Արմինֆո.Արցախի Հանրապետության պետական նախարար Արտակ Բեգլարյանը Հենֆորդում հանդիպել է ԱՄՆ կոնգրեսական Դեյվիդ Վալադաոյի հետ:
Ինչպես հաղորդել է ԱՀ պետական նախարարի մամուլի ծառայությունը, հանդիպման ընթացքում Արտակ Բեգլարյանը, շնորհակալություն հայտնելով կոնգրեսականին Արցախի ժողովրդին ցուցաբերվող շարունակական աջակցության համար, ներկայացրել է Արցախում տիրող իրավիճակը և հումանիտար ու քաղաքական մարտահրավերները:
Պետնախարարն ընդգծել է, որ հատկապես պատերազմի հումանիտար հետևանքների վերացման ու Արցախի ժողովրդի ինքնորոշման իրավունքի վերջնական իրացման գործում անհրաժեշտ է լայն միջազգային աջակցություն:
Դեյվիդ Վալադաոն վերահաստատել է իր աջակցությունը Արցախի ժողովրդի իրավունքների ու ազատությունների պաշտպանությանը: Կողմերը մտքեր են փոխանակել առկա հիմնախնդիրների լուծման գործում ԱՄՆ կոնգրեսականների հնարավոր ներգրավվածության շուրջ: