Արմինֆո. Անվտանգության երաշխիքների շուրջ ընթացող բանակցությունների երեք փուլերում մենք կտեսնենք ՌԴ-ի և ԱՄՆ-ի միջև բանակցային գործընթացի սկիզբ, որը կշարունակվի հաջորդ փուլերում։ Այդպիսի կարծիք է հայտնել Ռուսաստանի արտաքին և պաշտպանական քաղաքականության խորհրդի նախագահության նախագահ Ֆյոդոր Լուկյանովը։
Մեկնաբանելով բանակցությունների մեկնարկի նախաշեմին Մոսկվայի եւ Վաշինգտոնի անզիջում հռետորաբանությունը, մասնավորապես, ԱՄՆ պետքարտուղարի առաջին տեղակալ Ուենդի Շերմանի հայտարարությունն այն մասին, որ Վաշինգտոնը հրաժարվում է Մոսկվայի հետ երկկողմ ձեւաչափով քննարկել Եվրոպայում անվտանգության ապահովման հարցերը, վերլուծաբանն ընդգծել է բանակցությունների մասնակիցների հրապարակային հռետորաբանության եւ իրական մտադրությունների միջեւ տարբերությունը: Նրա կարծիքով, եթե դատենք Վաշինգտոնի եւ Մոսկվայի բանակցություններին նախորդող հրապարակային հռետորաբանությունից, դրանց արդյունքում որեւէ պայմանավորվածության մասին խոսք անգամ լինել չի կարող։ Սակայն, իրականում, իրավիճակը, ըստ Լուկյանովի, մի փոքր այլ է։
Հունվարի 10-ին Ժնեւում ԱՄՆ մշտական ներկայացուցչությունում մամուլի համար փակ ձեւաչափով կայացել է ԱՄՆ-ի եւ ՌԴ-ի դիվանագետների եւ զինվորականների նախնական հանդիպումը, որը տեւել է 7,5 ժամ: Անվտանգության երաշխիքների շուրջ բանակցությունները կընթանան երեք փուլով: Հունվարի 10-ին տեղի է ունեցել հանդիպում Ժնեւում, հունվարի 12-ին Բրյուսելում տեղի կունենա Ռուսաստան-ՆԱՏՕ խորհրդի նիստ, հունվարի 13-ին նախատեսվում են խորհրդատվություններ Վիեննայի ԵԱՀԿ հարթակում: ՌԴ փոխարտգործնախարար Ռյաբկովը խոսակցությունը բնութագրել է որպես բարդ, բայց գործնական։ Նշելով ԱՄՆ-ի դիրքորոշումը լսելու Մոսկվայի պատրաստակամությունը' ռուս դիվանագետն ընդգծել է, որ կառուցողական երկխոսություն հնարավոր է միայն ՆԱՏՕ-ում Վրաստանի և Ուկրաինայի ապագայի մասին բուդապեշտյան գագաթնաժողովի որոշումների վերանայման համատեքստում:
Ընդ որում, Լուկյանովը բնավ չի կարծում, որ Վաշինգտոնի բանակցային օրակարգը կառուցվելու է, օրինակ, ԵՄ արտաքին գործերի գերագույն ներկայացուցիչ Ժոզեպ Բորելի հայտարարությունների վրա, որը Եվրոպայի անվտանգությունը շաղկապում է Ուկրաինայի անվտանգության հետ: Առաջին հերթին՝ հաշվի առնելով, նրա գնահատմամբ, Բրյուսելի չափազանց պասիվ, ուստիեւ, երկրորդական դիրքորոշումը տվյալ գործընթացում։
Լուկյանովի կարծիքով, ընդհանուր առմամբ, Եվրոպայում անվտանգության երաշխիքների շուրջ Մոսկվայի հետ բանակցություններում ՆԱՏՕ-ի գծով Արեւելյան Եվրոպայի դաշնակիցների կարծիքը Վաշինգտոնը հաշվի կառնի միայն որոշակի չափով: Թեեւ, Արեւելյան Եվրոպայի եւ բալթյան երկրները, տեղի ունեցածը գնահատելով որպես բավականին լուրջ մարտահրավեր սեփական անվտանգության համար, կանեն հնարավոր ամեն ինչ՝ ՌԴ-ի եւ ԱՄՆ-ի միջեւ պայմանավորվածությունները բարդացնելու նպատակով: "Ի դեպ, այստեղ հարկ է նշել այդ հնարավորությունների բավականին սահմանափակ լինելը։ Ի վերջո, ԱՄՆ-ը մի երկիր է, որը որոշումներ է կայացնում սեփական շահերից ելնելով։ Եվ, ինչ-որ չափով հաշվի առնելով դաշնակիցների կարծիքը, Վաշինգտոնն, ամեն դեպքում, որոշում կայացնելիս, առաջին հերթին, առաջնորդվելու է սեփական կարիքներով։ Համապատասխանաբար, եթե մեզ հաջողվի լրջորեն խոսել եւ պայմանավորվել Վաշինգտոնի հետ, մնացած բոլոր հարցերը կլուծվեն ի հայտ գալուն զուգընթաց եւ ըստ կարեւորության աստիճանի", - ամփոփել է վերլուծաբանը։
Դեկտեմբերի 17-ին ՌԴ ԱԳՆ-ն հրապարակել է անվտանգության երաշխիքների մասին ԱՄՆ-ի եւ ՆԱՏՕ-ի հետ Ռուսաստանի պայմանագրերի նախագծերը: Փաստաթղթերից հետեւում է, որ դաշինքը պետք է հրաժարվի որեւէ ռազմական գործունեություն ծավալելուց Ուկրաինայի եւ Արեւելյան Եվրոպայի, Անդրկովկասի եւ Կենտրոնական Ասիայի պետությունների տարածքում: Ենթադրվում է նաև, որ Ռուսաստանն ու ՆԱՏՕ-ն պարտավորություններ կստանձնեն չստեղծել պայմաններ, որոնք մյուս կողմից կարող են գնահատվել որպես սպառնալիք։