Չորեքշաբթի, 29 Հունիսի 2022 16:36

Արմինֆո. Երեւանում Ռուսաստանի դեսպանատան մոտ քաշքշուք է տեղի ունեցել 2020թ. դեկտեմբերին Խծաբերդում Ադրբեջանի ԶՈՒ կողմից գերեվարված պահեստազորայինների հարազատների եւ ոստիկանների միջեւ:

 

Հարազատները եկել էին Ռուսաստանի դեսպանատան մոտ՝ պահանջելով գործնական քայլեր ձեռնարկել իրենց զավակներին ադրբեջանական գերությունից տուն վերադարձնելու ուղղությամբ։ Նրանք վրդովված են այն հանգամանքից, որ արդեն 1,5 տարի անարդյունք ստիպված են ճեղքել հայկական պետական կառույցների շեմերը։ Ընդ որում, նրանք համոզված են, որ իրենց զավակներին օգտագործում են որպես գործիք քաղաքական սակարկության համար։ Ծնողները նաեւ վրդովված են այն հանգամանքից, որ Ռուսաստանը չի կատարել իր միջնորդական պարտականությունները, եւ իրենց զավակներին գերի են վերցրել:

 

Ինչպես ավելի վաղ հաղորդել էր ԱրմԻնֆոն, դեռեւս Բաքվի բանտերում գտնվող հայ ռազմագերիներին շուտափույթ վերադարձնելու պահանջով համանման ակցիա էր անցկացվել հունիսի 28-ին Գյումրիում Ռուսաստանի գլխավոր Հյուպատոսության շենքի առջեւ: ՌԴ գլխավոր հյուպատոս Ռուսլան Կանդաուրովը հանդիպել էր ռազմագերիների հինգ ծնողների հետ, լսել էր նրանց և խոստացել նրանց պահանջը փոխանցել ՀՀ-ում Ռուսաստանի դեսպան Սերգեյ Կոպիրկինին։

 

Նշենք, որ ռազմագերիների ծնողների բողոքի ակցիայի առիթ է դարձել հունիսի 27-ին ՀՀ վարչապետ Նիկոլ Փաշինյանի առցանց մամուլի ասուլիսի ժամանակ արված հայտարարությունը: Նա, մասնավորապես, հայտարարել է, որ պաշտոնական Բաքուն փորձեր է ձեռնարկում վարկաբեկելու Լեռնային Ղարաբաղում ռուս խաղաղապահներին, եւ այդ պատճառով չի վերադարձնում ռազմագերիներին: Փաշինյանն ընդգծել է, որ այն անձանց 90 տոկոսը, որոնց գերեվարումը հաստատվել է, գերեվարվել են ռուս խաղաղապահների տեղակայումից հետո եւ նրանց պատասխանատվության գոտում, ինչի մասին հայկական կողմը բազմիցս խոսել է ռուս գործընկերների հետ հանդիպումների ժամանակ: Նա որպես օրինակ հիշատակել է նոյեմբերի 9-ի եռակողմ հայտարարության ստորագրումից հետո Խծաբերդում տեղի ունեցած դեպքը, երբ գերեվարվեց հայ զինծառայողների մեծ խումբ (62 պահեստազորային): Վարչապետը նշել է, որ Խծաբերդի դե յուրե տարածքը պետք է լիներ ռուս խաղաղապահների հսկողության տակ, սակայն տեղի են ունեցել փոփոխություններ։ Տեղաբաշխման դիրքերը մի քանի անգամ վերանայվել են քարտեզների հիման վրա: Փաշինյանը նշել է, որ Հայաստանը, Ռուսաստանը եւ միջազգային հանրությունը պետք է միջոցներ ձեռնարկեն բոլոր գերիներին վերադարձնելու համար: "Մենք հետևողական կլինենք, որ բոլորը վերադառնան հայրենիք", - ընդգծել է նա:

 

Հիշեցնենք, որ 2020 թվականի դեկտեմբերի 13-ին Լեռնային Ղարաբաղի Հադրութի շրջանի Խծաբերդ եւ Հին Թաղեր գյուղերի հատվածում գերեվարվել են Շիրակի մարզի 62 պահեստազորայիններ, որոնց կեսն արդեն վերադարձել է հայրենիք, իսկ մի մասը մինչ օրս գտնվում է Ադրբեջանում:

 

Հատկանշական է, որ ՀՀ վարչապետ Նիկոլ Փաշինյանը նախընտրական քարոզարշավի ընթացքում Արմավիրի մարզում ընտրողների հետ հանդիպման ժամանակ հայտարարել էր.  "Թող մեզ ներեն զինվորականները ևս մեկ կամ երկու ամիս գերության մեջ գտնվելու համար։ Բայց նրանք մեզ չեն ների, եթե մենք Հայաստանի անկախությունը զիջենք հանուն նրանց ազատ արձակման"։ Այն ժամանակ Փաշինյանը հավաստիացնում էր, որ ամենակարճ ժամկետում Բբլոր ռազմագերիները կվերադարձվեն, սակայն մեկ տարի անց այդ հարցը չի ստացել իր տրամաբանական լուծումը։

 

Հարկ է նշել, որ մինչ այժմ հայտնի չէ Ադրբեջանի կողմից Արցախի դեմ 2020թ. աշնանը սանձազերծված լայնածավալ ռազմական ագրեսիայից հետո ադրբեջանական գերության մեջ պահվող ռազմագերիների և քաղաքացիական անձանց ճշգրիտ թիվը։ Փորձագետների գնահատմամբ ՝ դրանք մի քանի հարյուր են ։ Բաքուն հաստատում է իր մոտ 38 հայերի առկայությունը ։ Հայ ռազմագերը և քաղաքացիական անձինք ենթարկվում են անմարդկային վերաբերմունքի և կտտանքների գերության մեջ։ Նրանցից շատերը շինծու քրեական գործերով դատապարտվել են երկարատև ազատազրկման։