Ադրբեջանական ԶԼՄ-ները նենգափոխել են Սերգեյ Լավրովի խոսքերը

Ադրբեջանական ԶԼՄ-ները դարձյալ ապատեղեկատվություն են
տարածել, այս անգամ`  նենգափոխելով
Ռուսաստանի արտգործնախարար Սերգեյ Լավրովի խոսքերը:

2014 թվականին ռուսական դիվանագիտության գործունեության
արդյունքների ամփոփմանը նվիրված ամենամյա մամուլի ասուլիսում հարց է հնչել
ադրբեջանցի դիվերսանտ Դիլհամ Ասկերովի ճակատագրի մասին, որը դատապարտվել է
Արցախում: «Ինչպես ասացիք, նա Ռուսաստանի քաղաքացի է, որին դատապարտել է կայկական
կո՟ղմը: Այդ դեպքում մենք այդ հարցը կքննարկենք նրա հետ: Քիչ չեն Ռուսաստանի
քաղաքացիները, որոնք կալանավորված են աշխարհի տարբեր երկրներում: Մենք մշտապես
հետաքրքրվում ենք նրանց ճակատագրերով: Հաշվի առնելով կալանավորման պատճառների
վերաբերյալ տեղեկատվություն ստանալու անհրաժեշտությունը և հիմնվելով մեր
քաղաքացիների նկատմամբ առադրված մեղադրանքի ծանրության վերաբերյալ տեղեկատվության
վրա, հասկանալով, թե նրանք ինչ պայմաններում են պահվում, ինչպիսին  են նրանց կալանավորած երկրի ծրագրերը
Ռուսաստանի քաղաքացիների վերաբերյալ, մենք համապատասխան որոշումներ ենք կայացնում
այդ նպատակների համար գոյություն ունեցող խողովակներով`  համապատասխան պետության հետ Ռուսաստանի երկկողմ
հարաբերությունների շրջանակում», - պատասխանել է Լավրովը (ՌԴ ԱԳՆ կայք): 

Սակայն ՌԴ ԱԳՆ ղեկավարի վերը նշված բառացի պատասխանը
պատճառ է դարձել, որպեսզի ադրբեջանական ԶԼՄ-ները տարածեն տեղեկատվություն այն
մասին, թե իբր դիվանագետը խոստացել է Հայաստանի հետ քննարկել Ասկերովին «պատանդ
պահելու» հարցը:

Արցախի
դատարանի 2014 թվականի դեկտեմբերի 29-ին կայացրած դատավճռի համաձայն, Դիլհամ Ասկերովը դատապարտվել
է ցմահ ազատազրկման, Շահբազ Գուլիեւը՝ 22 տարվա ազատազրկման:

Հիշեցնենք,
որ Ադրբեջանի քաղաքացիներ Շահբազ Գուլիեւը (1968թ. ծնված), Դիլհամ Ասկերովը (1960թ. ծնված), ինչպես նաեւ խմբի սպանված երրորդ մասնակից Հասան Հասանովը, ունենալով զենք եւ զինամթերք, 2014թ. հունիսի 29-ին ապօրինաբար հատել էին ԼՂՀ պետական սահմանը  եւ ներխուժել Հանրապետության Շահումյանի շրջանի տարածք՝ հետախուզական գործողությունների նպատակով:  Ավելին, նրանք զենքի գործադրմամբ հուլիսի 4-ին առեւանգել էին ԼՂՀ անչափահաս քաղաքացի Սմբատ Ցականյանին, որի մարմինը հրազենային վնասվածքներով հայտնաբերվել էր հուլիսի 15-ին Քարվաճառ եւ Մանաշիդ համայնքների միջեւ ընկած անտառային զանգվածում:
Դիվերսանտների վնասազերծման ժամանակ սպանվել էր Հայաստանի ԶՈՒ սպա Սարգիս Աբրահամյանը (1971թ. ծնված), իսկ Կոտայքի մարզի Ձորաղբյուր գյուղի բնակիչ Կարինե Դավթյանը հրազենային
վիրավորում էր
ստացել: