Արմինֆո.Արցախում ՌԴ-ին միանալու վերաբերյալ հանրաքվե անցկացնելու դեպքում վերջինս ունի հաղթանակի բոլոր շանսերը։ ԱրմԻնֆո-ին այդպիսի կարծիք է հայտնել անկախ քաղաքական վերլուծաբան Արմեն Հովհաննիսյանը։
"Նման հեռանկարի օգտին կարելի է խոսել՝ հաշվի առնելով հետխորհրդային տարածքում փաստացի իր մանդատին ենթակա տարածքներում հանրաքվեներ անցկացնելու Մոսկվայի մեծ փորձը։ Կարծում եմ, որ իրավիճակի նման ելքի հավանականությունը բավական մեծ է նաև 44-օրյա պատերազմի արդյունքում ռուսական վերահսկողության տակ հայտնված Արցախի պարագայում", - ընդգծել է նա։
Նշենք, որ վերջին շրջանում տեղեկատվական դաշտում նպատակաուղղված կերպով լցոնումներ են իրականացվում Արցախում ՌԴ-ին միանալու հանրաքվեի անցկացման օգտին արցախցիների տրամադրությունների մասին։ Դա արվում է, հիմնականում, Արցախից, բայց տարածվում է նաև ռուսական դաշնային լրատվամիջոցների կողմից։
Ըստ Հովհաննիսյանի, Արցախում ՌԴ-ին միանալու կամ նրա անկախությունը ճանաչելու վերաբերյալ հանրաքվե անցկացնելու փաստացի սպառնալիքները, մեծ հաշվով, Մոսկվայի պատասխանն են վերջին շրջանում ուկրաինական իրադարձությունների ֆոնին այժմ արդեն Կովկասում ՌԴ-ի համար երկրորդ ճակատ բացելու Բաքվի սպառնալիքներին:
Միևնույն ժամանակ, վերլուծաբանն արձանագրել է այն փաստը, որ վերջին տասնամյակներում ժողովուրդների ինքնորոշման իրավունքի իրացման արդյունքում իրական անկախություն են ստացել միայն Արևմուտքի հովանու ներքո գտնվող տարածքները։ Օրինակ, Սերբիայից անջատված Կոսովոն։ Մինչդեռ, համանման "ռուսական նախագծերը"՝ Մերձդնեստրը, Աբխազիան, Հարավային Օսիան, իսկ հիմա արդեն նաեւ Դոնեցկի և Լուգանսկի հանրապետությունները, ճանաչվել են միայն Ռուսաստանի կողմից։ Իսկ մնացած աշխարհը չի պատրաստվում դա անել:
"Ռուսաստանում նաև խոսակցություններ են տարվում է Արցախի անկախության մասին։ Բայց այստեղ պետք է հստակ տեսնել և հասկանալ ՌԴ-ի հասկացողությամբ անկախության եւ Արցախի անկախության միջև տարբերությունը, որի մասին խոսվում է, օրինակ, 44-օրյա ադրբեջանական ագրեսիայի արդյունքում Ֆրանսիայի Սենատի ընդունած բանաձևում։ Անկախության այս երկու ձևերը բոլորովին տարբեր են։ Ընդ որում, ինչպես իրենց էությամբ եւ բովանդակությամբ, այնպես էլ ճանաչող պետություններից կախվածությամբ", - ամփոփել է վերլուծաբանը։