Իրանի ԱԳ նախարարն Ադրբեջանի դեսպանին տեղեկացրել է իրանցի երկու վարորդների ձերբակալության կապակցությամբ Թեհրանի դժգոհության մասին

Արմինֆո. Իրանի Իսլամական Հանրապետության արտաքին գործերի նախարար Հոսեյն Ամիր Աբդոլլահիյանն Իրանում Ադրբեջանի նորանշանակ դեսպան Ալի Ալիզադեի հետ հանդիպման ժամանակ ևս մեկ անգամ ընդգծել է իր սահմանների մոտ սիոնիստական ռեժիմի գտնվելու անթույլատրելիությունը:

IRNA-ի հաղորդման համաձայն, ԻԻՀ արտգործնախարարը, մասնավորապես, հայտարարել է. "Իրանը չի հանդուրժի իր ազգային անվտանգության դեմ սիոնիստական ռեժիմի ներկայությունն ու գործողությունները և կձեռնարկի այդ առնչությամբ անհրաժեշտ  ցանկացած միջոց":

Իրանի ԱԳ նախարարը հաջողություն է մաղթել Ադրբեջանի դեսպանին Թեհրանում իր առաքելության ընթացքում և կարևորել երկկողմ հարաբերությունները բարիդրացիության շրջանակներում: Ընդ որում, Իրանի արտաքին քաղաքական գերատեսչության ղեկավարը դժգոհություն է հայտնել "Ադրբեջանի տարածքում" (ՀՀ Սյունիքի մարզի Գորիս-Կապան ճանապարհահատվածը - խմբ.) իրանցի երկու վարորդների ձերբակալման կապակցությամբ և Ադրբեջանի Հանրապետության վերջին բացասական հայտարարությունները որակել զարմանալի և ցավալի:  Աբդոլլահիյանն Իրանի տարածքում զորավարժությունների անցկացումն անվանել է յուրաքանչյուր պետության ինքնիշխան իրավունք:

Ալի Ալիզադեն, իր հերթին, ընդգծել է Ադրբեջանի եւ Իրանի միջեւ երկկողմ հարաբերությունների կարեւորությունը եւ հույս հայտնել, որ ստեղծված իրավիճակը հնարավորինս արագ կլուծվի:

Ավելի վաղ Իրանի ցամաքային զորքերի հրամանատար, գեներալ Քիումերս Հեյդարին հայտարարել էր, որ Իրանի զինված ուժերի ցամաքային զորքերը հոկտեմբերի 1 - ին զորավարժություններ են սկսում երկրի հյուսիս-արեւմտյան տարածաշրջանում (Արդեբիլ, Արեւելյան Ադրբեջան, Արեւմտյան Ադրբեջան եւ Զանջան): Նրա խոսքով ՝ զորավարժությունների ընթացքում կօգտագործվեն Իրանի ԶՈՒ հաուբիցներ, անօդաչու թռչող սարքեր, ուղղաթիռներ եւ զրահատեխնիկա:

Նշենք նաև, որ նախօրեին ՀՀ ԱԳ նախարար Արարատ Միրզոյանն ընդունել է Հայաստանի Հանրապետությունում Իրանի Իսլամական Հանրապետության դեսպան Աբբաս Բադախշան Զոհուրին։

Զրուցակիցները գոհունակություն են հայտնել Հայաստանի ու Իրանի միջև երկկողմ և բազմակողմ հարթակներում հաստատված արդյունավետ փոխգործակցության կապակցությամբ և ընդգծել, որ երկու երկրներում ձևավորված նոր կառավարությունները լրացուցիչ կարևոր ազդակ կհաղորդեն հայ-իրանական հարաբերություններին: ՀՀ ԱԳ նախարարը և Իրանի դեսպանը կարևորել են առևտրատնտեսական ոլորտում համագործակցության ընդլայնումը՝ կողմերի միջև համաձայնեցված կոնկրետ ծրագրերի իրականացման միջոցով, ինչը հնարավորություն կտա առևտրաշրջանառությունը հասցնել մինչև 1 մլրդ դոլարի:

Հայ-իրանական էներգետիկ համագործակցության առումով քննարկվել են գազ՝ էլեկտրաէներգիայի դիմաց ծրագրի ծավալների մեծացման հեռանկարները:

Արարատ Միրզոյանը և Աբբաս Բադախշան Զոհուրին անդրադարձել են նաև տարածաշրջանային անվտանգության ու կայունության հարցերին: ՀՀ ԱԳ նախարարը շեշտել է, որ Ադրբեջանի սադրիչ գործողություններն ու նկրտումները Հայաստանի ինքիշխան տարածքի նկատմամբ խաթարում են տարածաշրջանում խաղաղությանն ու զարգացմանն ուղղված ջանքերը: Հայկական կողմը նշել է, որ բարձր է գնահատում Հայաստանի տարածքային ամբողջականության վերաբերյալ Իրանի դիրքորոշումը։

Քննարկվել է նաև իրավիճակը Գորիս-Կապան ճանապարհահատվածում: Արարատ Միրզոյանը տեղեկացրել է այլընտրանքային ճանապարհի կառուցման ընթացքի, ինչպես նաև «Հյուսիս-հարավ» մայրուղու աշխատանքների մասին։