Ղազախստանի դեսպան. ղազախահայկական փոխգործակցության զարգացման զգալի ներուժ կա,  այդ թվում՝ ԵԱՏՄ շրջանակներում  

Արմինֆո. Վստահ եմ, որ հայ-ղազախական  բարեկամական և փոխշահավետ հարաբերությունները կխորանան՝ ի շահ մեր ժողովուրդների և մեր պետությունների, և, ընդհանուր առմամբ,  Եվրասիական տնտեսական միության։

Այդ մասին ապրիլի 6-ին հայտարարել է Հայաստանում Ղազախստանի դեսպան Բոլատ Իմանբաեւը՝ "ԵԱՏՄ զարգացման հնարավորություններն ու հեռանկարները՝ հավաքական Արեւմուտքի կողմից Ռուսաստանին տնտեսական պատերազմ հայտարարելուց հետո " թեմայով կլոր սեղանի ժամանակ, հիշեցնելով, որ Հայաստանն ու Ղազախստանն այս տարի նշում են դիվանագիտական հարաբերությունների հաստատման 30-ամյակը։

Նրա խոսքով՝ այն, ինչ սկսվել է արարողակարգային, այսպես ասած, նոտաների բանավոր փոխանակումից, այժմ վերածվել է բազմաբովանդակ, կենդանի և ինտենսիվ հարաբերությունների։ "Մեր երկրների միջեւ հարաբերությունները հիմնված են բարեկամության եւ փոխըմբռնման ավանդույթների վրա։ Ձևավորված իրավապայմանագրային հիմքը թույլ է տալիս զարգացնել բազմակողմ և երկկողմ համագործակցությունը գրեթե բոլոր ուղղություններով: Ընդ որում, կա զգալի ներուժ և հեռանկարներ ղազախա-հայկական փոխգործակցության հետագա զարգացման համար, այդ թվում՝ Եվրասիական ինտեգրացիոն տարածքում", - ասել Է դիվանագետը։

Միաժամանակ, նա հիշեցրել է, որ Ղազախստանը 2021 թվականին նախագահել է ԵԱՏՄ կանոնադրական մարմիններում, իսկ այս տարի նախագահում է ԱՊՀ-ում: Այդ կապակցությամբ Իմանբաևը նշել է, որ Ղազախստանի նախագահը նախանշել է կազմակերպությունում նախագահության երեք գերակա ուղղությունները: "Այսօր էլ վստահաբար կարելի է ասել, որ հայտարարված նպատակները համատեղ ջանքերով հաջողությամբ իրականացվել են և շարունակում են իրականացվել ընթացիկ տարում: Այս մասին են վկայում նաև փետրվարի 24-25-ին Ղազախստանում տեղի ունեցած ԵԱՏՄ միջկառավարական նիստի արդյունքները ։ Փոխշահավետ լուծումները համապատասխանում են ԵԱՏՄ ոգուն, որն իր գոյության համեմատաբար կարճ ժամանակահատվածում միության անդամ պետությունների միջև փոխադարձ առևտրի զգալի աճ է գրանցել",- նշել է դիվանագետը։

Ընդ որում, Ղազախստանի դեսպանը գոհունակություն է հայտնել անցած տարվա արդյունքներով ԵԱՏՄ-ում ապրանքաշրջանառության աճի դինամիկայի կապակցությամբ: Նա ուշադրություն է հրավիրել այն հանգամանքի վրա, որ չնայած արտաքին գործոններին և կարանտինային սահմանափակումներին, ԵԱՏՄ անդամ երկրների հետ Ղազախստանի առևտրի ծավալը 2021 թվականին աճել է 28 տոկոսով ՝ հասնելով 26,1 մլրդ դոլարի: "Ընդ որում, հայ-ղազախական երկկողմ ապրանքաշրջանառությունն այս ժամանակահատվածում աճել է ավելի քան 30 տոկոսով", - ասել է Իմանբաեւը ՝ նաեւ ուշադրություն դարձնելով Ղազախստանի նախագահի մարտի 16-ի "Նոր Ղազախստան. նորացման եւ արդիականացման ուղի " նոր ուղերձին, որը վկայում է երկրի զարգացման նոր փուլի մասին:

Դիվանագետը հավելել է, որ ուղերձում կարեւորվում է պետության կայուն եւ կառավարելի գործունեության ապահովումը աշխարհաքաղաքական եւ աշխարհատնտեսական լարվածության ֆոնին, եւ նշվում է այն իրավիճակի աննախադեպ լինելը, որին այսօր բախվում է աշխարհը, այդ թվում ՝ լարվածությունը, խիստ պատժամիջոցային դիմակայությունը եւ անկանխատեսելի հետեւանքներն ամբողջ աշխարհի համար:

Նա նաեւ նշել է, որ ստեղծված իրադրությանն օպերատիվ արձագանքելու նպատակով Ղազախստանի կառավարությանն առընթեր ստեղծվել է օպերատիվ շտաբ, որն իրական ժամանակում հետեւում եւ վերլուծում է իրավիճակը ՝ գլոբալ պայմաններում հայրենական բիզնեսի պահպանման համար: Իմանբաևը պատմել է նաև Երկրի ժողովրդավարացմանն ուղղված Ղազախստանի ղեկավարի նախաձեռնությունների, սուպերնախագահականից նախագահական կառավարման ձևին անցումը՝ ուժեղ խորհրդարանով, և այլն: