Ամասիա Նիզիբլյանի այլ ազատությունը. ՀայԱրտ մշակութային կենտրոնում բացվել Է "Ինքս ինձ իմ կողմից" աշխատանքների ցուցահանդեսը

Արմինֆո.ՀայԱրտ  մշակութային կենտրոնում հոկտեմբերի 1-ից 8-ը ընթանում է սկսնակ երիտասարդ նկարչուհի Ամասիա Նիզիբլյանի "Ինքս ինձ իմ կողմից" անհատական ցուցահանդեսը: Ցուցադրությունն իրենից ներկայացնում է առավելապես նկարչուհու տեսողական օրագիր, որում պատկերված են 2019-2021թթ. ընկած ժամանակաշրջանում վերապրած դրվագները, հույզերը, զգացողությունները:

Նիզիբլյանն ինքն իր աշխատանքների ցուցահանդեսը փորձարարական է համարում, քանի որ առաջին անգամ հանրային ցուցադրության է ներկայացնում անձնական օրագիր, որը տեքստային ձեւից մարմնավորվել է իր կյանքի սյուրռեալիստական նկարազարդումների շարքի մեջ: «Ինձ համար կարևոր է հասկանալ, թե ինչպես իմ աշխատանքները կընդունվեն ուրիշների կողմից, քանի որ ես այսօր կիսում եմ ինչ-որ շատ անձնական մի բան», - ԱրմԻնֆոյի թղթակցի հետ զրույցում խոստովանել էԱմասիա Նիզիբլյանը:

Նկարչուհին պատմել է, որ հատկապես կարևորում է օրագրի վարումը՝ այն ընկալելով որպես ինքնավերլուծության կարևոր գործիքներից մեկը։ «Ես փորձեցի պատկերել իմ օրագիրը, կիրառելով գծային նոտայի տեխնիկան, օգտագործելով թանաքը: Ի սկզբանե, դրանք ընդամենը փոքր սքեթչեր էին այն ամենի, ինչ ես տեսել եմ: Հետո եկավ գիտակցում, որ ես կարող եմ մեծացնել այդ մասշտաբները", - պատմել է նկարչուհին։

Նիզիբլյանի պատմելով ՝ արվեստի աշխարհը իր համար բացվել է վաղ տարիքում, ինչին մեծապես նպաստել են երիտասարդ նկարչուհու ծնողները։ "Ծնողներս միշտ ցանկացել են, որ ես տիրապետեմ որևէ արվեստի։ Անկախ այն բանից, թե արդյոք դա կլինի երաժշտություն, գեղանկարչություն կամ արվեստի այլ տեսակ: Գլխավորն այն է, որ ունենաի ինչ-որ բան իմը", - պատմել է նա։

Ամասիա Նիզիբլյանը նկարել սկսել է 6 տարեկանից ՝ հաճախելով խմբակային նկարչական պարապմունքներին, որից հետո դեռ բոլորովին պատանի նկարչուհին մինչեւ համալսարան ընդունվելը շարունակել է սովորել նկարիչ Արարատ Մինասյանից։ Նիզիբլյանը բարձրագույն կրթություն է ստացել Եվրոպայում ՝ ավարտելով Չեխիայի մայրաքաղաքում գործող Բրիտանական համալսարանը։ "Պրահայում ամեն ինչ փոխվեց։ Ես շոկային վիճակում էի, քանի որ մենակ էի անծանոթ միջավայրում։ Բայց այն կրթությունը, որը ես ստացել եմ Չեխիայում, խիստ տարբերվում էր նրանից, ինչ կար Հայաստանում։ Այնտեղ մեզ բոլորովին այլ ազատություն էին տալիս, որը վերահսկողությունից դուրս էր, իմ կարծիքով։ Եվ ես հասկացա, որ պետք է ինձ գտնեմ", - հիշում է նկարչուհին։

Պրահայի բրիտանական համալսարանում Ամասիայի դասախոսներ են եղել Քելլի Հոբենը, Ջոն Հիլը, Ջենիֆեր Դե Ֆելիսին, որոնք ծանրակշիռ դեր են խաղացել նրա աշխատանքների գաղափարական ձեւավորման գործում:

Նշենք, որ ՀայԱրտ մշակութային կենտրոնը գտնվում է Մաշտոցի պողոտա 7 հասցեում։ Ցուցահանդեսը բաց է ժամը 11: 00-17: 00-ը: Մուտքն ազատ է: