Շաբաթ, 28 Մայիսի 2022 13:23

Արմինֆո. Հայաստանի արտաքին քաղաքական գերատեսչությունն արձագանքել է Ադրբեջանի նախագահ Իլհամ Ալիեւի ' Հայաստանի եւ Լեռնային Ղարաբաղի հասցեին կատարած հարձակումներին:

Հայաստանի արտգործնախարարությունը հանդես է եկել  հայտարարությամբ Ադրբեջանի նախագահ Իլհամ Ալիևի՝ մայիսի 27-ին արված հայտարարությունների վերաբերյալ: ԱԳՆ մամուլի ծառայության հաղորդման համաձայն, հայտարարությունում ասվում է.

 

«Ադրբեջանի նախագահ Իլհամ Ալիևի կողմից մայիսի 27-ին հնչեցված հայտարարությունները ևս մեկ անգամ վկայում են ադրբեջանական կողմի ապակառուցողականության, պայմանավորվածությունների կամայական` իրականությանը չհամապատասխանող մեկնաբանությունների, ագրեսիվ և ռազմատենչ քաղաքականությունը շարունակելու մասին։

 

Հարևան պետության ինքնիշխան տարածքի նկատմամբ նկրտումները, այդ նպատակներին հասնելու համար ուժի կիրառման դիրքերից հանդես գալը ոչ այլ ինչ են, քան արհամարհանք միջազգային իրավունքի նորմերի նկատմամբ, և լրջագույն կասկածի տակ են դնում Ադրբեջանի՝ տարածաշրջանում խաղաղության հասնելու մտադրությունների անկեղծությունը։

 

ՀՀ արտաքին գործերի նախարարությունը հարկ է համարում վերահաստատել հայկական կողմի սկզբունքային դիրքորոշումն առ այն, որ Հայաստանի և Ադրբեջանի միջև հարաբերությունների կարգավորման շուրջ բանակցությունները պիտի տեղի ունենան երկու կողմերի առաջարկների հիման վրա, որոնք պետք է հասցեագրեն խնդիրների ողջ օրակարգը, այդ թվում՝ Լեռնային Ղարաբաղի հիմնախնդրի վերջնական կարգավորումը։

 

Ադրբեջանական կողմի շահարկումներով փորձ է արվում Լեռնային Ղարաբաղի հիմնախնդիրը ներկայացնել որպես տարածքային վեճ, մինչդեռ այն արցախահայության իրավունքների իրացման և էթնիկ զտումների վտանգի բացառման մասին է։

 

Այս կապակցությամբ հիշեցնում ենք, որ ԵԱՀԿ Մինսկի խմբի համանախագահության՝ 1995 թվականին ստացած միջազգային մանդատը՝ աջակցելու Լեռնային Ղարաբաղի հակամարտության համապարփակ կարգավորմանը, շարունակում է գոյություն ունենալ:

 

Կոչ ենք անում Ադրբեջանի ղեկավարությանը ռազմատենչ և առավելապաշտական հռետորաբանությամբ չտորպեդահարել առկա ձևաչափերում ընթացող քննարկումները։

 

Միևնույն ժամանակ, միջազգային հանրության ուշադրությունն ենք հրավիրում պաշտոնական Բաքվից հնչող հայտարարություններին և ակնկալում միջազգային գործընկերների միանշանակ վերաբերմունքի արտահայտումը, ինչի պարագայում միայն հնարավոր կլինի հասնել կայունության և խաղաղության Հարավային Կովկասում»։

 

Հիշեցնենք, որ նախօրեին Ադրբեջանի նախագահ Իլհամ Ալիևը հանդես է եկել մի շարք հայտարարություններով, որոնք չեն տեղավորվում ՀՀ իշխանությունների կողմից հռչակված եւ առաջ մղվող խաղաղության դարաշրջանի տրամաբանության մեջ: Ալիեւը, մասնավորապես, հավակնություններ արտահայտել Հայաստանի Հանրապետության ինքնիշխան տարածքների նկատմամբ և սպառնցել ուժով վերցնել դրանք։ Նա հավաստիացրել է, որ միջազգային իրավունքն այլեւս չի աշխատում, եւ ամեն ինչ որոշում է ուժը, ինչի մասին վկայում են Լեռնային Ղարաբաղի հակամարտության գոտում 44-օրյա պատերազմի արդյունքները: Ալիեւն սպառնացել է վերցնել "պատմական ադրբեջանական տարածքները ՝ Երեւանն ու Զանգեզուրը", վստահեցնելով, որ դրանք պատկանել են Ադրբեջանի Դեմոկրատական հանրապետությանը։ Նա կրկին հավաստիացրել է, որ Լեռնային Ղարաբաղի հակամարտությունը լուծված է, իսկ ԵԱՀԿ Մինսկի խումբն ավարտել է իր գործունեությունը։ Ալիեւը նաեւ նշել է, որ Հայաստանը 1,5 տարի հրաժարվել է որոշել Ադրբեջանի հետ սահմանները, սակայն մայիսի 24-ին հայ-ադրբեջանական սահմանին տեղի է ունեցել հանձնաժողովների առաջին հանդիպումը: "Դա շատ մեծ իմաստ ունի։ Եվ այն առումով, որ մենք սահմաններ ենք որոշելու, և դա շատ կարևոր է։ Դա ինքնըստինքյան պաշտոնապես վերջ կդնի Հայաստանի ռեւանշիստական, ֆաշիստական ուժերի տարածքային  հավակնություններին Ադրբեջանի նկատմամբ։ Որովհետև, եթե մենք սահմաններ ենք որոշում, ապա Լեռնային Ղարաբաղի ի՞նչ կարգավիճակի մասին կարող է խոսք լինել։ Սա Ադրբեջանի տարածքն է, և դա բոլորն ընդունում են։ Այդ պատճառով Ադրբեջանի եւ Հայաստանի միջեւ սահմանի սահմանազատման հանձնաժողովների առաջին նիստը շատ կարեւոր է", - ընդգծել է Ալիեւը։