Հոկտեմբերի 14-19-ը Հաագայի դատարանը կքննի Հայաստանի եւ Ադրբեջանի հակընդդեմ հայցերը

Արմինֆո.Հաագայի ՄԱԿ միջազգային դատարանը հոկտեմբերի 14-19-ը լսումներ կանցկացնի Ռասայական խտրականության բոլոր ձևերի վերացման միջազգային կոնվենցիայի խախտման վերաբերյալ  Հայաստանի և Ադրբեջանի  հակընդդեմ հայցերի շրջանակում։

Ինչպես  հաղորդում է DW-ն, վկայակոչելով Հաագայի դատարանի մամուլի ծառայությունը, հոկտեմբերի 14-15-ի լսումները վերաբերելու են Հայաստանի ներկայացրած՝ նախնական միջոցների կիրառման պահանջին: Հոկտեմբերի 18-19-ը կայանալիք լսումները վերաբերելու են Ադրբեջանի ներկայացրած նմանատիպ պահանջին:

«COVID-19 համավարակի կապակցությամբ նիստերը կանցկացվեն հիբրիդային ձևաչափով: Որոշ դատավորներ անձամբ կմասնակցեն նիստերին, իսկ մյուսները` տեսակապի միջոցով: Կողմերի ներկայացուցիչները նույնպես կարող են լսումներին մասնակցել անձամբ կամ տեսակապով», - հավելել են դատարանում:

Նաեւ հիշեցվում է, որ այն բանից հետո, երբ սեպտեմբերի 16-ին Հայաստանը դիմել էր ՄԱԿ միջազգային դատարան Ադրբեջանի դեմ հայցով, Բաքվի կառավարությունն անցած շաբաթ հակընդդեմ հայց էր ներկայացրել։