Արմինֆո.ԵԱՀԿ Մինսկի խմբի շրջանակներում Լեռնային Ղարաբաղի հակամարտության կարգավորման հարցում տեղաշարժը քիչ է։ Այդ մասին հունվարի 17-ին առցանց ճեպազրույցի ժամանակ հայտարարել Է ԵԱՀԿ-ին առընթեր Ռուսաստանի մշտական ներկայացուցիչ Ալեքսանդր Լուկաշեւիչը, պատասխանելով այն հարցին, թե արդյոք 2021 թվականին առաջընթաց եղել է ԵԱՀԿ ՄԽ շրջանակներում ղարաբաղյան հակամարտության կարգավորման հարցում։
"Դե այդ ուղղությամբ տեղաշարժերը քիչ էին։ Գլխավոր տեղաշարժը, որն ապահովվել է Ռուսաստանի եւ նրա նախագահի ակտիվ մասնակցությամբ, մարտական գործողությունների դադարեցումն է, հրադադարի ռեժիմի ապահովումը: Թեեւ, 2021 թվականի ընթացքում եղել են լուրջ միջադեպեր, որոնք այդ ռեժիմը որոշակիորեն խաթարել են։ Սակայն, այնուամենայնիվ, դա թույլ է տվել հասնել տարածաշրջանային մասշտաբի այլ հարցերի քննարկման. դա նաեւ եռակողմ աշխատանքային խումբն է Հայաստանի, Ռուսաստանի եւ Ադրբեջանի փոխվարչապետների մակարդակով՝ տարածաշրջանում տնտեսական եւ տրանսպորտային կապերի ապաշրջափակման ուղղությամբ, դա նաեւ "3+3" խորհրդատվական հարթակի գործարկումն է, դա նաեւ ռուսական խորհրդատվական օգնություն է ադրբեջանահայկական սահմանի սահմանազատման եւ սահմանագծման աշխատանքների կարգավորման գործում",- նշել է Լուկաշեւիչը, հավելելով, որ դա հակամարտության թեմայից առանձին է, երկկողմ հարց է, սակայն, այդուհանդերձ, անդրադառնում է տարածաշրջանում իրադրության վրա:
Ընդ որում, նա արձանագրել է, որ Ռուսաստանը մտահոգված է, որ ԵԱՀԿ Մինսկի խմբի համանախագահների եռյակը չի կարող այցելել Լեռնային Ղարաբաղ: "Ի՞նչն է մեզ մտահոգում: Որ եռանախագահներին մինչ օրս չի հհաջողվում այցելել տարածաշրջան, ծանոթանալ իրավիճակին եւ նախանշել մարդկանց միջեւ շփումների հաստատման, մարդասիրական եւ որոշ այլ ասպեկտների խնդիրների լուծման գործում կողմերին աջակցության որոշակի միջոցառումներ", - հայտարարել է Լուլաաշեւիչը, հիշեցնելով ԵԱՀԿ գործող նախագահի անձնական ներկայացուցիչ Անջեյ Կասպրշիկի գործունեության մանդատի մասին:
Դրա հետ մեկտեղ, նա հավելել է, որ եռանախագահների եւ Հայաստանի, Ադրբեջանի եւ Ռուսաստանի ղեկավարների վերջին հայտարարությունները տրամադրում են այն բանին, որ, այնուամենայնիվ, առճակատման պարույրը կկրճատվի, եւ կգտնվեն փոխընդունելի փոխզիջումային լուծումներ, այդ թվում՝ նաեւ այդ առանցքային քաղաքական խնդրի վերաբերյալ:
Նա ուշադրություն է հրավիրել այն հանգամանքի վրա, որ ամեն ինչ, բնականաբար, կախված է կողմերի քաղաքական կամքից, և այդ կամքն առկա է։
Միեւնույն ժամանակ, ռուսաստանցի դիվանագետը հույս է հայտնել, որ ամենամոտ ժամանակներս համանախագահների "եռյակին", այնուամենայնիվ, կհաջողվի լինել տարածաշրջանում, խոսել Հայաստանի եւ Ադրբեջանի քաղաքական ղեկավարության հետ, նախանշել գործողությունների որոշակի ծրագիր:
Լուկաշեւիչը եւս մեկ անգամ ընդգծել է խնդրի բարդությունը եւ նշել, որ այն նոր չափումներ է ստացել 2020 թվականի սրացումից հետո: Ընդ որում, նա կարծում է, որ Հայաստանի, Ադրբեջանի եւ Ռուսաստանի ղեկավարների եռակողմ հայտարարությունները հասկանալ են տալիս, որ կա ներուժ ինչպես երկու հարեւան երկրների միջեւ, այնպես էլ, ընդհանուր առմամբ, ողջ տարածաշրջանում իրավիճակի կարգավորման համար: Վերջում Լուկաշևիչը նշել է այդ հարթությունում գործընթացներն ակտիվացնելու և խնդրի լուծում գտնելու հարցում աջակցություն ցուցաբերելու գործում ԵԱՀԿ Լեհական նախագահության կամքի առկայությունը: