Արմինֆո. Ադրբեջանի և այժմ արդեն Թուրքիայի խորհրդարանի կողմից "Շուշիի հռչակագրի" վավերացումը Թուրքիայի կողմից Ադրբեջանին կլանելու բաղադրիչներից մեկն է։ ԱրմԻնֆո-ին այդպիսի կարծիք է հայտնել արտակարգ և լիազոր դեսպան, Արցախի Հանրապետության նախկին արտգործնախարար Արման Մելիքյանը։
"Անկարայի համար այս ամենում չափազանց կարևոր է ցույց տալ Ադրբեջանի շահերի, ըստ էության, բացակայությունը։ Վերջիններս թուրքական շահերի մի մասն են, համապատասխանաբար, պետք է քննարկվեն հենց Անկարայի հետ։ Ընդ որում, ոչ միայն Հայաստանի, այլև Ռուսաստանի ու Իրանի կողմից։ Ինչը Հայաստանին, ՌԴ-ին և Իրանին ոչ մի լավ բան չի խոստանում։ Իսկ հարաբերությունների կարգավորման հայ-թուրքական գործընթացի համատեքստում հռչակագրի վավերացումը խոսում է Երեւանի կողմից Անկարայի հետ նաեւ Արցախի խնդրի հարկադրված քննարկման օգտին", - նշել է նա։
Այս ֆոնին Հայաստանի և Արցախի ղեկավարությունը, ըստ դիվանագետի, չունի գործողությունների տարրական հոդաբաշխ ծրագիր, անգամ, առանձին-առանձին։ Էլ չենք խոսում միասնական ծրագրի մասին։ Ինչի լույսի ներքո Երևանի կամ Ստեփանակերտի կողմից "Շուշիի հռչակագրի" տեսական հարթությունից գործնական հարթություն անցմանն արձագանքը կամ դրա բացակայությունն էական քաղաքական նշանակություն ունենալ չի կարող։
Մելիքյանի գնահատմամբ՝ Հայաստանի ղեկավարությունն այսօր թուրք-ադրբեջանական տանդեմի ուժի կիրառման սպառնալիքի քաղաքականության յուրօրինակ պատանդն է։ Իսկ Արցախի ղեկավարությունը 44-օրյա պատերազմի արդյունքում հայտնվել է ՌԴ-ի ազգակցական գրկախառնության ճիրաններում, և ինքնուրույն տեղաշարժվելու կարողություն այսօր չունի։ Այս լույսի ներքո դիվանագետը օրերս Արցախի խորհրդարան մտած "Արցախի տարածքների օկուպացման մասին" օրինագիծը բացարձակապես չի դիտարկում որպես "Շուշիի հռչակագրի" վավերացման նախադրյալ:
Նրա կարծիքով ՝ Հարավային Կովկասում իր վերջին գործողություններում Անկարան առաջնորդվում է հստակ, հաստատված քաղաքական գծով։ Որի շրջանակներում իրականացնում է երկարաժամկետ և ծավալուն նպատակներ հետապնդող ծրագիր։ Վերջինս ենթադրում է որոշակի հաջորդականությամբ քայլերի իրականացում։ Եվ, ամենագլխավորը, վայելում է որոշ խոշոր միջազգային դերակատարների աջակցությունը:
Մեկնաբանելով Ադրբեջանում "ալբանական կրոնական տաճարներում հայերի թողած կեղծ հետքերը" վերացնելու նպատակով աշխատանքային խմբի ստեղծումը' դիվանագետը հիշեցրել է, որ Բաքուն օգտագործել է եւ կօգտագործի ամենաբարբարոսական մեթոդները' հայ ժողովրդին Արցախի դարավոր պատկանելության ցանկացած նյութական վկայություն ոչնչացնելու համար: Այդ կառույցի ստեղծումը Մելիքյանը դիտարկում է Հայաստանի "տարածքային նկրտումները" չեզոքացնելու Ալիևի նպատակներից մեկի իրականացման շրջանակներում։
"Ոչ մի նոր բան այստեղ, մեծ հաշվով, ես չեմ տեսնում։ Սա Նախիջեւանում հայկական հետքի եւ ժառանգության ոչնչացման քաղաքականության շարունակությունն է։ Եվ իր գահակալությունից ի վեր այդ ողջ բարբարոսության հեղինակն անձամբ Ալիևն է։ Ադրբեջանում շարունակում են պատվերով պատմություն գրել։ Բայց արցախցի պատմաբաններն ու հնագետներն էլ անցած տասնամյակների ընթացքում քիչ բան չեն արել Արցախի պատմամշակույթային, նյութական ժառանգության մասին տեղեկատվությանը հանրապետության սահմաններից շատ հեռու հասանելի դարձնելու ուղղությամբ",- ամփոփել է Մելիքյանը ։