Հայտարարություն. Գերիների հարցով բարձրաստիճան պաշտոնյաների իրականությանը չհամապատասխանող հայտարարությունները խոչընդոտում են իրավապաշտպան գործունեությունը

Արմինֆո.Գերիների հարցով բարձրաստիճան պաշտոնյաների իրականությանը չհամապատասխանող հայտարարությունները խոչընդոտում են իրավապաշտպան գործունեությունը:

Այդ մասին ասվում է Հայաստանի մարդու իրավունքների պաշտպան Արման Թաթոյանի, ՄԻԵԴ-ում հայ գերիների շահերի պաշտպան, իրավապաշտպան Սիրանուշ Սահակյանի և ՄԻԵԴ-ում հայ գերիների շահերի պաշտպան, իրավապաշտպան Արտակ Զեյնալյանի համատեղ հայտարարությում՝ երեկ ՀՀ Ազգային ժողովի նախագահ Ալեն Սիմոնյանի մասնակցությամբ հրապարակված տեսանյութի առնչությամբ, որում նա իրականությանը չհամապատասխանող գնահատականներ է տալիս ՀՀ մարդու իրավունքների պաշտպանի և իրավապաշտպանների 2021 թվականի օգոստոսի 9-ի «Ադրբեջանի պատասխանատվությունը հայ գերիներին խոշտանգելու և անմարդկային վերաբերմունքի ենթարկելու համար» արտահերթ հրապարակային զեկույցին: Համատեղ հայտարարության մեջ, ասվում է․

«Նախ` անթույլատրելի ենք համարում առանց անձի գիտակցված համաձայնության նրա մասնավոր հարաբերությունները, երկխոսությունը տեսաձայնագրելն ու դա տարածելը:

Համատեղ արտահերթ զեկույցին վերագրումների և հնչած որակումների կապակցությամբ արձանագրում ենք՝

1․ ՀՀ Ազգային ժողովի նախագահ Ալեն Սիմոնյանը համատեղ արտահերթ զեկույցին վերագրում է գոյություն չունեցող փաստեր, ինչպես օրինակ, նշում է, որ զեկույցում արձանագրվել են հայրենադարձված գերիների բռնաբարության դեպքեր. մինչդեռ, զեկույցում որևէ խոսք չկա բռնաբարության մասին:

Համատեղ արտահերթ հրապարակային զեկույցում գերիներից որևէ մեկի անձնական տվյալ, այդ թվում՝ լուսանկար ու տեսանյութ, երբևէ չի հրապարակվել։

2. Տեղեկացնում ենք, որ համատեղ արտահերթ հրապարակային զեկույցում գերիների խոշտանգման փաստերը հաստատելու համար գործածվել են փաստահավաք աշխատանքի միջազգային չափանիշները։ Այս առումով, խոշտանգման փաստի հաստատման վերաբերյալ փաստահավաք աշխատանքը չի ենթադրում, որ փաստահավաքություն իրականացնող իրավապաշտպանը պետք է անպայման ներկա կամ մասնակից լինի խոշտանգման պրոցեսին։ Բարձր պաշտոն զբաղեցնող անձինք պարտավոր են տարանջատել փաստահավաք աշխատանքը և հանցակցությունը։

3. Համատեղ արտահերթ հրապարակային զեկույցը չի նույնականացնում և չի բացահայտում հայրենադարձված այն գերիներին, որոնց նկատմամբ կիրառվել են կտտանքներ ու անմարդկային վերաբերմունք։ Դրա փոխարեն Համատեղ արտահերթ հրապարակային զեկույցով վեր են հանվում այն օրինաչափությունները և խոշտանգման այն ընդհանուր ձևերը, որոնք, որպես կանոն, կիրառվել են հայ գերիների նկատմամբ Ադրբեջանի Հանրապետությունում։ Միաժամանակ, Համատեղ արտահերթ հրապարակային Զեկույցը նշում է, որ գերիների նկատմամբ կիրառված բռնության ձևերն ու միջոցները յուրաքանչյուրի դեպքում եղել են տարբեր։

