Երկուշաբթի, 17 Հունվարի 2022 14:25

Արմինֆո. Ֆրանսիայի Սենատի "Հանրապետականներ" (LR) խմբակցության ղեկավար Բրունո Ռետայոն, Ֆրանսիայի Ազգային ժողովում նույն խմբակցության ղեկավար Դամիան Աբադան եւ Եվրախորհրդարանում նույն խմբակցության ղեկավար Ֆրանսուա-Քսավյե Բելամին նամակով դիմել են Ֆրանսիայի նախագահ Էմանուել Մակրոնին ՝ ֆրանսիացի քաղաքական գործիչ Վալերի Պեկրեսի հասցեին Ադրբեջանի նախագահ Իլհամ Ալիեւի սպառնալիքների կապակցությամբ:

 

Ինչպես հաղորդում է "Le Journal du Dimanche" պարբերականը, LR-ի պատգամավորների մեծամասնության, սենատորների եւ Եվրախորհրդարանի  պատգամավորների (մոտ 250 քաղաքական գործիչների) ստորագրած նամակում Մակրոնին կոչ է արվում Ֆրանսիայի անունից պահանջել Ադրբեջանի նախագահ Իլհամ Ալիեւից ներողություն խնդրել "Հանրապետականներ" կուսակցությունից Ֆրանսիայի նախագահի թեկնածու Վալերի Պեկրեսից՝ քաղաքական գործչի հասցեին սկանդալային արտահայտությունների համար:

 

Մակրոնին հղված նամակում խորհրդարանականները արձանագրել են, որ Վալերի Պեկրեսի 'Հայաստան կատարած այցից հետո Ադրբեջանի նախագահ Իլհամ Ալիևը հունվարի 12-ին հայտարարել է, որ եթե Ադրբեջանում իմանային Վալերի Պեկրեսի' վերջերս Լեռնային Ղարաբաղ կատարած «անօրինական» այցի մասին, ապա այնտեղից նրան դուրս չէին թողնի: "Այս աղմկահարույց հայտարարությունները Ֆրանսիան չի կարող անպատասխան թողնել, քանի որ այդ հայտարարությունը ոչ միայն Ֆրանսիայի պետական գործչի, Իլ դը Ֆրանս տարածաշրջանի նախագահի եւ Ֆրանսիայի նախագահի թեկնածուի նկատմամբ ատելության կոչ է, այլեւ անթաքույց սպառնալիք ՝ ուղղված ֆրանսիացի ժողովրդին, Ֆրանսիայի կառավարությանը եւ նրա ներկայացուցիչներին ՝ հաշվի առնելով Հայաստանի հետ մեր երկրի հարաբերությունները: Արդյո՞ք մենք պետք է հանդուրժենք, որ որեւէ այլ պետության կառավարություն արգելի ֆրանսիացի ժողովրդի կողմից ընտրված ներկայացուցիչներին այցելել այն տարածք, որը, հիշեցնենք, չի պատկանում տվյալ պետությանը, սպառնա ոտնձգություններ կիրառել նրանց ազատության նկատմամբ, ընդհուպ մինչեւ նրանց ֆիզիկական անվտանգությունը", - ասված Է օրենսդիրների նամակում:

 

Այս համատեքստում պատգամավորները հիշեցրել են Ալիևին, որ ֆրանսիացիներն ազատ են, իսկ Ֆրանսիան ՝ ինքնիշխան պետություն։ "Ֆրանսիան չի կարող ընդունելի համարել որեւէ սպառնալիք, չպետք է տեղի տա որեւէ ահաբեկման դեպքում։ Եվ, առավել ևս, երբ դրանք բխում են բռնապետից,  որը հայերին անվանում է "շներ", որը Հայաստանի հետ հակամարտության ընթացքում կիրառել է արգելված զինատեսակներ և ջիհադական վարձկանների, մշտապես ցույց է տվել, թե որքան քիչ է նա գնահատում մարդկային արժանապատվությունը։ Ուստի, պարոն նախագահ, մենք խնդրում ենք Ֆրանսիայի անունից պահանջել, որ Ադրբեջանի Հանրապետությունը պաշտոնապես ներողություն խնդրի, և եթե կարճ ժամկետում դա տեղի չունենա, մենք պահանջում ենք հետ կանչել Ֆրանսիայի դեսպանին Ադրբեջանից։ Սա ինչպես Ֆրանսիայի արժեքների, այնպես էլ նրա պատվի հարց է։

 

Խոսքը նաև այն աջակցության մասին է, որը մենք պարտական ենք հայ ժողովրդին, որը, չնայած Ադրբեջանի ագրեսիային, սադրանքներին և նվաստացումներին, մնում է հաստատուն և արժանապատիվ փորձություններում։ Ֆրանսիայի դիրքորոշումը պետք է հավասար լինի Հայաստանի օրինակին, որն արժանապատվորեն անցնում է տառապանքի բովով, ինչը հիացմունք է առաջացնում", - ասվում է նամակում, որն ստորագրած օրենսդիրների ամբողջական ցանկը հասանելի է սկզբնաղբյուրում։

 

Հիշեցնենք, որ Ֆրանսիայի նախագահի թեկնածու Վալերի Պեկրեսը Հայաստան եւ Արցախ է այցելել 2021 թվականի դեկտեմբերի 21-23-ը: Այցի ընթացքում նրան ուղեկցել են Ֆրանսիայի նախկին արտգործնախարար, նախկին եվրահանձնակատար Միշել Բարնյեն, ինչպես նաեւ Ֆրանսիայի Սենատի հանրապետական խմբակցության ղեկավար Բրունո Ռետայոն: Օրերս ադրբեջանական լրատվամիջոցներին տված հարցազրույցում Ալիևը հայտարարել է, որ Ադրբեջանը տեղյակ չէր Վալերի Պեկրեսի Լեռնային Ղարաբաղ կատարած այցի մասին, իսկ եթե իմանար, ապա ակնհայտ է, որ թույլ չէր տա նրան լքել ԼՂՀ-ը։