Հայաստանի ռազմաքաղաքական ղեկավարության անգործությունը Ադրբեջանի կողմից ՀՀ տարածքների սողացող էքսպանսիայի ֆոնին

Արմինֆո. Այն, ինչ տեղի է ունենում Հայաստանի սահմաններին, ուղղակի վտանգ է պարունակում հայոց պետականության գոյության համար, իսկ երկրի ռազմաքաղաքական ղեկավարության վարքագիծը հակասում է պետության ազգային շահերին։ Միայն այսպիսի տխուր հետեւության կարելի է հանգել՝ վերլուծելով տեղի ունեցածը, հատկապես, երկրի արևելյան սահմաններին։

Նախօրեին ՀՀ պաշտպանության նախարարությունը տեղեկատվություն էր տարածել այն մասին, որ նոյեմբերի 14-ին, ժամը 13։00-ի սահմաններում, ադրբեջանական ԶՈՒ ստորաբաժանումները փորձել են դիրքային առաջխաղացում ապահովել հայ-ադրբեջանական սահմանի արևելյան ուղղությամբ։ " Սկսվել է ինտենսիվ փոխհրաձգություն։ Հայ դիրքապահները կանխել են հակառակորդի փորձերը՝ դիրքավորվել այդ տարածքում։ Իրադրությունը դեռևս շարունակում է լարված մնալ։ Ներկա պահին, ռուսական կողմի միջնորդությամբ, ընթանում են բանակցություններ՝ իրադրության հանգուցալուծման ուղղությամբ։ Հայկական կողմից տուժածներ չկան։ Պաշտպանության նախարարությունը պարբերաբար տեղեկատվություն կտրամադրի իրադրության հետագա զարգացումների վերաբերյալ", - նշվում էր պաշտպանական գերատեսչության հաղորդագրությունում։

Նույն օրը երեկոյան պաշտպանական գերատեսչությունը նոր հաղորդագրություն էր տարածել, որում ասվում էր. "19։00-ի դրությամբ իրադրությունը հայ-ադրբեջանական սահմանի արևելյան ուղղությամբ, որտեղ այսօր ադրբեջանական ԶՈՒ ստորաբաժանումները փորձել էին դիրքային առաջխաղացում ապահովել, հարաբերականորեն կայունացել է, կրակոցներ չկան։ Ընթանում են բանակցություններ՝ իրադրության հանգուցալուծման նպատակով։ Հայկական կողմից տուժածներ չկան։ Հավելենք, որ սոցիալական ցանցերում տարածվող տեղեկությունները, թե սահմանային այդ հատվածում հայկական տարածք ադրբեջանական ԶՈՒ զրահատեխնիկա է մտել՝ չեն համապատասխանում իրականությանը": Մինչդեռ, որքան էլ ուզենանք հավատալ ՀՀ ՊՆ-ի տրամադրած տեղեկատվության հավաստիությանը, այնուամենայնիվ, հարկ է արձանագրել, որ ադրբեջանական կողմը համացանցում տարածել է տեսանյութեր դեպքի վայրից, որտեղ ակնհայտ երևում է, որ ՀՀ ԶՈՒ-ն չունի կրակելու հրաման, և նրանք նահանջում են՝ հակառակորդի հետ բախումները կանխելու համար: Ցավոք, ՀՀ ՊՆ-ում խուլ լռություն են պահպանում այս իրավիճակի հետ կապված, և հասկանալի չէ, թե ինչու են առաջնագծում կանգնած հայ զինվորները զրկված ինչպես իրենց, այնպես էլ երկրի պետական սահմանները պաշտպանելու հնարավորությունից։ Ավելին, գիշերվա մոտ նաեւ հայտնի է դարձել, որ Ադրբեջանի զինված ուժերը Հայաստանի ինքնիշխան տարածքում ևս մեկ հսկիչ-անցագրային կետ են տեղադրում ՀՀ իշխանությունների լուռ համաձայնությամբ, սակայն՝ առանց որևէ իրավական հիմքի: "ՀՀ ազգային անվտանգության ծառայությունը տեղեկացնում է, որ սույն թվականի նոյեմբեր 15-ին՝ տեղական ժամանակով ժամը 00։00-ից, Կապան-Ճակատեն ավտոճանապարհի ադրբեջանական վերահսկողության տակ գտնվող հատվածում սահմանային և մաքսային հսկողություն իրականացնելու նպատակով ադրբեջանական կողմը կտեղակայի անցակետ։ Համապատասխանաբար հայկական կողմը հայելային եղանակով նշված ավտոճանապարհին նույնպես կտեղակայի սահմանային ու մաքսային հսկողության կետեր։ Միաժամանակ հայտնում ենք, որ տվյալ հատվածում այլընտրանքային ավտոճանապարհը պատրաստ կլինի մինչև սույն տարեվերջ", - ասված է ԱԱԾ հաղորդագրությունում: Այդպիսով, հայկական վեց գյուղեր հայտնվել են շրջափակման մեջ և կտրված են արտաքին աշխարհից՝ Հայաստանի իշխանությունների այս անհեռատես որոշման արդյունքում։ Հարկ է նաև հիշեցնել, որ ավելի վաղ վարչապետ Նիկոլ Փաշինյանը, պատասխանելով ընդդիմադիր պատգամավորների հարցին, թե ինչ հիմքով են ՀՀ զինված ուժերը հետ քաշվել Սյունիքի մարզի իրենց դիրքերից, խոստովանել էր, որ նահանջի մասին համապատասխան հրաման է տվել հենց ինքը: Նրա հավաստմամբ ՝  տասնյակ կիլոմետրերով դեպի երկրի խորքերը նահանջելու այդ որոշումն ինքը կկայացրել է հակառակորդի հետ նոր բախումներից խուսափելու համար։

Այս պայմաններում ակնհայտ է դառնում, որ Հայաստանի այսօրվա ռազմաքաղաքական ղեկավարության գործողությունները ոչ միայն չեն ապահովում Հայաստանի ազգային շահերը, այլև ուղղակի վտանգ են կրում հայոց պետականության համար: ՀՀ ղեկավարության՝ երկրի անվտանգության ապահովման իր ուղղակի գործառույթները կատարելու անկարողության կամ նման ցանկության բացակայության պայմաններում

մենք ականատես ենք լինում Ադրբեջանի զինված ուժերի կողմից Հայաստանի տարածքների սողացող էքսպանսիայի։ Հայաստանի իշխանությունների այս հանցավոր անգործությունը հղի է Հայաստանի համար ամենաբացասական հետեւանքներով ։