Արմինֆո. Եվրոպական ժողովրդական կուսակցությունը միանում եւ վճռականորեն աջակցում է ցեղասպանությունների կանխարգելման, ցեղասպանության ենթարկված մարդկանց իրավունքների վերականգնման եւ պատմական արդարության հաստատման համար միջազգային պայքարը շարունակելու Հայաստանի եւ հայ ժողովրդի հանձնառությանը: Այդ մասին ասվում է Հայոց ցեղասպանության 107-րդ տարելիցի կապակցությամբ ԵԺԿ հայտարարության մեջ։
«Մենք հարգում ենք 1915 թվականի Հայոց ցեղասպանության զոհերի հիշատակը։ Մենք վերահաստատում ենք Ցեղասպանության եւ հայ ժողովրդի ազգային Մեծ տեղահանության ճանաչումն ու դատապարտումը։
Մենք միանում եւ վճռականորեն աջակցում ենք ցեղասպանությունների կանխարգելման, ցեղասպանության ենթարկված մարդկանց իրավունքների վերականգնման եւ պատմական արդարության հաստատման համար միջազգային պայքարը շարունակելու Հայաստանի եւ հայ ժողովրդի հանձնառությանը։
Մենք կոչ ենք անում Թուրքիային անհրաժեշտ միջոցներ ձեռնարկել Օսմանյան կայսրության կողմից իրագործված Հայոց ցեղասպանությունը ճանաչելու եւ դատապարտելու իր միջազգային պարտավորությունների կատարման համար եւ առերեսվել իր պատմության ու հիշողության հետ՝ հարգելով մարդկության դեմ այս նողկալի ոճրագործության զոհերի հիշատակը։
Մենք համոզված ենք, որ նման քայլը կնպաստի երկարաժամկետ խաղաղությանը, կայունությանը եւ մարդու իրավունքներին ողջ տարածաշրջանում», - ասվում է ԵԺԿ հայտարարությունում:
Հիշեցնենք, որ Թուրքիան շարունակում է ժխտողական քաղաքականությունը՝ մերժելով Հայոց ցեղասպանության համար մեղադրանքները եւ պահանջելով մեկ այլ տերմին սահմանել 1915 թվականի իրադարձությունների համար։ Թուրքիայի նախագահ Ռեջեփ Թայիփ Էրդողանը պնդում է, որ այն ժամանակ Օսմանյան կայսրության կառավարության գործողություններից տուժել են նաև թուրքերը։