Արմինֆո. Չնայած վերջին շրջանում Թուրքիայի կողմից հայկական վեկտորում որոշակի դրական ազդակների առկայության մասին հնչող խոսակցություններին՝ հակառակ կողմի հայտարարություններն ու գործողությունները բնավ լավատեսության տեղիք չեն տալիս։ ԱրմԻնֆո-ին այդպիսի կարծիք է հայտնել Հայաստանի ԱԺ նախկին պատգամավոր, ադրբեջանագետ Տաթևիկ Հայրապետյանը։
Օգոստոսի 25-ին Թուրքիայի նախագահ Ռեջեփ Թայիփ Էրդողանը մի շարք երկրների դեսպանների հետ հանդիպման ժամանակ հայտարարել էր "Լեռնային Ղարաբաղի օկուպացիայի ավարտից հետո երկարաժամկետ խաղաղության համար պայմանների ստեղծման մասին": "Եթե Հայաստանը օգտվի այդ շանսից, ապա Անկարան անհրաժեշտ քայլեր կձեռնարկի։ "Տարածաշրջանին կառուցողական մոտեցում է պետք։ Եվ նույնիսկ տարաձայնությունների առկայության դեպքում դրացիական հարաբերությունները պետք է զարգացնել տարածքային ամբողջականության և ինքնիշխանության նկատմամբ հարգանքի հիման վրա ։ Հաջողություն եմ մաղթում Հայաստանի նոր կառավարությանը, որը հայտարարել է, որ պատրաստ է առաջ շարժվել այդ ուղղությամբ", - ասել էր նա։ Օգոստոսի 27-ին ՀՀ վարչապետ Նիկոլ Փաշինյանը հայտարարել էր Թուրքիայից ստացվող "որոշ դրական հրապարակային ազդակների մասին: "Մենք կգնահատենք այդ ազդակները, դրական ազդակներին կպատասխանենք դրական ազդակներով", - ասել էր վարչապետը։
"Քաշաթաղի շրջանում թուրք-ադրբեջանական համատեղ զորավարժություններ են ընթանում։ Կան նաեւ այլ ցուցիչներ, որոնք, մեղմ ասած, հաստատում են Անկարայից դրական ազդակների եւ նրա իրական գործողությունների միջեւ տարաբերությունների առկայությունը: Այս լույսի ներքո՝ Երեւանից եւ Անկարայից հնչող վերջին հայտարարությունները թույլ են տալիս ենթադրել, որ այս ուղղությամբ գոյություն ունեն այլ, այս փուլում հրապարակման ոչ ենթակա գործընթացներ", - ընդգծել է նա:
Փորձագետի գնահատմամբ, հաշվի առնելով անցյալում Հայաստանի և Թուրքիայի միջև հարաբերությունների կարգավորման անհաջող փորձերը, հայ-թուրքական հարաբերությունները տարածաշրջանային քաղաքականության բավականին բարդ քեյս են: Նրա կարծիքով, Երեւանի եւ Անկարայի միջեւ խնդիրները բազմաշերտ են եւ բնավ չեն սահմանափակվում հայ - թուրքական սահմանի ապաշրջափակման հարցով։ Այս համատեքստում Հայրապետյանը հույս է հայտնել, որ Երեւանում համապատասխան գերատեսչությունները հաշվի են առնում եւ հաշվարկում են Անկարայի ուղղությամբ ձեռնարկվող քայլերի բոլոր հնարավոր ռիսկերն ու հետեւանքները:
Հաշվի առնելով Հայաստանի, Ռուսաստանի եւ Ադրբեջանի ղեկավարների 2020 թվականի նոյեմբերի 9-ի եռակողմ հայտարարության 9 - րդ կետի առկայությունը (տարածաշրջանում բոլոր հաղորդակցությունների ապաշրջափակումը - խմբ.), Հայրապետյանը Հայաստանի եւ Թուրքիայի միջեւ ընթացող գործընթացները միանգամայն տրամաբանական է համարում: Ավելին, նրա գնահատմամբ, այդ կետի իրականացման ուղղությամբ գործողություններն արդեն մեկնարկել են։ Խնդիրը, փորձագետի կարծիքով, Անկարայի կողմից Երևանին այդ ճանապարհին նախապայմանների նոր փաթեթի առաջադրումն է։
Մեկնաբանելով Ադրբեջանի ընթացիկ քաղաքականությունն այս ֆոնին՝ ադրբեջանագետը այն բնութագրել է որպես Արցախում ռուսական ռազմական ներկայության ապալեգիտիմացման հասնելուն ուղղված: Նրա կարծիքով ՝ Բաքուն այսօր միանգամայն ակնհայտ կերպով գործադրում է բոլոր ջանքերը Արցախից ռուս խաղաղապահների հեռացման համար հիմքեր ստեղծելու նպատակով։
"Խաղաղապահների կողմից արցախցիների ֆիզիկական անվտանգության երաշխավորումը, հակամարտության համապարփակ քաղաքական կարգավորման և Արցախի կարգավիճակը որոշելու անհրաժեշտության մասին ԵԱՀԿ Մինսկի խմբի համանախագահ երկրների հայտարարությունները 180 աստիճանով հակասում են Բաքվի հայտարարությունների ու մտադրությունների ոգուն ու տրամաբանությանը։ Եվ հենց ռուս խաղաղապահների ներկայությունն է մեր հայրենակիցների ֆիզիկական բնաջնջումը և նրանց տներից ու հայրենիքից դուրս մղումը կանխելու հիմնական երաշխիքը։ Հասկանալի է, որ Բաքվում հակամարտության լուծումը տեսնում են հենց այդպես", - ամփոփել է Հայրապետյանը։