Թուրքիան եւ Ադրբեջանը չեն հրաժարվում Սյունիքով "միջանցք ճեղքելու" փորձերից

Արմինֆո. Թուրքիան աջակցում է Ադրբեջանի եւ Հայաստանի միջեւ հարաբերությունների կարգավորմանը։ Այս մասին հայտարարել է Թուրքիայի արտգործնախարար Մևլութ Չավուշօղլուն՝ Ադրբեջանի, Թուրքիայի և Ղազախստանի արտաքին գործերի և տրանսպորտի նախարարների առաջին եռակողմ հանդիպումից հետո կայացած մամուլի ասուլիսի ժամանակ։

Ընդ որում, նա հավելել է, որ իրենք սպասում են "Զանգեզուրի միջանցքի" բացմանը (ՀՀ Սյունիքի մարզով - խմբ.), որը ամենակարճ ժամանակում կապ կապահովի Ադրբեջանի արևմտյան շրջանների հետ: Նրա խոսքով ՝ Սյունիքի մարզով հաղորդակցության բացումը շատ կարեւոր է նաեւ տարածաշրջանի երկրների զարգացման տեսանկյունից ։ Այս մասին հայտարարել է նաեւ Ադրբեջանի ԱԳ նախարար Ջեյհուն Բայրամովը։

Նշենք, որ Բաքվում Ադրբեջանի, Թուրքիայի եւ Ղազախստանի արտաքին գործերի եւ տրանսպորտի նախարարների առաջին եռակողմ հանդիպման շրջանակներում ստորագրվել է Բաքվի հռչակագիր, որում նախարարներն ընդգծել են նոր միջանցքների ամբողջական շահագործման անհրաժեշտությունը: "Դրանք կամրապնդեն կապերը տարածաշրջանում, ներառյալ երկաթուղային եւ ավտոմոբիլային միջանցքների ստեղծումը, որոնք արտացոլված են Ադրբեջանի, Հայաստանի եւ Ռուսաստանի 2020 թվականի նոյեմբերի 9/10-ի եւ 2021 թվականի հունվարի 11-ի եռակողմ հայտարարություններում: Նախարարները հայտարարել են Արեւելյան Զանգեզուրը եւ Նախիջեւանի Ինքնավար Հանրապետությունը որպես միջին միջանցքի հեռանկարային մաս կապող միջանցքի զարգացման կարեւորության մասին", - նշվում է փաստաթղթում, որը ներկայացնում են ադրբեջանական լրատվամիջոցները:

Նշենք, որ Մոսկվայում Ռուսաստանի, Ադրբեջանի եւ Հայաստանի նախագահներ Վլադիմիր Պուտինի, Իլհամ Ալիեւի եւ Նիկոլ Փաշինյանի բանակցություններից հետո Պուտինը հայտարարել է աշխատանքային խմբի ստեղծման մասին, որը կգլխավորեն երեք երկրների փոխվարչապետները: Խումբը զբաղվում է տարածաշրջանում տնտեսական, առեւտրային եւ տրանսպորտային կապերի ապաշրջափակման, սահմանների բացման հարցերով: Հունիսի 3-ին տեղի է ունեցել եռակողմ աշխատանքային խմբի 10-րդ նիստը, որը վարել է ՀՀ փոխվարչապետ Մհեր Գրիգորյանը, ՌԴ փոխվարչապետ Ալեքսեյ Օվերչուկը և Ադրբեջանի փոխվարչապետ Շահին Մուստաֆաևը: "Հայաստանը, Ռուսաստանը և Ադրբեջանը մոտեցրել են սահմանային և վերահսկողության այլ տեսակների, ինչպես նաև Հայաստանի և Ադրբեջանի տարածքով ավտոմոբիլային և երկաթուղային ճանապարհներով քաղաքացիների, տրանսպորտային միջոցների և բեռների անվտանգ երթեւեկությանը վերաբերող դիրքորոշումները։ Փոխվարչապետները քննարկել են Ադրբեջանի արեւմտյան շրջանների եւ Նախիջեւանի միջեւ Հայաստանի տարածքով տրանսպորտային հաղորդակցություն ապահովող ավտոմոբիլային ճանապարհի անցման հնարավոր ուղիները: Կողմերը կշարունակեն աշխատանքը տարածաշրջանում տրանսպորտային կապերի ապաշրջափակման վերաբերյալ Ռուսաստանի, Հայաստանի և Ադրբեջանի ղեկավարների պայմանավորվածությունների իրականացման ուղղությամբ", - ասված է հանդիպման արդյունքներով:

Հատկանշական է, որ Թուրքիան և Ադրբեջանը փորձում են Հայաստանի տարածքով ստանալ միջանցքային նշանակության ճանապարհ։ Մինչդեռ, պաշտոնական Երևանը բազմիցս հայտարարել է, որ "միջանցքային տրամաբանությամբ ճանապարհի մասին խոսք լինել չի կարող", այդ դիրքորոշումը պաշտպանել Է Ռուսաստանը, որը նշել է, որ հաղորդագրությունը գործելու է հայկական ինքնիշխանության ներքո: