Արմինֆո. Նոյեմբերի 26-ին Սոչիում նախատեսված եռակողմ հանդիպումը պայմանավորված է Բրյուսելում "Արեւելյան գործընկերության" դեկտեմբերյան գագաթնաժողովի շրջանակներում Նիկոլ Փաշինյանի եւ Իլհամ Ալիեւի միջեւ Վլադիմիր Պուտինի հետ չհամաձայնեցված որեւէ պայմանավորվածության հասնելու հնարավորությունը կանխելու վերջինիս ձգտմամբ: ԱրմԻնֆո-ին այդպիսի կարծիք է հայտնել "Ազատ քաղաքացի" հասարակական կազմակերպության նախագահ Հովսեփ Խուրշուդյանը։
"Իմ կարծիքով, Ռուսաստանի նախագահն Սոչիի հանդիպման ժամկետները հենց այդ նպատակով է արագացրել։ Թեեւ, ընդհանուր առմամբ, ինչպես Սոչիի, այնպես էլ բրյուսելյան հանդիպումը, ի թիվս այլ բաների, նպաստում է հակամարտող կողմերի միջև լարվածության թուլացմանը։ Ի դեպ, ելնելով առկա փորձից, հնարավոր է թվում արձանագրել, որ նման հանդիպումների արդյունքներից Ալիևի դժգոհության դեպքում այն անխուսափելիորեն դրսևորվում է Արցախի և Հայաստանի նկատմամբ ադրբեջանական ռազմական սադրանքների տեսքով", - նկատել է նա։
Հայաստանի, Ռուսաստանի և Ադրբեջանի ընթացիկ եռակողմ օրակարգը, նրա կարծիքով, առաջին հերթին, որոշվում է անհապաղ Հայաստանի հետ սահմանները որոշելու գործընթաց սկսելու Բաքվի պահանջներով, որոնց շրջանակներում Մոսկվան հնարավորինս ձգտում է արագացնել այդ գործընթացը՝ շահագրգռված լինելով սահմաններին իրավիճակի կայունացմամբ։ Վերջինս, Խուրշուդյանի կարծիքով, թույլ կտա կողմերին ՌԴ միջնորդությամբ անցնել տարածաշրջանային հաղորդակցությունների ապաշրջափակման գործընթացին։
Փորձագետի գնահատմամբ՝ այս ամենն ավելի արդիական է դառնում, հատկապես, Հայաստանում լեգիտիմ, կրկին ընտրված իշխանության առկայության լույսի ներքո։ Խորհրդարանում ամուր մեծամասնություն ունեցող իշխանություն, ինչը թույլ է տալիս խուսափել երկրում իշխանափոխության հեռանկարից՝ ժողովրդական դժգոհության և խռովության հիման վրա: "Որքան ես հասկանում եմ Նիկոլ Փաշինյանի վերջին հայտարարություններից, խոսքը միայն հանձնաժողովի ստեղծման մասին է, որը պետք է սահմանի սահմանազատման եւ սահմանագծման ապագա գործընթացի հիմքերը, իրավական նորմերը", - նշել է նա:
"Ընդ որում, կասկածից վեր է, որ ԵԱՀԿ-ի կամ ԵՄ-ի փորձագետների ներգրավումը եռակողմ ձեւաչափին, որի շրջանակներում կգործի այդ հանձնաժողովը, բխում է Հայաստանի շահերից։ Եվրոպական խորհրդի նախագահ Շառլ Միշելը, գտնվելով Երեւանում, պատրաստակամություն է հայտնել համապատասխան փորձագետներ տրամադրել այդ գործընթացի համար: Դա գոնե ինչ-որ չափով կմոտեցնի սահմանազատումն ու սահմանագծումը այդ ոլորտում եվրոպական լավագույն չափանիշներին։ Եվ, իհարկե, էապես կնվազեցնի այդ գործընթացի շահարկման հնարավորությունը՝ Հայաստանից և Ադրբեջանից նախապատվություններ և զիջումներ կորզելու նպատակով", - ամփոփել է Խուրշուդյանը։