Պաշտոնական. Կառավարող ուժը ՀՀ նախագահի պաշտոնի համար առաջադրել է Վահագն Խաչատուրյանի թեկնածությունը

Արմինֆո. Փետրվարի 1-ին «Քաղաքացիական պայմանագիրը» պաշտոնապես կառավարող խմբակցության կողմից որպես ՀՀ  նախագահի թեկնածու նշել է բարձր տեխնոլոգիական արդյունաբերության նախարար Վահագն Խաչատուրյանին:

Ինչպես լրագրողներին հաղորդել է նախագահի ժամանակավոր պաշտոնակատար,  Ազգային ժողովի նախագահ Ալեն Սիմոնյանը, նախագահի թեկնածուի առաջադրման շուրջ քննարկումը տեղի է ունեցել "Քաղաքացիական պայմանագիր" կուսակցության վարչության ձեւաչափով, այնուհետեւ քննարկվել է խմբակցության հետ, քննարկվել են նաեւ այլ թեկնածություններ: "Քննարկումը շատ երկար էր, բերվում էին շատ տարբեր փաստարկներ։ Երկար քննարկումներից հետո նման որոշում ենք կայացրել։ Կարծում եմ, որ ընտրել ենք լավ թեկնածու՝ հաշվի առնելով անցած ճանապարհը, բարեվարքությունը։ Նա բավականին լավ կկատարի իր պարտականությունները", - ասել Է Սիմոնյանը։

Նախագահի պաշտոնակատարը հերքել է խոսակցություններն այն մասին, թե Խաչատուրյանի թեկնածությունը ներկայացրել է գործարար պատգամավոր Խաչատուր Սուքիասյանը։ Սիմոնյանի ասելով, Սուքիասյանը չէր կարող վարչությանն առաջադրել նրա թեկնածությունը եւ չէր կարող ներկա գտնվել կուսակցության վարչության նիստին, քանի որ ՔՊ անդամ չէ: Խաչատուրյանի թեկնածությունն առաջարկել են միանգամից մի քանի հոգի, նշել է խոսնակը, միաժամանակ, դժվարանալով նշել, թե՝ ով ։ "Իմ թեկնածությունը նույնպես քննարկվել է, բայց ես ինքնաբացարկ եմ հայտնել", - հավելել է նա:

Միեւնույն ժամանակ, ինչպես կարծում են ՔՊ-ում, առաջին փուլում նրանց ձայները չեն բավականացնի սեփական թեկնածուին նախագահ ընտրելու համար, բայց նրանք դա կանեն երկրորդ փուլում:

Հունվարի 23-ին ՀՀ նախագահ Արմեն Սարգսյանը հրաժարական է տվել։ Այսօր ՀՀ ԱԺ նախագահը ստորագրել է հանրապետության նախագահ Արմեն Սարգսյանի՝ նախագահի լիազորությունները դադարած համարելու մասին արձանագրությունը:

Հանրապետության սահմանադրության 126-րդ հոդվածի համաձայն ՝ հանրապետության նախագահի արտահերթ ընտրությունն անցկացվում է հանրապետության նախագահի պաշտոնը թափուր մնալուց ոչ շուտ, քան քսանհինգ, եւ ոչ ուշ, քան երեսունհինգ օր հետո ՝ հանրապետության նախագահի պաշտոնանկության, լիազորությունների կատարման անհնարինության, հրաժարականի կամ մահվան դեպքերում: Հանրապետության նախագահի թեկնածու առաջադրելու իրավունք ունի պատգամավորների ընդհանուր թվի առնվազն մեկ քառորդը:

Ինչպես ասվում է ՀՀ հիմնական օրենքի 124-րդ հոդվածում, նախագահ կարող է ընտրվել քառասուն տարին լրացած, վերջին վեց տարում միայն Հայաստանի Հանրապետության քաղաքացի հանդիսացող, վերջին վեց տարում Հայաստանի Հանրապետությունում մշտապես բնակվող, ընտրական իրավունք ունեցող և հայերենին տիրապետող յուրաքանչյուր ոք: Նույն անձը հանրապետության նախագահ կարող է ընտրվել միայն մեկ անգամ։ Հանրապետության նախագահը չի կարող զբաղեցնել որեւէ այլ պաշտոն, զբաղվել ձեռնարկատիրական գործունեությամբ, կատարել վճարովի այլ աշխատանք: Հանրապետության նախագահն իր լիազորությունների իրականացման ընթացքում չի կարող լինել որեւէ կուսակցության անդամ: Հանրապետության նախագահն ընտրվում է Ազգային ժողովի կողմից:

Հանրապետության նախագահ է ընտրվում այն թեկնածուն, որը ստացել է պատգամավորների ընդհանուր թվի ձայների առնվազն երեք քառորդը: Եթե հանրապետության նախագահ չի ընտրվում, ապա անցկացվում է ընտրությունների երկրորդ փուլ, որին կարող են մասնակցել առաջին փուլին մասնակցած բոլոր թեկնածուները: Երկրորդ փուլում հանրապետության նախագահ է ընտրվում այն թեկնածուն, որը ստացել է պատգամավորների ընդհանուր թվի առնվազն երեք հինգերորդի աջակցությունը: Եթե հանրապետության նախագահ չի ընտրվում, ապա անցկացվում է ընտրությունների երրորդ փուլ, որին կարող են մասնակցել երկրորդ փուլում առավել ձայներ ստացած երկու թեկնածուները: Երրորդ փուլում հանրապետության նախագահ է ընտրվում պատգամավորների ընդհանուր թվի ձայների մեծամասնությունն ստացած թեկնածուն: Եթե հանրապետության նախագահ չի ընտրվում, ապա տասնօրյա ժամկետում անցկացվում է հանրապետության նախագահի նոր ընտրություն: Հիշեցնենք, որ ԱԺ-ում 71 մանդատ ունի "Քաղաքացիական պայմանագիր" կուսակցությունը, ընդդիմադիր "Հայաստանը" եւ "Պատիվ ունեմ"-ը ունեն, համապատասխանաբար, 29 եւ 6 մանդատ: