Արմինֆո.Մայիսի 22-ին նախատեսված Փաշինյան-Միշել-Ալիեւ ձեւաչափով երրորդ հանդիպումը ԵԱՀԿ Մինսկի խմբի վերջնական վերակենդանացման վկայությունն է, որը 44-օրյա պատերազմից հետո հայտնվել է արհեստական կոմայի մեջ: ԱրմԻնֆո-ին այդպիսի կարծիք է հայտնել Միջազգային հարաբերությունների և անվտանգության հայկական ինստիտուտի ասոցացված փորձագետ Դավիթ Ստեփանյանը։
ՀՀ վարչապետ Նիկոլ Փաշինյանը մայիսի 22-ին աշխատանքային այցով կմեկնի Բրյուսել, որտեղ հանդիպում կունենա Իլհամ Ալիևի և Եվրախորհրդի նախագահ Շառլ Միշելի հետ: Նաեւ Բրյուսելում տեղի կունենան Փաշինյան-Միշել ձեւաչափով առանձին բանակցություններ։ Նշենք, որ սա նման ձևաչափով արդեն երրորդ հանդիպումն է։ Բրյուսելում կայացած վերջին հանդիպման ժամանակ պայմանավորվածություն է ձեռք բերվել սահմանազատման եւ սահմանագծման հանձնաժողով ստեղծելու մասին։
"Նաև ստիպված ենք արձանագրել, որ կարգավորման գործընթացը, չի բացառվում, որ վերջնականապես Մոսկվայից տեղափոխվել է Բրյուսել։ Մենք տեսնում ենք, որ եթե այդ ձեւաչափով առաջին հանդիպմանը նախորդել են Միշելի եւ Ֆրանսիայի նախագահ Մակրոնի զանգերը Ռուսաստանի նախագահ Պուտինին, ապա արդեն երկրորդին նախորդել են ԱՄՆ պետքարտուղար Բլինքենի զանգերը Փաշինյանին եւ Ալիեւին: Դա թույլ է տալիս արձանագրել որեւէ համակարգման բացակայության փաստը Մոսկվայի գործողությունների եւ Բրյուսելի գործողությունների միջեւ, որի հետեւում, անկասկած, կանգնած է Վաշինգտոնը",- ընդգծել է նա:
Նման իրավիճակը պայմանավորելով փետրվարի 24-ին Ուկրաինա ռուսական ներխուժումից հետո ստեղծված նոր աշխարհաքաղաքական իրողություններով՝ Ստեփանյանը կարծում է, որ, առնվազն, այս փուլում հայ-ադրբեջանական խնդիրների կարգավորման բանակցային գործընթացից ՌԴ-ին հեռացնելու հավաքական Արևմուտքի ծրագրերը հաջողությամբ կյանքի են կոչվում։ Եվ ԵԱՀԿ Մինսկի խմբի համանախագահության շրջանակներում կարգավորման գործընթացի վերակենդանացման փաստը, սակայն՝ առանց երրորդ համանախագահի անմիջական մասնակցության՝ ի դեմս Ռուսաստանի, ակնհայտորեն հաստատում է դա։
"Ինչ վերաբերում Է Բրյուսել 3-ի օրակարգին, ապա ես չեմ կարծում, որ մենք պետք է արագ լուծումներ ակնկալենք Հայաստանի եւ Ադրբեջանի միջեւ սահմանների որոշման հարցերում։ Էլ չենք խոսում այնպիսի հիմնարար խնդրի մասին, ինչպիսին Արցախի կարգավիճակի որոշումն է։ Բրյուսելում, ամենայն հավանականությամբ, կողմերը եւս մեկ փոքր քայլ կկատարեն սահմանների ճշգրտման՝ արդեն ստեղծված հանձնաժողովի աշխատանքը սկսելու ուղղությամբ։ Աշխատանք, որը կտևի տարիներ։ Բացի այդ, Բրյուսել-3-ը կպատվի մարդասիրական թաղանթով, չի բացառվում՝ հայ գերիների-պատանդների եւս մեկ խմբի հայրենիք վերադարձնելու Ալիեւի հերթական խոստման տեսքով", - ամփոփել է վերլուծաբանը։