Արմինֆո.Վրաստանը, հաշվի առնելով երկրի ազգային շահերն ու ժողովրդի շահերը, չի ծրագրում միանալ Ռուսաստանի նկատմամբ տնտեսական ու ֆինանսական պատժամիջոցներին։ Այդ մասին հայտարարել է վարչապետ Իրակլի Ղարիբաշվիլին, հավելելով, որ պատժամիջոցների սահմանումը ավելի մեծ վնաս կհասցնի իր երկրին ու ժողովրդին: Վրաստանի կառավարության ղեկավարը նաեւ Ազգային անվտանգության խորհրդի նիստ եւ խորհրդարանի արտահերթ նստաշրջան անցկացնելու անհրաժեշտություն չի տեսնում:
Անդրադառնալով այն հարցին, թե արդյոք մտադիր է այցելել Կիեւ՝ ի նշան համերաշխության, Ղարիբաշվիլին նշել է, որ Ուկրաինայի օդային տարածքն այժմ փակ է, հաղորդում է "Էխո Կավկազա"-ն:
Հիշեցնենք, որ Ռուսաստանի նախագահ Վլադիմիր Պուտինը փետրվարի 24-ին հայտարարել է Դոնբասի տարածքում հատուկ գործողություն անցկացնելու մասին։ Արևմտյան երկրներն, ի պատասխան, հայտարարել են ՌԴ նկատմամբ խիստ պատժամիջոցներ կիրառելու մասին։
Թուրքիայի նախագահ ռեջեփ Թայիփ Էրդողանը հրավիրել է Անվտանգության խորհրդի նիստ՝ Ուկրաինայի իրադարձությունների կապակցությամբ, որի արդյունքում Անկարայում հայտարարել են, որ վճռականորեն դատապարտում են եւ անընդունելի են համարում Ռուսաստանի Դաշնության Զինված ուժերի ռազմական գործողությունն ընդդեմ Ուկրաինայի։ Թուրքիայի ԱԳ նախարար Մեւլութ Չավուշօղլուն, իր հերթին հայտարարել է, որ Թուրքիան կարող է փակել Բոսֆորի եւ Դարդանելի նեղուցները ռուսական ռազմանավերի համար, սակայն, ռուսական կողմը իրավունք կունենա իր նավատորմը վերադարձնել ռազմակայան: "Մենք պաշտոնական հարցում ենք ստացել Ուկրաինայից։ Մոնտրեի կոնվենցիայի դրույթները չափազանց հստակ են և ճշգրիտ։ Մինչ օրս Թուրքիան առանց վարանելու կատարել է Մոնտրեի կոնվենցիան։ Պատերազմում, որտեղ Թուրքիան կողմերից մեկը չէ, կարող են միջոցներ ձեռնարկվել դրան մասնակցող երկրների նկատմամբ։ Թուրքիան կարող է սահմանափակել նեղուցներով ռուսական ռազմանավերի անցումը։ Սակայն Մոնտրեի Կոնվենցիան նաեւ նախատեսում է, որ պատերազմին մասնակցող երկրների նավերը կարող են վերադառնալ իրենց ռազմակայաններ, եւ դա նրանց պետք է թույլատրվի", - Չավուշօղլուի խոսքը մեջբերում է TGRT Haber հեռուստաալիքը:
Չինաստանը չեզոք դիրք է գրավել հակամարտությունում եւ իր լրատվամիջոցներին կոչ է արել ձեռնպահ մնալ իրենց նյութերում "ռուսական ներխուժում" տերմինի կիրառումից:
Իրանի նախագահ Իբրահիմ Ռաիսին հայտարարել է, որ ՆԱՏՕ-ի ընդլայնումը լուրջ սպառնալիք է անկախ երկրների անվտանգության համար՝ տարբեր տարածաշրջաններում:
ՆԱՏՕ-ում հայտարարել են, որ Ռուսաստանը շատ բարձր տնտեսական եւ քաղաքական գին կվճարի Ուկրաինայի նկատմամբ այդ քայլի համար: Հյուսիսատլանտյան դաշինքը Ռուսաստանին կոչ է արել անհապաղ դադարեցնել ռազմական գործողությունները եւ իր բոլոր ուժերը դուրս բերել Ուկրաինայից, լիովին պահպանել միջազգային հումանիտար իրավունքը, ապահովել անվտանգ եւ անարգել հումանիտար հասանելիություն եւ օգնություն բոլոր կարիքավորներին: ՆԱՏՕ-ն լրացուցիչ պաշտպանական ցամաքային եւ օդային ուժեր է տեղակայել դաշինքի արեւելյան մասում։
