Արմինֆո.Վերջին շրջանում դիտվող Թուրքիայի տնտեսական թուլացմամբ Ադրբեջանի մտահոգությունը հանգեցնում է ՌԴ դիրքերի ամրապնդման տարածաշրջանում և Ադրբեջանում։ ԱրմԻնֆո-ին այդպիսի կարծիք է հայտնել քաղաքագետ Ստեփան Դանիելյանը։
"Կարող եմ ասել, որ այդ անհանգստությունը նկատելի է, այն արտահայտվում է հատկապես Էրդողանի դիրքերի նկատելի թուլացման լույսի ներքո։ Նշենք նաև Արևմուտքի լուրջ աշխատանքը Թուրքիային զսպելու և նրա առաջնորդի էքսպանսիոնիստական նկրտումները սահմանափակելու ուղղությամբ։ Միանգամայն բնական է, որ այս ամենն էապես թուլացնում է Ադրբեջանի դիրքերը՝ Բաքվին հաղորդելով որոշակի պասիվություն Մոսկվայի և Երևանի հետ բանակցություններում", - նշել է նա։
Դանիելյանը կարծում է, որ թուրքական տնտեսության հնարավորությունների անհամապատասխանությունը Էրդողանի թյուրքական աշխարհի կառուցման գաղափարների կյանքի կոչմանը նպատակաուղղված ծրագրերին՝ հեռացրել է դրանց իրագործումը։ Ինչը նպաստում է նաև Ալիևի դիրքերի որոշակի մեղմացմանը և, համապատասխանաբար, ռուսական ազդեցության ամրապնդմանը և ռուսական օրակարգի կյանքի կոչմանը ինչպես բանակցային գործընթացում, այնպես էլ՝ հենց Ադրբեջանում։
Այս թեզի հաստատումը Դանիելյանը համարում է Պուտին - Փաշինյան - Ալիև եռակողմ հանդիպման ընթացքում առավել սուր հարցերից և Երևանի ու Բաքվի միջև առկա խնդիրներից՝ Արցախի կարգավիճակից և Սյունիքով Ալիևի պահանջած միջանցքից խուսափելը: Առաջխաղացում է գրանցվել միայն Մոսկվային հետաքրքրող սահմանների սահմանազատման և սահմանագծման հարցերում։ Այսպիսով, Մոսկվան, նրա կարծիքով, դեկտեմբերի 15-ին Բրյուսելում կայանալիք Փաշինյան-Ալիև հանդիպման նախօրեին հերթական անգամ ցույց տվեց տարածաշրջանում իր հնարավորությունները։
"Սոչիի բանակցությունների ընթացքում հենց նույն Արցախի մասին հիշատակումների բացակայությունը, Կարծում եմ, նույնպես Մոսկվայի նախաձեռնած այդ փոխզիջման մաս էր։ Այսպիսով, Արցախի հարցի, նրա կարգավիճակի քննարկման հետաձգումը ապագային Սոչիում ձեռք բերված փոխզիջումներից մեկն էր։ Եվ այս ամենում մեծ դեր խաղացին տարածաշրջանային վերջին ազդակները՝ Թուրքիայում իրադարձությունների զարգաման հնարավոր սցենարի վերաբերյալ լիակատար անհայտությունը", - ամփոփել է քաղաքագետը։
Նոյեմբերի 26-ին Սոչիում կայացած հանդիպման արդյունքում ընդունված Հայաստանի, Ռուսաստանի եւ Ադրբեջանի ղեկավարների համատեղ հայտարարության մեջ վերահաստատվում է 2020թ. նոյեմբերի 9-ի եւ 2021թ. հունվարի 11-ի հայտարարությունների բոլոր դրույթների հետագա հետեւողական կատարման ու անվերապահ պահպանման հանձնառությունը: Կողմերը նաեւ պայմանավորվել են ակտիվացնել համատեղ ջանքերը ՝ ուղղված 2020 թվականի նոյեմբերի 9-ի եւ 2021 թվականի հունվարի 11-ի հայտարարություններից բխող մնացած խնդիրների շուտափույթ լուծմանը՝ նշելով ՌԴ խաղաղապահ զորակազմի կարեւոր ներդրումը տարածաշրջանում իրադրության կայունացման եւ անվտանգության ապահովման գործում:
Կողմերը պայմանավորվել են նաև քայլեր ձեռնարկել հայ-ադրբեջանական սահմանին կայունության և անվտանգության մակարդակի բարձրացման ուղղությամբ և գործը տանել սահմանի դելիմիտացիայի երկկողմ հանձնաժողովի ստեղծմանը եւ հետագա դեմարկացիայի՝ կողմերի խնդրանքով Ռուսաստանի Դաշնության խորհրդատվական աջակցությամբ: Բարձր են գնահատել եռակողմ աշխատանքային խմբի գործունեությունը տարածաշրջանում բոլոր տնտեսական և տրանսպորտային կապերի ապաշրջափակման ուղղությամբ: Ընդգծել են կոնկրետ նախագծերի շուտափույթ գործարկման անհրաժեշտությունը ՝ տարածաշրջանի տնտեսական ներուժը բացահայտելու նպատակով։ ՌԴ-ն այսուհետ եւս անհրաժեշտ աջակցություն կցուցաբերի Ադրբեջանի եւ Հայաստանի միջեւ հարաբերությունների կարգավորման, երկու ժողովուրդների միջեւ վստահության մթնոլորտի ձեւավորման, ինչպես նաեւ տարածաշրջանում բարիդրացիական հարաբերությունների կառուցման համար: