Արմինֆո. Հունվարի 16-ին տեղի է ունեցել «Համահայկական երիտասարդական դմադրություն» շարժման առցանց ընդհանուր հավաքը, որին մասնակցել են 20 երկրներից շարժմանը միացած 70-ից ավել երիտասարդական կազմակերպություններ՝ շուրջ 115 ներկայացուցիչներով։
Վերջիններս տարբեր ոլորտներում գործող (քաղաքական, եկեղեցական, կրթամշակութային, բարեսիրական, մարզական, ուսանողական) եւ տարբեր հայացքներ ունեցող կազմակերպություններ են, որ համախմբված են շարժման տեսլականի, նպատակների եւ օրակարգի շուրջ։
Շարժման հաղորդագրության համաձայն, հանդիպման բանախոսն էր Տավուշի թեմի առաջնորդ գերաշնորհ Բագրատ Եպիսկոպոս Գալստանյանը։ Նա, կարեւորելով արտաքին թշնամու հանդեպ վրեժի ոգով առաջնորդվելը եւ ազգային արժանապատության վերականգնումը, հրամայական է համարել պատերազմի վախից ձերբազատվելը, ինչպես նաեւ հայ երիտասարդության գաղափարականացումը, որի արդյունքով պիտի ծնվի համատարած ժողովրդական պոռթկումը։
ՀՅԴ բյուրոյի երիտասարդական գրասենյակի ներկայացուցիչ Արշակ Մեսրոպյանը ներկայացրել է դիմադրության շարժման պայքարի հինգ հիմնական ուղղություններն ու առաջիկա աշխատանքները, որոնք իրականացվելու են։
Առաջիկա քայլերի վերաբերյալ տեղի է ունեցել մտքերի փոխանակում։ Շեշտը դրվել է Արցախում եւ Սյունիքում աշխատանքները կենտրոնացնելու եւ սփյուռքյան համայքների երիտասարդությանը դիմադրության գաղափարի շուրջ կազմակերպելու վրա։ «Հայ երիտասարդությունը չի հանդուրժում եւ չի համակերպվել այսօրվա իրականության հետ։ Համահայկական երիտասարդական դիմադրության ցանցը օրեցօր ընդլայնվում է եւ իր ամբողջ կարողականությունն ու ներուժը պիտի կենտրոնացնի ներկա իրավիճակը շտկելու ուղղությամբ», - ասվում է հաղորդագրությունում։