ԱՄՆ-ի նախագահ Ջո Բայդենը նախօրեին հայտարարել է, որ Ռուսաստանը լիակատար պատասխանատվություն է կրում մահերի եւ ավերածությունների համար, որոնք բերում է Ուկրաինայի արեւելքում Մոսկվայի սկսած ռազմական գործողությունը: Իսկ արդեն այսօր Բայդենն ասել է, որ "ամերիկյան զորքերը Եվրոպա կմեկնեն ոչ թե Ուկրաինայում պատերազմելու, այլ ՆԱՏՕ-ին պաշտպանելու համար": "Թեեւ մենք Ուկրաինային 650 մլն դոլարի պաշտպանական աջակցություն ենք տրամադրել, մեր բանակը չի պատրաստվում եւ չի գնա Եվրոպա՝ Ուկրաինայում Ռուսաստանի հետ հակամարտությանը մասնակցելու համար, նրանք կգնան պաշտպանելու ՆԱՏՕ-ի մեր դաշնակիցներին եւ աջակցելու Արեւելքում մեր դաշնակիցներին: ԱՄՆ-ը կպաշտպանի ՆԱՏՕ-ի տարածքի յուրաքանչյուր դյույմը", - ասել է Ջո Բայդենը, հավելելով, որ փետրվարի 25-ին կհրավիրվի ՆԱՏՕ-ի գագաթնաժողով ՝ դաշնակից 30 երկրների ղեկավարների եւ մերձավոր գործընկերների մասնակցությամբ, որտեղ նոր քայլեր կսահմանվեն դաշինքի հետագա ամրապնդման համար:
ԱՄՆ նախագահ Ջո Բայդենը նաեւ հաղորդել է, որ նոր պատժամիջոցներ են սահմանվում ռուսական բանկերի նկատմամբ, որոնց ակտիվները կազմում են առնվազն մեկ տրիլիոն դոլար: Դրանց թվում է ՎՏԲ բանկը: Բացի այդ, ԱՄՆ-ն կսահմանափակի դոլարով, եվրոյով, ֆունտով եւ իենով բիզնես վարելու Ռուսաստանի հնարավորությունները եւ 50 տոկոսով կնվազեցնի բարձրտեխնոլոգիական արտադրանքի ներմուծումը երկիր: Սահմանափակումները կվերաբերեն նաեւ ռուսական արդյունաբերությանը եւ տիեզերական ճյուղին: Պատժամիջոցներ են սահմանվում նաեւ առանձին պաշտոնյաների, խոշոր գործարարների եւ նրանց ընտանիքների նկատմամբ։
Գերմանիայի ֆինանսների նախարար Քրիստիան Լինդները հայտարարել է, որ ՌԴ-ի հետ բիզնեսն արդեն, գործնականում, կփակվի ռուսական բանկերի շրջափակման լույսի ներքո, հնարավոր են միայն առանձին գործարքներ: "Առանձին դեպքում գործարքներն առայժմ հնարավոր են, օրինակ, գազի մատակարարումների դիմաց վճարման համար, կամ՝ որպեսզի գերմանական ընկերությունները կարողանան փոխանցումներ կատարել Ռուսաստանում սեփական դուստր ձեռնարկություններին", - նշել է Լինդները: Նրա խոսքով ՝ "քննարկվում են լրացուցիչ սահմանափակումների" բոլոր տարբերակները։
Ուկրաինայի նախագահ Վլադիմիր Զելենսկին նախօրեին հայտարարել էր Ռուսաստանի հետ դիվանագիտական հարաբերությունները խզելու մասին, իսկ այսօր արդեն հայտարարել Է Մոսկվայի հետ երկխոսության եւ Ռուսաստանի պահանջները կատարելու պատրաստակամության մասին: Նա նաեւ հայտարարել է համընդհանուր զորահավաք: Զելենսկին ափսոսանքով արձանագրել է, որ Ուկրաինան մնացել է միայնակ, և դաշնակիցներից ոչ ոք չի ցանկանում պատերազմել Ռուսաստանի հետ, ինչպես նաև Ուկրաինային ընդունել ՆԱՏՕ։
