Ադրբեջանաիրանական սահմանին Իրանի ԶՈՒ զորավարժությունները շարունակում են նյարդայնացնել Ադրբեջանին

Արմինֆո.Երեւան: 30.09.21:  ԱրմԻնֆո: Մարիաննա Մկրտչյան: Ադրբեջանաիրանական սահմանին Իրանի ԶՈՒ զորավարժությունները շարունակում են նյարդայնացնել Ադրբեջանին:

Ինչպես հաղորդում են ԶԼՄ-ները, վկայակոչելով Իսլամական Հանրապետության ցամաքային զորքերի հրամանատար, գեներալ Քիյումերս Հեյդարիին, Իրանի զինված ուժերի ցամաքային զորքերը հոկտեմբերի 1-ին լայնածավալ զորավարժություններ կսկսեն երկրի հյուսիս-արեւմտյան տարածաշրջանում: Զորավարժությունների ընթացքում կօգտագործվեն հաուբիցներ, անօդաչու թռչող սարքեր, ուղղաթիռներ եւ զրահատեխնիկա:

Իրանի հյուսիս-արեւմտյան տարածաշրջանն ընդգրկում է Արդեբիլ, Արեւելյան Ադրբեջան, Արեւմտյան Ադրբեջան եւ Զանջան նահանգները:

Հարկ է նշել, որ վերջին օրերին համաշխարհային սարդոստայնում տարածվում են Ադրբեջանի սահմանների մոտ Իրանի մեծաքանակ ռազմական տեխնիկայի կուտակման կադրերով տեսանյութեր։ Ադրբեջանաիրանական սահմանին զորավարժություններ անցկացնելու Իրանի մտադրությունը ոչ միանշանակ արձագանք է առաջացրել Ադրբեջանում։ Ընդհուպ՝ Ադրբեջանի նախագահ Իլհամ Ալիևը Anadolu-ին տված հարցազրույցում անսպասելի է անվանել Իրանի կողմից Ադրբեջանի հետ սահմանի երկայնքով իրականացվող զորավարժությունները ։ Ընդ որում, նա վրդովվել է, որ Իրանի կողմից 30 տարվա ընթացքում առաջին անգամ զորավարժություններ են անցկացվում՝ այն բանից հետո, երբ այդ տարածքներն անցել են ադրբեջանական վերահսկողության տակ: Այդ հայտարարությանն օպերատիվ և բավականին կտրուկ արձագանքել է Իրանի արտաքին քաղաքական գերատեսչությունը։ Մասնավորապես,  ԻԻՀ արտաքին գործերի նախարարության ներկայացուցիչ Սայիդ Խաթիբզադեն ընդգծել է, որ հյուսիս-արևմտյան սահմանամերձ շրջաններում զորավարժությունների անցկացումն ինքնիշխանության հարց է և ուղղված է ողջ տարածաշրջանում խաղաղության և կայունության ապահովմանը: Դրա հետ մեկտեղ նա հավելել է, որ Իսլամական Հանրապետությունը չի հանդուրժի սիոնիստական ռեժիմի ներկայությունն իր սահմանների մոտ եւ կձեռնարկի ցանկացած գործողություն, որն անհրաժեշտ կհամարի իր անվտանգությունն ապահովելու համար: Ընդ որում, մամուլի քարտուղարը զարմացել է, թե ինչպես է Ադրբեջանի նախագահը հայտնել այդ դիտողությունները, քանի որ երկու երկրներն ունեն լավ, հարգալից հարաբերություններ եւ բարձր մակարդակով շփման նորմալ մեթոդներ: Միեւնույն ժամանակ, Խաթիբզադեն հիշեցրել է, որ Իրանի Իսլամական Հանրապետությունը միշտ մերժել է տարածքային օկուպացիայի ցանկացած տեսակ, եւ ընդգծել է երկրների տարածքային ամբողջականությունը եւ միջազգայնորեն ճանաչված սահմանները հարգելու անհրաժեշտությունը:

Ի պատասխան թուրքական «Անադոլու» լրատվամիջոցին տրված հարցազրույցի ընթացքում Ադրբեջանի նախագահ Իլհամ Ալիևի՝ Իրանի դեմ հնչեցված մեղադրանքի, թե՝ «ինչու՞ 30 տարիների ընթացքում, երբ Ղարաբաղի շրջակա տարածքները հայերի տիրապետության տակ էին, Իրանի հյուսիսային շրջաններում զորավարժություններ չէին անցկացվում», իրանական «Ջամ-է-ջամ» օրաթերթն իր երեկվա համարում հոդված է հրապարակել, որից  մի քանի մեջբերում է հրապարակել Իրանում Հայաստանի դեսպանությունը:

«Հայաստանը Բաքվի և Անկարայի նման Իրանի սահմանների նկատմամբ սին երազանքներ չունի և նման պահվածք չի ցուցաբերում:  Հայաստանը, ի տարբերություն Ադրբեջանի, Իսրայելի դաշնակիցը չէ:  Հայաստանը Ադբեջանի Հանրապետության նման Ատրպատականում չի ստեղծել վարձկան-անջատողականների ցանց:  Հայաստանը նպատակ չունի Իրանին առևտրական ճանապարհներից դուրս մղելու։ Ի դեպ, հոդվածագիրը նկատում է նաև, որ «Ադրբեջանի նախագահի ոչ դիվանագիտական վարքը և Թուրքիայի լրատվամիջոցով Իրանին ուղերձ հղելը ոչ այլ ինչ է, քան գաղութացվածության նշան», - ասվում է դեսպանության  հաղորդագրությունում։

Նկատենք նաև, որ զորավարժություններն Իրանի տրամաբանական պատասխանն էին Հայաստանի տարածքով իրանական բեռնափոխադրումների տարանցումը վերահսկելու փորձերին։  Շաբաթներ առաջ ադրբեջանցի զինվորականներն սկսել են կանգնեցնել  իրանական բեռնատարները Հայաստանի Սյունիքի մարզի Գորիս-Կապան ճանապարհի 21 կմ հատվածում, որն անցել է ադրբեջանական վերահսկողության տակ, և մաքսատուրքեր պահանջել իրանցի վարորդներից: Ավելին, իրանցի երկու վարորդ ձերբակալվել է ադրբեջանցի ուժայինների կողմից, իբր, Ստեփանակերտ ապօրինի այցելության համար։ Նրանց հետագա ճակատագրի մասին առայժմ ոչինչ հայտնի չէ։