցման հարցում լուծումներ գտնելու համար։ Այդ խնդիրը լուծելու համար կա մոտ 1,5 տարի։ Արցախի ղեկավարության հետ բանակցությունների արդյունքում կկայացվեն ընդունելի որոշումներ։ Գրիգորյանը նշել է, որ Հայաստանի իշխանությունների առաջ քաշած "խաղաղության օրակարգի" շուրջ քննարկումներում խոսվել է նաեւ հնարավոր խնդիրների մասին: "Մենք գիտենք բոլոր դժվարությունների մասին, բայց գիտենք նաև, որ Հայաստանի և Արցախի անվտանգության ապահովման միակ երաշխիքը "խաղաղության օրակարգն է": Սակայն մենք նաև հասկանում ենք, որ այդ գործընթացը կախված է ոչ միայն Հայաստանից, և դա է պատճառը, որ մենք աշխատում ենք մեր բոլոր միջազգային գործընկերների հետ", - ասել է ԱԽ քարտուղարը։

 

Նշենք, որ Ադրբեջանն ակտիվորեն իրականացնում է այլընտրանքային ճանապարհի կառուցումը, որը Արցախը կկապի Հայաստանի հետ' շրջանցելով Բերձորը եւ Աղավնոն: Հունիսի 27-ին կայացած առցանց մամուլի ասուլիսի ժամանակ վարչապետ Նիկոլ Փաշինյանը նշել էր, որ 2020 թվականի նոյեմբերի 9-ի եռակողմ հայտարարությամբ նախատեսվում է Լաչինի միջանցքի երթուղու փոփոխություն՝ կողմերի համաձայնությամբ։ Նրա ասելով՝ երթուղու փոփոխության դեպքում տարածքները, որոնք չեն մտնում նախկին ԼՂԻՄ-ի սահմանների մեջ, կանցնեն Ադրբեջանի վերահսկողության տակ։ Վարչապետը հայտարարել է, որ Հայաստանի կառավարությունը կլուծի Բերձոր քաղաքի բնակիչներին բնակարաններով ապահովելու հարցը, իսկ Արցախի իշխանությունները նույն հարցը կլուծեն Աղավնո գյուղի բնակիչների համար։