Արմինֆո. Հայաստանի կողմից օդային տարածքի տրամադրումը հակառակորդին հենց այսօր՝ Իրանին հնարավոր ազդակներից վատթարագույնն է: Այս կարծիքին է ԵՊՀ արևելագիտության ֆակուլտետի իրանագիտության ամբիոնի վարիչ Վարդան Ոսկանյանը:
"Հայաստանի կողմից թշնամական ինքնաթիռին օդային տարածք տրամադրելը հենց այսօր եւ հենց այդ ուղղությամբ՝ հնարավոր ազդակներից վատթարագույնն է, որը կարելի էր հղել Իրանին", - հայտարարել Է Ոսկանյանը:
Մարդկային զարգացման միջազգային կենտրոնի գործադիր տնօրեն, ՀՀ նախագահի խորհրդական Թևան Պողոսյանը, իր հերթին, արձագանքելով Ադրբեջանին օդային միջանցք տրամադրելու մասին հաղորդագրությանը, մասնավորապես ասել է. "Ընդամենը մեկ հարց. եթե ադրբեջանական օդային տարածքը երբեք փակ չի եղել Հայաստանի քաղաքացիական ավիացիայի համար, ապա այդ դեպքում ո՞րն էր խնդիրը, որ ոչ մի քաղաքացիական ինքնաթիռ այս ընթացքում այդպես էլ Արցախ չմեկնեց: Արցախի Հանրապետությու՞նն է արգելել, թե՞ Ադրբեջանը նախկինում Լեռնային Ղարաբաղն իրենը չի համարել և պատասխանատվություն չի ստանձնել։ Կամ, եթե այդպես է, ապա ինչու՞ հիմա ինքնաթիռները չեն թռչում, ռուս խաղաղապահնե՞րն են արգելում, թե՞ Տեղ գյուղի սահմաններից դուրս այլ է իրականությունը":
Ընդ որում Պողոսյանը վրդովվել է հայ հասարակությանը Ադրբեջանը լավ լույսի ներքո ներկայացնելու փորձերից, հիշեցնելով Ադրբեջանի նախագահ Իլհամ Ալիեւի երկու օր առաջ արած հայտարարությունը, որտեղ վերջինս խոստացել էր ջարդել բոլոր հայերի գլուխները: "Ու՞մ շահերն են սպասարկում այդ հայտարարությունները", - հարց է տվել Պողոսյանը:
Նշենք, որ այսօր Հայաստանի ԶԼՄ-ները հեղեղված են տեղեկատվությամբ այն մասին, որ երկրի իշխանությունները AZAL-ին թույլ են տվել օգտագործել երկրի օդային տարածքը: Այդ տեղեկությունը տարածվել է Իրանի կողմից Ադրբեջանի ռազմաօդային ուժերի համար իր երկինքը փակելու ֆոնին եւ հարուցել էր ոչ միանշանակ արձագանք:
Հայաստանի իշխանությունների այս գործողությունները քննադատել են ինչպես ընդդիմադիր պատգամավորները, այնպես էլ հասարակական լայն զանգվածները։
Ավելի ուշ Հայաստանի քաղավիացիայի կոմիտեն հաղորդագրություն էր տարածել աաայսօրվանից Ադրբեջանի AZAL ավիաընկերության կողմից Հայաստանի օդային տարածքով Բաքվից Նախիջեւան ուղեւորատար չվերթներ իրականացնելու վերաբերյալ:
Կոմիտեում հաստատել են, որ այս տարվա հոկտեմբերի 6-ին Բաքու-Նախիջեւան երթուղով չվերթն իրականացվել է Հայաստանի Հանրապետության օդային տարածքով: «Ինչպես Հայաստանի Հանրապետության, այնպես էլ Ադրբեջանի օդային տարածքների օգտագործումը չի սահմանափակվել քաղաքացիական օդանավերի համար՝ բացառությամբ 44-օրյա պատերազմի ժամանակահատվածի:
Նշված երթուղով թռիչքներ շարունակաբար իրականացվել են նաև նախկինում` մինչև 2014 թվականի նոյեմբերի 8-ը, ինչից հետո ադրբեջանական կողմն իր նախաձեռնությամբ դադարել է օգտվել Հայաստանի Հանրապետության օդային տարածքից։ Այս ողջ ընթացքում «Զվարթնոց» օդանավակայանից Ադրբեջանի օդային տարածքով չվերթեր են իրականացվել դեպի այլ երկրներ և հակառակ ուղղությամբ և շարունակում են իրականացվել։ Հավելենք նաև, որ ՀՀ ավիացիոն իշխանությունների կողմից տարանցիկ թռիչքի թույլտվություն չի տրամադրվում, քանի որ ըստ ընթացակարգերի՝ քաղաքացիական օդանավերով տարանցիկ թռիչքների իրականացման համար որևէ թույլտվություն չի պահանջվում: Օդային մայրուղիների ընտրության իրավասությունը վերապահված է օդանավ շահագործողներին», - ասվում է ՔԱԿ հաղորդագրությունում:
Նկատենք նաև, որ Լեռնային Ղարաբաղի դեմ Ադրբեջանի լայնածավալ ռազմական ագրեսիայի ընթացքում Բաքուն քաղաքացիական ինքնաթիռներ է օգտագործել՝ Նախիջևանից հակամարտության գոտի ահաբեկիչներ ու վարձկաններ տեղափոխելու համար։