Արմինֆո.Արցախն իջեցնելու բան չունի, նա ունի կարմիր գծեր, որոնք չի անցնի։ Այդ մասին "Ազատություն" ռադիոկայանի ֆեյսբուքյան ասուլիսի ժամանակ հայտարարել է Արցախի արտաքին գործերի նախարար Դավիթ Բաբայանը՝ ի պատասխան Ղարաբաղի հարցում նշաձողի իջեցման անհրաժեշտության վերաբերյալ հարցի։
Նա հակընդդեմ հարց է տվել. իսկ ո՞վ է միջազգային հանրությունը։ "Գիտեք, միջազգային հանրություն հասկացությունը շատ խայտաբղետ նշանակություն ունի։ Միջազգային հանրության անդամներից մեկը՝ Ադրբեջանը, ընդհանրապես, ասում է, որ ոչ մի նշաձողեր չկան, և ղարաբաղյան հարց նոյնպես չկա։ Միջազգային հանրության մեկ այլ ներկայացուցիչ՝ Հայաստանն ասում է՝ ահա Արցախը։ Հիմա այս հարցի վերաբերյալ չկա և չի կարող լինել հավաքական կարծիք միջազգային հանրության շրջանում, հատկապես, առկա պայմաններում, երբ աշխարհը մտել է մերկ աշխարհաքաղաքականության դարաշրջան", - ասել է Բաբայանը, հավելելով, որ այսօր մարդու իրավունքների, ժողովրդավարության գաղափարներ գոյություն չունեն, չեն գործում։
Նա ևս մեկ անգամ ընդգծել է, որ նույն արևմտյան աշխարհում կան երկրներ, որոնք բացահայտ աջակցում են Ադրբեջանին, կան այնպիսիք, որոնք անտարբեր են, և՝ այնպիսիք, որոնք աջակցում են հայկական կողմին։
Այդ առումով Բաբայանը կարևորել է սթափ հաշվարկները, առանց հույզերի գործողությունները ՝ ի պաշտպանություն հայկական պետական շահերի ։ "Հասկացեք, որ մենք արդեն, նույնիսկ, նշաձող չունենք իջեցնելու համար։ Ինչու՞ էր այդ նույն միջազգային հանրությունը լռում 44 օր, երբ մեզ կտրում էին։ Մենք պետք է պաշտպանենք սեփական շահերը։ Եւ մեր շահերը սուրբ են, եւ մենք պետք է պաշտպանենք սեփական շահերը, այլ ոչ թե մտածենք այն մասին, թե ինչպես կարելի է ստանալ շահաբաժիններ այս կամ այն երկրից: Մենք իջեցնելու ոչինչ չունենք, մենք ունենք կարմիր գծեր։ Վերադարձ անցյալին չկա", - ասել է Արցախի ԱԳՆ ղեկավարը։
Միաժամանակ, նա կոչ է արել հասկանալ Ադրբեջանի էությունը։ Նախարարի խոսքով, իսկ ինչու այսօր Ադրբեջանը չի ճանաչում Արցախը, չէ որ նա արդեն ստցել է ավելին, քան երազում էր, այս հակամարտությունը լուծում չունի, կամ էլ դրա լուծումն ուժերի հաշվեկշիռն է:
Արցախի ԱԳՆ ղեկավարը ևս մեկ անգամ նշել է, որ միջազգային հանրությունն այլևս միասնական չէ, այն բաժանված է, այլևս չի վերահսկվում մեկ-երկու բևեռից, աշխարհը դարձել է բազմաբևեռ:
Հարցին, թե որն է ռուսական կողմի դիրքորոշումն այս հարցում, Բաբայանը հիշեցրել է, որ Ռուսաստանը հստակ արտահայտվել է այդ հարցի շուրջ, նույնիսկ, ավելի հստակ, քան ԱՄՆ-ն ու Ֆրանսիան (ԵԱՀԿ Մինսկի խմբի մյուս երկու համանախագահները - խմբ.)։ Նրա խոսքով, Մոսկվան ասել է, որ Հայաստանի եւ Ադրբեջանի միջեւ սահմանազատման եւ սահմանագծման հարցը կապ չունի Լեռնային Ղարաբաղի հարցի հետ, ինչը ճիշտ է:
Ճշգրտող հարցին, թե արդյոք հնարավոր է, որ Արցախը խնդրի ընդգրկվել Ռուսաստանի կազմում, Բաբայանը մեկ անգամ ևս հիշեցրել է, որ Ստեփանակերտն ունի մեկ օրակարգ՝ Արցախի պետականության պահպանում և անկախության ճանաչում։
Հարցին, թե իսկ ինչու Արցախը չի միանա Հայաստանին այսօր, Բաբայանը նշել է, որ Մայր Հայաստանի հետ վերամիավորումը եղել և մնում է գերխնդիր: "Բայց այնպես է ստացվել, որ աշխարհաքաղաքական օրենքներն այդպիսին են։ Ադրբեջանն արել է ամեն ինչ, որպեսզի այս հակամարտությունը ներկայացնի որպես տարածքային, իսկ մեր հնարավորությունները, որպեսզի մեր արդար ձայնը տեղ հասցնենք, ավելի քիչ էին", - ասել է նա, նաեւ նշելով, որ աշխարհում գերիշխում են աշխարհաքաղաքական շահերը, կանխակալ մոտեցումները, որտեղ մեկին կարելի է, մյուսին՝ ոչ։
Նշենք, որ ապրիլի 14-ին ելույթ ունենալով խորհրդարանում ՝ Հայաստանի վարչապետ Նիկոլ Փաշինյանն ասել էր. "Այսօր միջազգային հանրությունը մեզ կրկին ասում է՝ մի փոքր իջեցրեք ձեր նշաձողը Լեռնային Ղարաբաղի հարցում, եւ դուք մեծ միջազգային համախմբում կունենաք Հայաստանի եւ Արցախի շուրջ: Հակառակ դեպքում խնդրում ենք մեզ վրա հույս չդնել, ոչ այն պատճառով, որ մենք չենք ցանկանում օգնել ձեզ, այլ այն պատճառով, որ մենք չենք կարող օգնել ձեզ"։