4. Նշվածից բացի, հայրենադարձված հայ գերիներն իրենք ինքնուրույն տարբեր լրատվամիջոցների տվել են հարցազրույցներ՝ բաց կերպով ներկայացնելով այն կտտանքները, որոնց ենթարկվել են Ադրբեջանի Հանրապետությունում գտնվելու ընթացքում։  Ավելին, նախաքննության ընթացքում խոշտանգման ու անմարդկային վերաբերմունքի մասին հայրենադարձված հայ գերիների ցուցմունքներ հրապարակվել են հենց ՀՀ նախաքննական մարմինների կողմից։

5․Հարկ ենք համարում ընդգծել, որ հայ գերիներին խոշտանգելու և անմարդկային վերաբերմունքի ենթարկելու վերաբերյալ տվյալներ միջազգային կառույցներին ներկայացնելիս վերացական բնույթի տեղեկությունների տրամադրումը չունի արդյունավետություն: Միջազգային իրավական գործընթացներ նախաձեռնելիս անհրաժեշտ են մանրակրկիտ ու կոնկրետ տվյալներ, այլ ոչ թե հայտարարություններ ու պնդումներ։

Ուստի, բարձրաստիճան պաշտոնյաներին խստիվ հորդորում ենք զերծ մնալ նման զգայուն հարցերի վերաբերյալ հրապարակային հանդես գալուց, չշահարկել դրանք քաղաքական կամ այլ նպատակներով, քանի որ դրանք Ադրբեջանը հաջողությամբ գործածում է միջազգային կառույցների, առջև, այդ թվում՝ դատական, պաշտպանվելու ի շահ իրեն և ի վնաս՝ հայ գերիների իրավունքների:

Բարձրաստիճան պաշտոնյաների կողմից մասնագիտական զեկույցների վերաբերյալ իրականությանը չհամապատասխանող հայտարարությունները կամ դրանց տրված որակումները խոչընդոտներ են առաջացնում իրավապաշտպան գործունեության համար»:

Ինչպես ավելի վաղ հաղորդել էր ԱրմԻնֆոն, ԱԺ նախագահ Ալեն Սիմոնյանը նախօրեին հայտնվել է հերթական աղմկահարույց սկանդալի կենտրոնում: Այս անգամ առիթ են հանդիսացել արդեն մեկ տարուց ավելի Ադրբեջանում գերության մեջ պահվող ռազմագերիների վերաբերյալ  խոսնակի արած հայտարարությունները։ Համաշխարհային սարդոստայնից սկիզբ առած տեսագրության մեջ Սիմոնյանը, անդրադառնալով ռազմագերիների խնդրին, նշում է, որ գերության մեջ գտնվող զինծառայողներին համարում է արդեն "գոյություն չունեցող"։ Ընդ որում, որպես օրինակ նա նշում է Իսրայելը, իբր, երբ ահաբեկիչները առեւանգում են ինքնաթիռը, Թել Ավիվում ոչ թե բանակցություններ են վարում ահաբեկիչների հետ, այլ ոչնչացնում են ինքնաթիռը: Սակայն, ավելի ուշ, տեսանյութի ամբողջական տարբերակում, ռազմագերիների մասին Սիմոնյանի խոսքերի իմաստը բոլորովին այլ ենթատեքստ է ձեռք բերում։ Սիմոնյանն իր ասածները հիմնավորում է այն բանով, որ ռազմագերիները չպետք է գործիք դառնան Ադրբեջանի ձեռքում՝ քաղաքական դիվիդենտներ ստանալու համար ։ Ուշագրավն այն է, որ ԱԺ նախագահն անվերապահորեն վստահեցնում է, որ բոլոր գերված զինծառայողները վախկոտներ են, ովքեր վայր են դրել զենքը և փախել են մարտի դաշտից, մոլորվել են և հայտնվել գերության մեջ։ Այդ հայտարարություններն արվել են 44-օրյա պատերազմի գործով վերջնական քննության բացակայության ֆոնին։ Այս հայտարարությունը վրդովմունքի ալիք է բարձրացրել հայ հասարակության շրջանում։ Ավելին, երեկվանից ռազմագերիների հարազատները բողոքի ակցիաներ են անցկացնում ինչպես Գյումրիում, այնպես էլ Երեւանում ՝ պետական կառույցների շենքերի առջեւ։ Նրանք պահանջում են հանդիպում Ալեն Սիմոնյանի հետ։