ՄԱԿ գլխավոր քարտուղար Անտոնիո Գուտերեշն, իր հերթին, կոչ է արել անհապաղ դադարեցնել կրակը և վերականգնել իրավունքի գերակայությունն այս կրիտիկական պահին ։ Եվրամիությունում նույնպես խոստացել են խիստ պատժամիջոցներ սահմանել։
Իսկ Ֆրանսիայի պաշտպանության նախարար Ֆլորանս Պարլին այսօր հայտարարել է, որ Եվրոպայում և ԱՄՆ-ում ոչ ոք Ռուսաստանի դեմ պատերազմի մեջ մտնելու ցանկություն չունի։ "Ոչ մի եվրոպական երկրում և ԱՄՆ-ում ցանկություն չկա պատերազմի մեջ մտնել Ռուսաստանի դեմ։ Այն, ինչ մենք ցանկանում ենք՝ հնարավորինս է շուտ վերջ դնել այդ սարսափելի ներխուժմանը", - ասել է Պարլին RTL ռադիոկայանի եթերում։
Ուկրաինայի իրավիճակի մասին տեղեկատվությունը հակասական է ստացվում։ Լրատվական դաշտը լեփ-լեցուն է ապատեղեկատվությամբ։ ԶԼՄ-ներում արդեն տեղեկություններ են շրջանառվում ռուսական զորքերի կողմից Կիևի գրոհի մասին։
Իրանագետ. Բաքվի՝ իր հզորության մասին քարոզչությունը թաքցնում է երկրի անկարողությունը սեփական բնակչությանը ջրով ապահովելու հարցում
Վերլուծաբան. Երևանի և Մոսկվայի միջև շարունակվող լարվածությունը կարող է հանգեցնել Ռուսաստանի կողմից նոր սահմանափակող միջոցառումների
Քաղաքագետ․ Ռուսաստանը հանրաքվեի միջոցով մտադիր է իմանալ, թե որ "ճամբարն" է ընտրելու Հայաստանը 
Հայաստանն ու Ֆրանսիան քննարկել են ռազմավարական գործընկերության հետագա զարգացումը և ԵՄ հետ համագործակցությունը
Քաղաքագետ. Երկրի առջև ծառացած ռիսկերը հաղթահարելու համար Հայաստանը պետք է նվազեցնի ներքին լարվածության մակարդակը
Զատուլին․ Փաշինյանը շատ էր շտապում Ռուսաստան, քանի որ, իրականում, պարտվել է ընտրություններում
Իրավապաշտպան Ռուբեն Մելիքյանը հեռացվել է ԵՊՀ-ից
Փաշինյանին հեռացրել են "ԻՆՆՈՊՐՈՄ"-ի հյուրերի ցանկից
Զախարովա․ ԵՄ հետ մերձեցման Հայաստանի գիծը ռիսկեր է պարունակում ԵԱՏՄ անդամ երկրների տնտեսական անվտանգության համար
Ժամանակն է, որպեսզի հարավկովկասյան երկրները Հարավային Կովկասի մասին մտածեն որպես մեկ ընդհանուր տարածաշրջանի. Փաշինյան
Փաշինյան․ Հայաստանն ու Ադրբեջանը պետք է հանգիստ թողնեն միմյանց
Մոսկվան Հայաստանի հետ կապված իրավիճակում տեսնում է այն ինտեգրացիոն միավորումներին հարվածելու փորձեր, որոնց մասնակցում է ՌԴ-ն․ Ռուսաստանի նախագահի օգնական
Զախարովա․ Հայաստանը Ռուսաստանի հետ հարաբերություններն ընկալում է որպես գործիք՝ դեպի ԵՄ վերակողմնորոշումը ֆինանսապես ապահովելու համար
Հայաստանի արդարադատության նախարարն ու ԵՄ դեսպանը քննարկել են Երևանի համար վիզաների ռեժիմի ազատականացման օրակարգային հարցեր
Ադրբեջանագետ. Հայաստանի դեմ Ադրբեջանի զավթողական ծրագրերը հնարավոր են դարձել բացառապես Արցախի հարցով Փաշինյանի որոշումների արդյունքում
Զախարովա. Ռուսաստանը բողոքի նոտա է հղել Հայաստանին՝ Գյումրիի «Մայր Հայաստան» հուշահամալիրում տեղի ունեցած վանդալիզմի դեպքի կապակցությամբ
