Չորեքշաբթի, 29 Դեկտեմբերի 2021 13:51

Արմինֆո. Հորադիզ-Մեղրի-Օրդուբադ-Ջուլֆա-Երասխ երկաթուղային տեղամասի շահագործման հանձնումը լուրջ ներդրումներ կբերի Հայաստան։ ԱրմԻնֆո-ին այդպիսի կարծիք է հայտնել "Հանրապետություն" կուսակցության նախագահ, Հայաստանի նախկին վարչապետ Արամ Սարգսյանը։

 

Դեկտեմբերի 16-ին ՀՀ վարչապետ Նիկոլ Փաշինյանը հաստատել է Ադրբեջանի նախագահի հետ Սոչիում և Բրյուսելում ձեռք բերված պայմանավորվածությունը Հորադիզ-Մեղրի-Օրդուբադ-Ջուլֆա-Երասխ երկաթգծի կառուցման վերաբերյալ: Ինչի կապակցությամբ հանձնարարել է նախապատրաստական աշխատանքներ սկսել դրա հայկական հատվածներում շինարարության համար։ Նրա խոսքով ՝ Հայաստանն ու Ադրբեջանը նախատեսում են շինարարությունն ավարտել 2-3 տարվա ընթացքում։

 

"Հասկանալի է, որ Հայաստանի տարածքում տեղամասը պետք է վերականգնվի գրեթե զրոյից, քանի որ ռելսերը եւ փայտակոճերն ապամոնտաժվել են դեռեւս 2000-ական թվականներին եւ վաճառվել են Իրանին։ Իմ վարչապետության կարճ ժամանակահատվածում ես դեմ հանդես եկա նման "բիզնեսին", արգելելով վաճառքը, որից հետո բախվեցի այն ժամանակվա նախագահ Ռոբերտ Քոչարյանի լուրջ դժգոհությանը", - նշել է նա։

 

Ամեն դեպքում, Սարգսյանի գնահատմամբ, նախագիծը բավականին հետաքրքիր է ոչ միայն անմիջական մասնակիցների, այլեւ պոտենցիալ ներդրողների համար, ինչը, նրա կարծիքով, ապագայում Հայաստանի տնտեսությունում զգալի ներդրումներ կատարելու գրավական է: Սարգսյանի գնահատմամբ, որպես կանոն, ցանկացած տարածք, որտեղ աշխատում են երկաթուղիներ, միշտ ներդրողների հետաքրքրությունն է առաջացնում։ Եվ օտարերկրյա ներդրողները ներդրումներ կկատարեն Հայաստանում թեկուզ այն պատճառով, որ այդ ենթակառուցվածքը կապելու է Թուրքիայի և Իրանի 80 միլիոնանոց շուկաները։

 

ՀՀ տարածքային կառավարման եւ ենթակառուցվածքների նախարարության նախնական հաշվարկների համաձայն, Հայաստանի տարածքում Հորադիզ-Մեղրի-Օրդուբադ-Ջուլֆա-Երասխ երկաթուղու վերականգնումը կարժենա ավելի քան 226 մլն դոլար: 221 մլն դոլար անհրաժեշտ է Մեղրիի 45- կիլոմետրանոց հատվածի վերականգնման համար, եւս 5 մլն դոլար՝ Երասխում կիլոմետրանոց հատվածի վերականգնման համար: