Փորձագետ. Իշխանությունների ռազմավարության անորոշությունը թույլ չի տալիս կանխատեսել դրա նպատակները

Արմինֆո. Իշխանությունների ռազմավարության անորոշությունը թույլ չի տալիս կանխատեսել նրա նպատակներն ու առաջնահերթությունները Հայաստանի սահմանադրության հերթական բարեփոխման նախաձեռնած գործընթացում։ ԱրմԻնֆո-ին այդպիսի կարծիք է հայտնել Երևանի մամուլի ակումբի նախագահ Բորիս Նավասարդյանը։

"Հայտնի չէ, թե իշխանությունն ինչպես է տեսնում Հայաստանի Հանրապետության ապագան։ Քաղաքական իրավիճակը վերջին երեք տարիների ընթացքում լովին փոխվել է։ Եվ ինձ համար շատ դժվար է ներկայացնել այն առաջնահերթությունները, որոնցով այսօր առաջնորդվում են իշխանությունները այդ հարցում։ Համենայն դեպս, նրանց գործողություններում որևէ հետևողականություն չի դրսևորվում։ Ինչն, իր հերթին, խոչընդոտում է որևէ կանխատեսման հնարավորությունը",- նշել է նա։

Օգոստոսի 18-ին վարչապետ Նիկոլ Փաշինյանը հնչեցրել է երկրում սահմանադրական բարեփոխումների լայն քննարկումներ անցկացնելու կառավարության մտադրությունը: Այս համատեքստում վարչապետն առանձնացրել է 44-օրյա պատերազմը՝ որպես այդ քննարկումների նոր խթան, գործող խորհրդարանական կառավարման համակարգի արդյունավետությանն ու համարժեքությանը վերաբերող բազմաթիվ հարցերի առաջացման լույսի ներքո։ Հիշեցնենք, որ դեռ մարտի 1-ին Փաշինյանը հայտարարել էր, որ մտադիր է հոկտեմբերին անցկացնել սահմանադրության բարեփոխում ՝ նախկին կիսանախագահական համակարգին վերադառնալու նպատակով։

Ամեն դեպքում, Նավասարդյանը կառավարող ուժի այս նախաձեռնությունը էականորեն ուշացած է համարում. սահմանադրությունը փոփոխությունների պետք է ենթարկվեր 2018-ին նոր խորհրդարանի ընտրվելուց մի քանի ամիս անց: Քանի որ նրա հիմնական թերությունները հայտնի էին, թերեւս, բոլորին։ Սահմանադրության հարցը, նրա կարծիքով, պետք է հնարավորինս արագ լուծվեր, եթե հեղափոխություն իրականացրած ուժը հասկանար, թե ինչի համար է այն իրականացրել և, համապատասխանաբար, ինչպիսին է տեսնում Հայաստանի ապագան։

Այս ֆոնին՝ կառավարող կուսակցությունը եւ ընդդիմադիր խմբակցությունները խորհրդարանում, նրա գնահատմամբ, շարունակում են ժամանակ վատնել քննարկումների եւ բանավեճերի վրա, այժմ՝ արդեն խորհրդարանական հանձնաժողովների նախագահների տեղակալների թեկնածությունների շուրջ: Այս լույսի ներքո՝ Նավասարդյանը համոզված է, որ Ազգային ժողովը զբաղվում է բոլորովին այլ հարցերով, քան՝ ինչով պետք է զբաղվի։ Նրա կարծիքով, ժողովրդի ընտրյալների վարքագիծը բոլորովին չի համապատասխանում ոչ իրենց առաքելությանը, ոչ էլ առկա իրավիճակին։

"Այս ամենը ծայրահեղ մտահոգություն է առաջացնում։ Եվ, դատելով ըստ ամենայնի, խորհրդարանականների նման պահվածքի պատճառն այն է, որ, իրականում, նրանց փոխարեն որոշումներ են կայացնում բոլորովին այլ մարդիկ։ Բայց, ամեն դեպքում, դա իրենց սեփական ընտրությունն է, ամեն ինչ իրենց ձեռքում է։ Եվ եթե այդ մարդիկ որոշեին իրենց պահել որպես արժանի քաղաքական գործիչներ, ապա նրանք կկարողանային հարցեր տալ, ստանալ և տալ բազմաթիվ հարցերի պատասխաններ։ Բայց մենք տեսնում ենք, որ,  փաստորեն, նրանք համակերպվել են այն մտքի հետ, որ խորհրդարանական հանրապետությունում որոշումները կայացնում են ոչ թե իրենք, այլ ուրիշները՝ խորհրդարանի պատերից դուրս", - եզրափակել է Նավասարդյանը։