Հայաստանն ու ԱՄՆ-ը ստորագրել են փոխըմբռնման հուշագիր քաղաքացիական միջուկային էներգետիկայի ոլորտում համագործակցության վերաբերյալ

Արմինֆո.Վաշինգտոնում կայացել է Հայաստանի արտգործնախարար Արարատ Միրզոյանի հանդիպումը ԱՄՆ պետքարտուղար Էնթոնի Բլինքենի հետ:

ԱՄՆ Պետդեպարտամենտի հաղորդագրության համաձայն, բացելով հանդիպումը, Բլինքենը նշել է, որ իրեն հաճելի է ողջունել Հայաստանի արտգործնախարարին եւ նրա թիմին Միացյալ Նահանգների Պետդեպարտամենտում:

"Մենք քիչ առաջ շատ լավ երկխոսություն ունեցանք, կարծիքների փոխանակում մեր միջեւ, եւ, իրոք, այդ հանդիպումների նպատակի մեծ մասը ԱՄՆ - ի եւ Հայաստանի միջեւ ռազմավարական երկխոսության վերսկսումն է, որը կասեցվել էր COVID-ի պատճառով։ Սա շատ կարեւոր գործիք է, որի օգնությամբ մենք կարող ենք շարունակել խորացնել եւ ամրապնդել մեր հարաբերությունները, որպեսզի ուսումնասիրենք համագործակցության նոր ոլորտները, եւ մենք շատ ուրախ ենք, որ կարող ենք դա անել հիմա", - ասել է ԱՄՆ պետքարտուղարը։

Բլինքենը նաեւ նշել է, որ միջուկային համագործակցության վերաբերյալ փոխըմբռնման հուշագրի ստորագրումը Միացյալ Նահանգների եւ Հայաստանի համար համագործակցության նոր ուղիներ է բացում: Նրա համոզմամբ ՝ այդ քայլը կարող է նաեւ զգալիորեն ամրապնդել երկկողմ հարաբերությունները երկրների միջեւ։

"Ես նաեւ ցանկանում եմ օգտվել այս հնարավորությունից, որպեսզի, առաջին հերթին, գովաբանեմ վարչապետի եւ նրա կառավարության առաջնորդությունը, ժողովրդավարական բարեփոխումները, որ նրանք իրականացնում են, եւ շարունակվող առաջընթացը, բայց նաեւ շատ ողջունել Հայաստանի եւ Ադրբեջանի միջեւ երկխոսությունը եւ անկեղծ երախտագիտություն հայտնել հեռատեսության, խիզախության եւ ճկունության համար, որոնք վարչապետն ու Հայաստանը դրսեւորում են այս գործընթացում, ձգտելով այն բանին, ինչ մենք բոլորս ուզում ենք, այն է ՝ ամուր խաղաղության", - ասել է Բլինքենը։

Վերջում  ԱՄՆ պետքարտուղարը նշել է, որ այսօր դժվար ժամանակներ են շատ առումներով, և դրանք Հայաստանի համար հեշտ չեն։ "Բայց իմացեք, որ դուք ունեք ուժեղ եւ հավատարիմ բարեկամ եւ գործընկեր Միացյալ Նահանգներում", - ամփոփել է նա:

Իր հերթին՝ Միրզոյանը շնորհակալություն է հայտնել ջերմ ընդունելության համար և հիշեցրել, որ այս տարի Երևանն ու Վաշինգտոնը նշում են դիվանագիտական հարաբերությունների հաստատման 30-ամյակը: Նրա խոսքով ՝ այս տարիների ընթացքում կողմերին հաջողվել է կառուցել շատ ամուր հարաբերություններ ՝ հիմնված ժողովրդավարության, մարդու իրավունքների եւ օրենքի գերակայության ընդհանուր արժեքների վրա:

"Այժմ ՝ 2018 թվականի Ժողովրդավարական թավշյա հեղափոխությունից հետո, համատեղ ջանքերով մենք մեր փոխգործակցության, համագործակցության մակարդակը բարձրացրել ենք մինչև ռազմավարական երկխոսություն։ Եվ շատ կարևոր է, որ ես այստեղ եմ նաև Ռազմավարական երկխոսության եզրափակիչ նստաշրջանի շրջանակներում, որի վրա մենք ուշադրությունը կենտրոնացրել ենք մեր ժողովրդավարական բարեփոխումների, արդարադատության բարեփոխումների, բանկային ոլորտում համագործակցության, պաշտպանության ոլորտում համագործակցության խորացման ուղիների որոնման և, իհարկե, կոռուպցիայի դեմ պայքարի և կանխարգելման ու շատ այլ ոլորտներում։ Եվ մենք գնահատում ենք մեր բարեփոխումներին աջակցելու Միացյալ Նահանգների ջանքերը", - նշել է Միրզոյանը։

Ընդ որում, նա նշել է, որ Հայաստանը նաեւ գնահատում է Միացյալ Նահանգների աջակցությունը Հայաստանի էներգետիկ հատվածի զարգացման գործում: "Ես խոսել եմ նաեւ նոր ոլորտների յուրացման մասին, եւ այստեղ ինձ համար պատիվ կլինի ձեզ հետ ստորագրել քաղաքացիական միջուկային էներգետիկայի ոլորտում մեր համագործակցության վերաբերյալ փոխըմբռնման հուշագիր", - հավելել է նա:

Միրզոյանը հավելել է, որ Հայաստանում բարձր են գնահատում ԱՄՆ-ի հետ գործընկերությունը, որն ուղղված է տարածաշրջանում խաղաղությանն ու կայունությանը: "Այս կապակցությամբ ցանկանում եմ ընդգծել այն կարեւոր դերը, որ խաղում է Ամերիկայի Միացյալ Նահանգները՝ որպես ԵԱՀԿ Մինսկի խմբի համանախագահ, որն ունի միջազգային հանրության մանդատը ՝ աջակցելու Լեռնային Ղարաբաղի հակամարտության խաղաղ կարգավորմանը։ Ես նաեւ գնահատում եմ Միացյալ Նահանգների աջակցությունը հայ-թուրքական հարաբերությունների կարգավորման գործընթացում եւ Միացյալ Նահանգների ամուր դիրքորոշումը Հայոց ցեղասպանության ճանաչման եւ դատապարտման  եւ այս տարի եւս այդ դիրքորոշման վերահաստատման հարցում", - ամփոփել է Միրզոյանը։

Դրան հետեւել է փոխըմբռնման հուշագրի ստորագրման արարողությունը։