Պաշտպանության նախարարությունը հերքում է հակառակորդի գործողությունների հետևանքով ՀՀ ԶՈՒ մեկ զինծառայողի զոհվելու և մյուսի վիրավորվելու մասին հաղորդումները

Արմինֆո.Սոցիալական ցանցերով և տարբեր լրատվամիջոցներով տարածվող տեղեկությունը, թե մարտի 16-ին Ադրբեջանի ԶՈՒ ստորաբաժանումները սադրանք են իրականացրել հայ-ադրբեջանական սահմանին, ինչի հետևանքով հայկական կողմից մեկ զինծառայող զոհվել է, ևս մեկը վիրավորվել՝ չի համապատասխանում իրականությանը:

Այդ մասին հաղորդում է Հայաստանի ՊՆ մամուլի ծառֆայությունը: «Եվս մեկ անգամ հորդորում ենք սահմանային իրադրության վերաբերյալ տեղեկություններ հրապարակելիս հիմնվել բացառապես պաշտոնական հաղորդագրությունների վրա», - ասվում է ՊՆ հաղորդագրությունում:

Ավելի վաղ Հայաստանի ՊՆ մամուլի ծառայությունը հաղորդել էր, որ մարտի 16-ին, ժամը 21:10-ի սահմաններում, հանրապետության հարավ-արևելյան ուղղությամբ տեղակայված մարտական դիրքերից մեկում հայտնաբերվել է ՀՀ ՊՆ N զորամասի ժամկետային զինծառայող, շարքային Ալբերտ Լևոնի Սիրոյանի (ծնվ. 2002թ) դին` ծնոտի շրջանում հրազենային վիրավորմամբ: «Տարվում է քննություն` դեպքի հանգամանքները լիարժեք պարզելու նպատակով», - ասվում էր հաղորդագրությունում: