Վերլուծաբան. Հայաստանում ՌԴ-ի հերթական ռազմակայանի ձեւավորումն ունի հեռահար աշխարհաքաղաքական խնդիրներ

Արմինֆո. Հարավային Կովկասում ռուսական զորախումբը լուծում է երեք հիմնական խնդիր։ Ապահովում է Հայաստանի անվտանգությունը թուրքական ուղղությամբ, լուծում է Արցախում խաղաղապահների ներկայության հետ կապված խնդիրները, և հիմա արդեն՝ Հայաստան - Ադրբեջան գծում սահմանային անվտանգության ապահովմանն առնչվող խնդիրները։ ԱրմԻնֆո-ին նման կարծիք է հայտնել անկախ վերլուծաբան Սարո Սարոյանը։

"Խոսքը հողային աշխատանքների, շինարարական տեխնիկայի առկայության, Բերդի շրջան ռուսաստանցի զինվորականների այցի մասին է։ Տեղի բնակիչների խոսքով՝ խնդիրներ կան այդ տարածքների պատկանելության հետ կապված։ Այդ պատճառով Բերդում ռուսական ռազմակայանի շինարարության հետ կապված իրավիճակն արդեն մեկ ամսից ավելի օդում կախված է։ Սակայն, դրա ձևավորման մտադրությունն իսկ խոսում է հայ-ադրբեջանական սահմանին և, ավելի լայն,  տարածաշրջանում տիրող իրավիճակի էության մասին", - կարծում է նա։

Տավուշի մարզի Բերդ քաղաքում ևս մեկ ռուսական ռազմակայան տեղակայելու ՀՀ կառավարության  որոշման մասին ավելի վաղ հաղորդել էր "Ժողովուրդ" թերթը։ Նաեւ, իբր, նախատեսվում են փոփոխություններ ռուսական խմբավորման կազմում, զինվորականների տեղակայման այլ կետերի փոխարինում։ Սակայն, բառացիորեն օրերս հանրապետության բարձրագույն ղեկավարության ներկայացուցիչներից մեկը, որը պատասխանատու է անվտանգության ապահովման համար, ԱրմԻնֆո-ին հայտարարել է նման լուրերի անհիմն լինելու մասին։ Նրա խոսքով՝ Բերդում ՌԴ ռազմակայանի ձեւավորման ուղղությամբ ոչ մի որոշակի քայլ չի ձեռնարկվում։

Այս իրավիճակի էությունը, ըստ վերլուծաբանի, կարելի է հասկանալ՝ ելնելով պոտենցիալ ռուսական բազայի աշխարհագրական դիրքից։ Այս լույսի ներքո՝ նա նշել է Բերդի դիրքը Հայաստանի և Ադրբեջանի միջև ու Վրաստանի եւ Իրանի միջև սահմանի հենց մեջտեղում։ Այսպիսով, հենց Բերդն է ամենահարմար կետը տվյալ հաղորդակցության գծի պահպանության, համապատասխանաբար, այդ սահմանի  ինչպես հյուսիսային, այնպես էլ հարավային ուղղությամբ ռուսական սահմանապահ ուղեկալների տարածման համար։

"ՌԴ-ին այդ ամենն անհրաժեշտ է սեփական քաղաքական և աշխարհաքաղաքական խնդիրները լուծելու համար։ Իհարկե՝ Հայաստանի անվտանգության ապահովման պատրվակով։ Ադրբեջանի հետ սահմանին ռուս զինվորականների ներկայությունը Մոսկվային հաղթաթուղթ է տալիս ապագա հարաբերություններում, ավելի ճիշտ, սակարկությունում Անկարայի հետ, որը հայ-ադրբեջանական սահմանին իրավիճակի վրա կարող է ինչ-որ կերպ ազդել բացառապես ՌԴ-ի հետ պայմանավորվածությունների միջոցով։ Նման իրավիճակը հայկական արատավոր քաղաքական մտքի արդյունք է, որի համաձայն,  Հայաստանն, իբր, ինքնուրույն որոշումներ կայացնելու հնարավորությունը զոհաբերում է անվտանգությանը։ Մինչդեռ, իրականում, արդյունքում, զրկվելով ինքնիշխանության հերթական չափից, ստանում է միայն նոր սպառնալիքներ", - ամփոփել է վերլուծաբանը։