Հինգշաբթի, 5 Մայիսի 2022 16:13

Արմինֆո. "Ոստիկանները բարբարոսական մեթոդներով ինձ հրեցին ոստիկանական մեքենա ՝ առանց բացատրելու ինձ բերման ենթարկելու պատճառները։ Ես ընդամենը մասնակցել եմ խաղաղ երթին", - լրագրողների հետ զրույցում հայտարարե  է Համբիկ Սասունյանը, ում առավոտյան ոստիկանությունը բերման էր ենթարկել դիմադրության շարժման անհնազանդության ակցիային մասնակցելու համար։

 

Նշենք, որ  "Հայկական Ցեղասպանության Արդարության մարտիկներ" գաղտնի կազմակերպության անդամ Համբիկ Սասունյանը 1982 թվականին Լոս Անջելեսում Թուրքիայի  հյուպատոսի սպանության համար դատապարտվել էր ցմահ ազատազրկման: 2021 թվականին  Համբիկ Սասունյանը վաղաժամկետ ազատ է արձակվել։ Դրանից հետո նա տեղափոխվել է Հայաստան։

 

"Ես քայլում էի, ոստիկանները բերման էին ենթարկում մեր տղաներին ու աղջիկներին, և ես ընդամենը հարցրեցի, թե ինչի համար եք նրանց ձերբակալում։ Այդ ժամանակ երկու ոստիկան բռնեցին նաև ինձ։ Բարբարոսական մեթոդներով ինձ մեքենայի մեջ գցեցին։ Ես գլուխս հարվածեցի, բայց ոչինչ չասացի։ Ես հիասթափված եմ իմ ժողովրդի նկատմամբ ոստիկանության պահվածքից։ Ինձ զարմացնում է, որ նրանք, ովքեր իրենց հայ են համարում, կարող են նման վերաբերմունք ցուցաբերել ժողովրդի նկատմամբ։ Նիկոլն (Փաշինյանը) է հրահանգել  ոստիկաններին այդպես պահել իրենց ժողովրդի հանդեպ",-ասել է Սասունյանը ՝ միաժամանակ ամոթանք տալով ՀՀ վարչապետին իրավապահների այս գործողությունների համար։

 

Սասունյանը Փաշինյանին հիշեցրել է, որ 4 տարի առաջ նա նույն կերպ է գործել՝ որպեսզի հասնի իշխանության։ "Իսկ հիմա դու դիկտատոր ես դարձել և ուրիշներին թույլ չես տալիս անել այն, ինչ դու արել ես։ Դու ոչնչով չես տարբերվում թուրքերից, դու դավաճան ես։ Վախկոտ մի եղիր, դուրս արի քո թիկնապահների թիկունքի ետեւից և խոսիր ժողովրդի հետ։ Ալիևի հետ սուրճ ես խմում, դուրս արի մեզ մոտ, մեզ հետ սուրճ խմիր։ Ամոթ քեզ, դավաճան",- զայրույթով ընդգծել է Սասունյանը։

 

Նշենք, որ Սասունյանը բերման էր ենթարկվել այսօր առավոտյան մայրաքաղաքի փողոցներից մեկում անհնազանդության երթի ժամանակ: Ոստիկանները նաև փորձել էին բերման ենթարկել "Հայաստան" դաշինքից ԱԺ պատգամավոր Արամ Վարդվևանյանին, բայց ժամանակին հիշել էին օրենքի մասին։

 

Ընդհանուր առմամբ, ժամը 13:00-ի դրությամբ անհնազանդության ակցիաներին մասնակցող 69 քաղաքացի բերման է ենթարկվել ոստիկանություն: Ընդդիմությունը կարծում է, որ ոստիկանությունը բիրտ անհամաչափ ուժ է կիրառում խաղաղ ցուցարարների նկատմամբ։ Բերման ենթարկվածների մեջ կան նաև անչափահաս քաղաքացիներ։

 

Նշենք, որ վաղ առավոտից դիմադրության շարժման մասնակիցները կաթվածահար են արել քաղաքը։ Նրանք երթով շրջում են Երեւանի կենտրոնական փողոցներով եւ դրանով կաթվածահար են անում ավտոտրանսպորտի երթեւեկությունը։ Երթին զուգահեռ նաև ավտոերթ է կազմակերպվել։ Բացի այդ, շարժման անդամները ծանր տեխնիկայով փակել են Երևան-Մարտունի ճանապարհը Գեղարքունիքի մարզի Նորադուզ գյուղի մերձակայքում: